Европа
Пратениците кои го блокираат полскиот Сејм ќе останат таму до 11-ти јануари
![](https://makfax.com.mk/wp-content/uploads/2016/12/polska.jpg)
Опозициските пратеници кои ја блокираат салата на полскиот Сејм (парламентот), ќе останат во објектот до 11-ти јануари, изјави ноќта во неделата челникот на најголемата опозициска партија Граѓанска платформа (РО), Гжегож Шетина.
Пратеникот на Граѓанска платформа, Цезар Томчик, кој се наоѓа во Сејмот, изјавил дека обезбедувањето ги информирало опозициските пратеници за незаконското престојување во зградата на парламентот на Полска. Според документот кој го претставило обезбедувањето, надвор од термините во кои се одржуваат заседанијата во пленарната сала на парламентот може да се најдат само службениците во парламентот, а не и пратениците.
„Ние нема да излеземе од салата за седници во парламентот, пратениците на Граѓанска платформа ќе бидат таму до 11-ти јануари, а можеби и подолго. Не постои можност пратениците да бидат отстранети од зградата на парламентот“, изјави челникот на опозицијата Гжегож Шетина, кого го цитира интернет изданието на весникот Rzeczpospolita.
Полската опозиција од петокот попладнето ја блокира работата на Сејмот. Причина за тоа е намерата на парламентарното мнозинство од 2017 година да ја ограничи работата на новинарите во долниот дом на парламентот, како и одлука на спикерот Марек Кухчински да отстрани еден од пратениците од седницата. И покрај тоа, парламентот продолжи да работи, и седницата ја одржа во друга сала, донесувајќи редица закони, меѓу другите и за буџетот за следната 2017 година, а опозицијата го смета за нелегитимно тоа гласање.
Претходно беше објавено дека опозициските пратеници имаат намера да останат во зградата на парламентот до 20-ти декември, кога треба да се одржи заседанието на Сенатот, горниот дом на парламентот и, како што смета опозицијата, повторената седница и гласањето во Сејмот.
Од своја страна Сејмот инсистира на законитоста на гласањето на мнозинството, а владејачката партија Правда и справедливост (PiS) не гледа причини за повторување на седмицата. На нејзиното одржување во текот на средата со полскиот претседател Анджеј Дуда во неделата, пак, инсистираа лидерите на сите опозициски партии во парламентот. Според информацијата објавена на интернет страницата на долниот дом на полскиот парламент, следното заседание е планирано за 11-ти јануари 2017 година./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Украинска политичарка застрелана во глава: „Ситуацијата е сериозна“
![](https://makfax.com.mk/wp-content/uploads/2024/07/Screenshot-2024-07-19-215957.jpg)
Непознат сторител пукал во Ирина Фарион, поранешна украинска пратеничка од крајната десница, соопштија украинските власти. Фарион (60) е хоспитализирана со прострелна рана во главата, соопшти украинската национална полиција. Нејзината состојба е „исклучително сериозна“, додаваат тие.
Полицајците се обидуваат да го идентификуваат напаѓачот, пишува Киев Индепендент. Претседателот Володимир Зеленски беше информиран за ситуацијата од страна на министерот за внатрешни работи и шефот на Службата за безбедност на Украина (СБУ).
„Секое насилство е за осуда и кој и да е одговорен мора да ги сноси последиците“, рече Зеленски.
Ирина Фарион, која е позната по нејзините контроверзни изјави за употребата на рускиот јазик во Украина, се приклучи на ултранационалистичката партија Свобода во 2005 година и беше пратеник во парламентот меѓу 2012 и 2014 година.
Во јуни 2024 година, таа беше вратена како професорка на Катедрата за украински јазик на Политехничкиот универзитет во Лавов, набргу откако беше отпуштена. Фарион предизвика бес кога на 6 ноември рече дека не може да ги нарекува украинските војници украински ако зборуваат руски.
Скандалот околу нејзините изјави ескалира откако таа наводно добила порака за поддршка од Максим Хлебов, проукраински студент кој живее на окупираниот Крим. Таа го објави мејлот на своите социјални мрежи, по што наиде на остри критики.
Службата за безбедност на Украина (СБУ) во ноември 2023 година соопшти дека Фарион е под кривична истрага и за нејзините изјави за војниците кои зборуваат руски и за протекувањето на пораката на Хлебов.
Европа
Русите нудат парична награда за првиот уништен Ф-16
![](https://makfax.com.mk/wp-content/uploads/2024/07/ruski-vojnik.jpg)
Руски фирми нудат парични награди за уништување на F-16 Fighting Falcons, охрабрувајќи ја својата војска да ги уништи западните авиони кои наскоро ќе се појават над небото на Украина.
Ова првпат беше објавено на каналот Телеграм на руското Министерство за одбрана на почетокот на оваа недела.
„Ќе има награда за уништување на борбените авиони Ф-15 и Ф-16. Наградата за првиот ќе биде 15 милиони рубли“, се вели во објавата, цитирајќи го директорот на руската нафтена компанија ФОРЕС Илја Потанин.
Инаку, 15 милиони рубљи се еднакви на околу 170.000 долари или околу 155.500 евра.
Министерството за одбрана соопшти дека се понудени и парични награди од 500.000 рубљи за уништување на тенковите на НАТО во Авдиивка, пренесува „Њузвик“.
На приложеното видео во објавата на Телеграм, може да се видат руски војници како добиваат награди и се ракуваат со нивните претпоставени офицери.
Европа
Зеленски ја моли новата британска влада: „Дозволете ни да ја нападнеме Русија со моќни ракети“
![](https://makfax.com.mk/wp-content/uploads/2024/07/Screenshot-2024-07-19-194232.jpg)
Украинскиот претседател Володимир Зеленски денеска им се обрати на министрите на новата британска влада, на покана на премиерот Кир Стармер, и го повтори апелот до западните сојузници да дозволат напади врз Русија со ракети со долг дострел.
Зеленски е првиот странски лидер кој лично се обратил пред британскиот кабинет откако поранешниот американски претседател Бил Клинтон го стори тоа во 1997 година.
Украинскиот претседател рече и дека Британија треба да ги убеди своите партнери, кои зазедоа различни позиции за тоа како Украина може да го користи оружјето што им е доставено, да ги укинат ограничувањата за употреба на оружје и муниција.
„Во моментов го немаме главниот одговор на тоа прашање, што се однесува на нашите долгорочни можности. Ве молиме, убедете ги другите партнери да ги укинат овие ограничувања“, рече Зеленски.
Стармер му рекол на Зеленски дека Британија ќе ја забрза испораката на клучната помош за Украина, откако неговиот министер за одбрана на почетокот на овој месец потврди дека помошта ветена од претходната конзервативна влада ќе биде доставена за 100 дена.