Полјаците во недела излегуваа на избирачките меса за да го изберат новиот шеф на државата а меѓу 11-те кандидати во првиот круг најмногу шанси за победа има актуелниот претседател, 62-годишниот Бронислав Коморовски, не само поради солидно одработениот прв мандат, туку и поради фактот што како поранешен министер за одбрана е најдобро упатен во безбедносните прашања, кои поради украинската криза во Полска избија во прв план.

„Адутот на претседателот Коморовски е тоа што Полјаците добро го познаваат и им се допаѓа неговиот татковски став, однесувањето на семеен човек“, смета политикологот Миколај Шчесник.

Коморовски за Полјаците е олицетворение на стабилноста, што му е доблест во време на безбедносните закани во непосредното соседство, но и недостиг кај оние кои сакаат промени, поради што се свртуваат кон неговите противкандидати кои сите се против либералната и проевропска политика што ја спроведува полската влада.

Доминантна политичка партија веќе осум години во Полска е Граѓанската платформа, која го поддржа Коморовски и на изборите во 2010 година, кога првпат го освои петгодишниот мандат.

Предизборните анкети на актуелниот претседател му даваат околу 35 отсто од поддршка на гласачите, иако имаше претходно и речиси 10 отсто повеќе, но сепак и ова е значителна предност пред првиот противкандидат, 42- годишниот Анджеј Дуда, кој не успева да надмине 30 отсто. Ниеден од другите девет кандидати, меѓу коишто пет се десничари, не добиваат повеќе од 5 отсто поддршка од гласачите, освен Павел Кукиз, 51-годишниот рокер кој е многу популарен во Полска и за кого би гласале 11 отсто од гласачите.

Речиси е извесно дека ќе се одржи вториот изборен круг, на 24-ти мај, а според анкетите на него сразмерно уверлива победа би требало да оствари Коморовски.

Во Полска овластувањата на претседателот се многу ограничени, но неговата улога е влијателна во областите на надворешната политика и одбраната, и може да предлага закони и има право да вложи вето на донесените закони.

Војната во соседството и предизвиканиот страв од Русија, под чијашто доминација Полска со децении беше во ерата на Советскиот сојуз, иако денеска Полска е членка на ЕУ и на НАТО, оди во полза на Коморовски. Прашањето за тоа како да се гарантира безбедноста на земјата беа најчестите на минатонеделните телевизиски соочувања на кандидатите, бидејќи во Полска е наметнат стравот, кој се чини е иреален, дека таа би можела да биде „идната руска цел“. Затоа Коморовски во кампањата намерно ги истакнуваше безбедносните теми, за да ја искористи својата репутација во сферата на одбраната.

Дуда, кандидат на главната опозициска партија Право и правда на Јарослав Кашински, никогаш не бил министер и никогаш не се занимавал со безбедносни прашања, па затоа својата кампања на насочи кон социјалните прашања, меѓу другото, ветувајќи дека ќе ја намали старосната граница за пензионирање и дека ќе се бори против нееднаквоста во полското општество. Тие теми привлекоа многу полски гласачи, на коишто им се допаѓаат неговата младост, полетот и енергичноста, а пред неколку ден ја доби и поддршката од синдикатот солидарност. Но „неговите ветувања многу ги надминуваат овластувањето коишто ги има претседателот, а со своите економски предлози би можел да го уништи дури и германскиот буџет“, вели Радослав Марковски, политиколог од Полската академија на науките./крај/мф/сн

Извор: Макфакс