Украинскиот претседател Петро Порошенко го потпиша законот „За специјалните статуси на локалната самоуправа во одредени региони на Донецката и Луганската област“, се наведува во соопштението на украинското претседателство објавено во четвртокот навечер, во пресрет на неговата средба со рускиот претседател Владимир Путин на маргините од самитот ASEM во петок во Милано.

„Специјалниот статус во овие области е воведен со законот за период од три години, од денот на неговото стапување на сила“, се истакнува во соопштението објавено на интернет страницата на украинското претседателство.Овој специјален статус беше една од точките на мировниот план од Минск од 5-ти септември, претходно дискутиран од Порошенко и Путин, со кој се воспостави примирје меѓу прозападните власти во Киев и проруските бунтовници во доминантно рускојазичните источни региони Донецк и Луганск, кои прво по соборувањето на претседателот Виктор Јанукович бараа федерализација на земјата, а потоа самопрогласија ткн Народни републики во областа позната под заедничко име Донбас, која тие ја нарекуваат Новорусија. Во соопштението се истакнува дека главна цел на законот е „да се создадат услови за брзо нормализирање на ситуацијата, да се врати владеењето на правото, на уставните права и слободи на граѓаните, создавање услови за враќање на населението… обновување на животот во населените места и развој на овие територии“.Во документот се укажува на тоа дека украинската држава ќе го поддржи социјално економскиот развој на овие региони и воведувањето посебен економски режим за нив.Според соопштението, државата нема да продолжи да ги гони и да ги повикува на одговорност учесниците во настаните во областите. За спроведување на законите и редот во регионите ќе бидат формирани тимови на народната милиција.Во источна Украина, меѓутоа, и натаму траат спорадичните судири меѓу завојуваните страни, и покрај потпишаниот прекин на огнот и договорот за разграничување на нивните сили во тампон зона во широчина од триесет километри од првичните позиции коишто ги заземале.Во петок се очекува средбата на рускиот и украинскиот претседател, Владимир Путин и Петро Порошенко во Милано. На разговорите меѓу двајцата челници ќе присуствуваат и домаќинот на самитот, италијанскиот премиер Матео Ренци, германската канцеларка Ангела Меркел, францускиот претседател Франсоа Оланд, британскиот премиер Дејвид Камерон и највисоките функционери на Европската унија, претседателот на Европската комисија, Жозе Мануел Баросо и претседателот на Европскиот совет, Херман ван Ромпуј. Форматот на средбата сугерира дека оваа средба на Путин и Порошенко може да доведе до напредок во решавањето на украинската криза, откако двата нивни претходни состанока, во јуни во Нормандија и во август во Минск, постигнаа само ограничени резултати./крај/мф/сн