Украинскиот претседател Петро Порошенко изјави во вторникот дека одлуката на рускиот претседател Владимир Путин да ја отповика резолуцијата на парламентот за употреба на војската во Украина претставува „првиот практичен чекор“ кон смирување на ситуацијата на немирниот проруски украински исток, а исто така одлуката беше поздравена од НАТО и Европската унија.
 

Украинскиот претседател Петро Порошенко изјави во вторникот дека одлуката на рускиот претседател Владимир Путин да ја отповика резолуцијата на парламентот за употреба на војската во Украина претставува „првиот практичен чекор“ кон смирување на ситуацијата на немирниот проруски украински исток, а исто така одлуката беше поздравена од НАТО и Европската унија.

„Оваа одлука е првиот практичен чекор откако рускиот претседател и официјално го поддржа украинскиот мировен план“ се вели во соопштените објавено на интернет страницата на украинскиот претседател Петро Порошенко.

Претходно во вторникот Кремљ објави дека Путин побарал до горниот дом на парламентот да ја отповика резолуцијата од 1-ви март со којашто како на врховен командант му се дозволува употреба на руските вооружени сили на територијата на Украина за заштита на руското и русофонското население. Според неговиот советник Дмитриј Песков, Путин со оваа одлука сака да ги поткрепи мировните преговори коишто треба да доведат до прекин на судирите меѓу украинската армија и проруските милиции во побунетите источни региони од земјата.

Во НАТО, исто така, оценија дека предлогот на Путин да ја поништи одлуката за употреба на вооружените сили во Украина може да претставува првиот практичен чекор на Москва кон деескалација на кризата, и повикаа на нови чекори од страна на Москва за стабилизирање на ситуацијата во Украина, изјави во вторникот портпаролката на Алијансата, Оана Лунгеску.

„Ја примивме на знаење изјавата на претседателот Путин за предлогот до рускиот парламент да го отповика овластувањето за употребата на руските вооружени сили во Украина. Го споделуваме ставот на (украинскиот претседател Петро) Порошенко, дека тоа може да се смета за првиот конкретен чекор на Русија за деескалација на ситуацијата во Украина“, изјави Лунгеску.

Истакна и дека НАТО повикува на преземање нови чекори за смирување на ситуацијата, особено за повлекување на руските војници и воената опреме од украинската граница.

„Очекуваме дека Русија ќе ги повлече војниците и воената инфраструктура од украинската граница и ќе ја прекине поддршката на вооружение сепаратистички групи, протокот на оружје и платеници преку границата, како и дека јавно да го осуди сепаратистичкото насилство во Украина во согласност со Женевскиот договор“, изјави портпаролката на НАТО.

Европската унија го поздрави чекорот на Путин за укинување на споменатата резолуција за употреба на војската во соседната земај, и се надева на брзо спроведување на овие чекори, изјави Маја Коцијанчич, портпаролката на високата претставничка за заедничка надворешна и безбедносна политика на ЕУ, Кетрин Ештон.

„ЕУ постојано ја повикуваше Русија да го укине овластувањето на Советот на Федерацијата за употреба на силите во Украина. Го поздравуваме овој чекор преземен од страна на Путин во таа насока и се надеваме дека тој ќе биде исполнет неодложно“, изјави Коцијанчич.

Истакна и дека ЕУ „исто така ја повикува Русија да го поддржи мировниот план претставен од претседателот Порошенко и да преземе активни мерки за да се запре приливот на илегални борци, оружје и опрема преку границата на Украина, да влијае врз сепаратистите да ги прекинат насилствата и да продолжи со повлекувањето на војниците од пограничните области“.

„Тоа значително ќе придонесе за деескалирањето на ситуацијата ќе го отвори патот кон политичкото решени на сегашната криза“, рече портпаролката на европската дипломатија./крај/мф/сн

Извор: Макфакс