Повеќе илјади луѓе протестираа во саботата во француските градови против вонредната состојба воведена по терористичките напади од 13-ти ноември во Париз кога беа убиени 130 луѓе, како и против владиниот предлог на сторителите на терористичките напади да им се одземе државјанството, поради што во средата оставка поднесе министерката за правда.

Социјалистичката влада на претседателот Франсоа Оланд усвои закон за вонредна состојба по ноемвриските исламистички напади, и тие мерки планира да ги продолжи и на следните три месеца по истекот на првиот рок во февруари.

Противниците на таквата одлука тврдат дека зголемените овластувања на полицијата и ограничувањата, како што се јавните собири, ѝ нанесуваат штета на демократијата, како и дека се неефикасни во борбата против терористичките закани. Дебатата во француската јавност се интензивираше откако владата изнесе план за одземање на државјанствата на сторители во терористички напади.

Во Париз се собрале најмногу демонстранти, според процените на полицијата 5.500, додека според организаторите 20.000. Помали протести се одржаа во Тулуз и во Марсеј, во рамките на демонстрациите планирани во седумдесетина француски градови.

Резултатите од една анкета покажуваат дека мнозинството Французи ја поддржуваат социјалистичката влада кога станува збор за вонредните мерки и одземањето на државјанството на лица вмешани во терористички напади, но таквите замисли ги разгневија некои политички сојузници од лева провиниенција, а министерката за правда Кристиане Тобира поради несогласување со најавените реформи поднесе оставка.

Француската влада уште на почетокот од ланскиот декември најави дека сака во Уставот да внесе одредба со којашто се овозможува воведување вонредна состојба во земјата „во текот на максимално траење од шест месеци“. Преднацртот од законот за проширување на времетраењето на вонредната состојба во Франција беше предаден во државниот совет поради ревизија на Уставот, по џихадистичките напади од 13-ти ноември во Париз.

Вонредната состојба Оланд ја објави само неколку часа по нападите, а парламентот ја продолжи за три месеца, до 26-ти февруари.

Со оваа уставна реформа се сака да се воведе „цивилен кризен режим“ за да се дејствува „против воениот тероризам“, појасни претседателот Оланд на 16-ти ноември.

Со сегашниот Устав е предвидено опсадна состојба но не и вонредна. Со законот од 1995 година траењето на вонредната состојба е ограничено на 12 дена. Продолжувањето на вонредната состојба повеќе од 12 дена може да се одобри само со носење закон за кој гласа парламентот кој го одредува неговото конечно траење.

Вонредната состојба на француските власти им овозможува да „забранат промет на лица и возила“, да прогласи „заштитени или безбедносни зони каде движењето на лицата е регулирано“ и забранува престој на некои подрачје на „секое лица кое би ги попречувале на кој и да е начин дејствувањето на јавните власти“.

Вонредна состојба во Франција е воведувана неколкупати во текот на Алжирската војна, од ноември 1954 година до март 1962 година, и потоа е прогласена само уште двапати, во 1985 година во Нова Каледонија за време на судирите на овој француски остров во Тихиот Океан и во 2005 година кога доселеничките предградија на француските градови беа зафатен од безредија./крај/мф/сн

Извор: Макфакс