Европа
Орбан бара расправа во ЕУ за имигрантите во кои гледа закана за демократијата

Унгарскиот премиер Виктор Орбан побара од европските челници да ја променат својата миграциска политика и да ги одвратат имигрантите од доаѓањата во Европа, бидејќи во спротивно ќе се соочат со политичка криза и закани за демократскиот поредок.
Унгарскиот премиер Виктор Орбан, кој подоцна во четвртокот ќе се обрати на конгресот на Европската народна партија (EPP) во Мадрид, изјави во средата вечерта за телевизијата M1, дека европските челници немаат мандат да пуштаат стотици илјади бегалци во Европската унија, со малку или воопшто без контрола.
Целта на унгарските огради на границите, особено на јужната кон Србија, е да ги одврати имигрантите од Европа, а не да бидат пуштани до Германија по други рути, вели Обран додавајќи дека ги повикал балканските соседи да ги одвраќаат бегалците.
„Ова ја дестабилизира европската демократија. Мораме да почнеме со дебата за иднината на нашиот континент, искрено без замолчувања поради ‘политичка коректност’, без претерувања, говорејќи отворено“, истакна Орбан.
„Мораме да ги слушаме луѓето и да ги вклучиме нивните погледи во својата политика. Доколку не успееме да го сториме тоа, ќе имаме политичка криза во текот на кулминацијата на мигрантската криза“, порача унгарскиот премиер.
Орбан истакна дека е исправно да не се дозволува преминување до Европската унија, туку луѓето да бидат вратени во бегалските кампови од коишто ги започнуваат своите патешествија, бидејќи „колку повеќе се оддалечат од своите проблематични земји, толку потешко ќе биде да бидат вратени“. Поради тоа, заклучува Орабан, тие луѓе „мора да останат во својот региони“ каде што за нив „мора да се создадат човечки услови“.
Во врска со оградата подигната кон Хрватска, исто така членка на ЕУ, Орбан вели дека таа е подигната за да се „заштити нашиот начин на живот и за тоа постои силен консензус во Унгарија“. „За тоа и треба да служат границите“, додаде унгарскиот премиер./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Макрон тужи американска конзервативка, која тврди дека Брижит е маж

Францускиот претседател Емануел Макрон и неговата сопруга Брижит поднесоа тужба против Американката Кандис Овенс поради тврдење дека првата дама на Франција е, всушност, маж.
Тужбата е поднесена во американската држава Делавер и содржи 22 точки од обвинението, а двојката бара парична отштета за клевета и отштета.
Кандис е конзервативна авторка, водителка, политички коментатор и активистка. Таа е позната по својата активна поддршка на Трамп за време на неговиот последен мандат. Сепак, неодамна јавно се дистанцира од него. Таа постојано изјавуваше дека тој ја разочарал и дека сега „се срами што некогаш го поддржувала“. Таа ги критикува неговите политички потези и го обвини дека ги предаде принципите што тој вети дека ќе ги брани.
Според адвокатот на Макрон, Том Клер, францускиот претседател и неговата сопруга повеќе од една година безуспешно се обидуваат да ја спречат Овенс, која шири теории на заговор за Брижит на социјалните медиуми и на „Јутјуб“.
Во март оваа година Овенс објави видео со наслов „Дали првата дама на Франција е маж?“, кое беше масовно споделувано на платформата „Икс“. Во него таа тврдеше дека тоа е „најголемиот политички скандал во историјата“.
Потоа таа продолжила да објавува содржини за Брижит вклучувајќи серија видеа наречени „Станувајќи Брижит“. Таа исто така продавала маички со слогани што ја промовираат теоријата, според тужбата. Емануел и Брижит тврдат дека Овенс била повеќе пати замолувана да престане да ги изнесува овие тврдења и ѝ дале докази дека Брижит е родена како жена по име Брижит Троње, дека не е во роднинска врска со Емануел Макрон и дека тие не се под никакво влијание, како што инсинуира Овенс.
„Ова не е само политички удар. Ова е лично. И двајцата се човечки суштества, имаат брак, семејства и чувства. И ова ги засега“, изјави адвокатот Клер за Си-ен-ен.
Во тужбата се тврди дека Макрон и неговата сопруга претрпеле сериозни штети – нивната приватност, углед и деловните можности биле нарушени. „Секојпат кога ќе ја напуштат куќата, тие знаат дека многу луѓе веруваат во овие лаги. Тоа е понижувачки, инвазивно и, едноставно, неправедно“, се вели во документот.
Овенс сè уште продолжува
Кога дознала за тужбата, Овенс се појавила на „Јутјуб“. Таа објавила видео, во кое, меѓу другото, рекла дека е подготвена да ја добие оваа војна. „Мажот Брижит очигледно има многу храброст“, рекла таа.
Таа исто така објави фотографија од двојката Макрон на „Инстаграм“ со порака: „Денес ќе ја земам оваа перика. Останете со мене“. Подоцна, на „Јутјуб“ изјави дека тужбата е „очаен обид да се спаси нејзиниот имиџ“.
Брижит Макрон се соочила со слични обвинувања и претходно – во 2022 година таа тужеше две жени во Франција, кои ширеа слични дезинформации. Првично ја доби пресудата, но случајот сега е вратен на повисок суд.
Фото: принтскрин
Европа
(Видео) Се урна патнички авион во Русија

Авион „ан-24“ на „Ангара ерлајнс“, со најмалку 40 патници, се урна во руската област Амур, на далечниот исток од земјата.
Остатоците од патничкиот авион се пронајдени на 15 километри од Тинда, планираната дестинација. SHOT објаснува дека хеликоптерот за пребарување не можел да слета во близина на местото на несреќата, па затоа спасувачите ќе мора да стигнат таму пеш.
✈️🚨 Passenger plane crashes in Russia’s Amur region — over 40 people on board
A Soviet-made Antonov An-24 aircraft operated by Angara Airlines disappeared from radar near the town of Tynda while attempting a second landing approach. Emergency crews later found the burning… pic.twitter.com/MOO08NTbEP
— NEXTA (@nexta_tv) July 24, 2025
„РИА новости“, повикувајќи се на извори, пишува дека, според прелиминарните податоци, нема преживеани.
Гувернерот на регионот, Василиј Орлов, изјави дека, според прелиминарните податоци, во авионот имало 43 патници, меѓу кои пет деца и шест члена на екипажот.
Министерството за вонредни ситуации го процени бројот на луѓе во авионот малку помал, на 40-ина.
Фото: принтскрин
Европа
Авион со 50 патници исчезна над Русија

Руската контрола на воздушниот сообраќај објави дека изгубила контакт со патнички авион „ан-24“, во кој се наоѓале 50-ина лица, објави „Ројтерс“ повикувајќи се на руски извори.
Според информациите од порталот SHOT, авионот, управуван од авиокомпанијата „Ангара“, летал кон градот Тинда, во регионот Амур, на крајниот исток од Русија, во близина на границата со Кина.
Се верува дека авионот исчезнал само неколку километри пред неговата дестинација.
Регионалниот гувернер Василиј Орлов изјави дека, според прелиминарните податоци, во авионот имало 43 патници, меѓу кои пет деца и шест члена на екипажот.
„Сите расположиви сили и ресурси се насочени кон потрага по авионот“, напиша тој на „Телеграм“.
Фото: принтскрин