Украинскиот претседател Петро Порошенко го разреши во средата милијардерот Игор Коломојски, гувернер на регионот Днепропетровски, кој е на границата со одметнатиот рускојазичен регион Донбас, поради судирот околу контролата над државните компании.

Украинскиот претседател Петро Порошенко, чие богатство исто така се изразува во милијарди евра, го разрешил од должноста Игор Коломојски, соопштија од неговиот кабинет. Овој потег е преземен по судирите меѓу Коломојски и парламентот околу контролата над државните компании.

Коломојски беше именуван од прозападните власти во Киев пред една година, кога политичките сили кои го соборија претседателот Виктор Јанукович, почнаа да ги менуваат регионалните функционери за кои сметаат дека не им се лојални, што заедно со укинувањето на рускиот јазик како службен, кој на југоистокот од земјата како мајчин го декларира огромно мнозинство од населението, предизвика протести и отцепувања на црноморскиот полуостров Крим а подоцна и вооружен бунт во регионите Луганск и Донецк.

Регионот Днепропретровск, досега доверен на управување на Коломојски, се смета за клучна индустриска област. Самиот Коломојски требаше да го спречи бунтот на рускојазичното население во неговиот регион, а стана познат по финансирањето на доброволечките баталјони кои се борат заедно со силите лојални на Киев, но кои проруските бунтовници ги обвинуваат дека се составени исклучиво од припадници на украинските националистички и неонацистички движења.

Меѓутоа, украинските медиуми во средата јавија дека веднаш кога украинска влада се обидела да ги смени и луѓето блиски на 52-годишниот Коломојски од првите функции во двете државни нафтени компании, вооружени маскирани луѓе, кои се поврзуваат со олигархот, ги заземаа просториите на компаниите „УкрТрансНефт“ и „Укрнафт“ во главниот град Киев. Во медиумските извештаи, особено на странските агенции, се истакнува дека тие сцени потсетуваат на војните меѓу украинските олигарси на почетокот од 1990-те, како и на минатогодишните заземања на државните институции во текот на прозападната револуција.

Овие настани во Киев кај западните медиуми го поттикнаа прашањето дали претседателот Порошенко е способен да ја контролира ситуацијата во земјата. Порошенко и Коломојски се сретнале доцна ноќта кон средата во кабинетот на шефот на државата, и според претседателската служба за односи со јавноста, Коломојски „поднел оставка“. „Претседателот се согласи со понудената оставка на Игор Коломојски“, се наведува во кусото цитирано соопштение од кабинетот на Порошенко./крај/мф/сн

Извор: Макфакс