Изјавата на британскиот премиер Дејвид Камерон дека од излегувањето на неговата земја од Европската унија, за што се решија неговите сонародници на референдумот од 23-ти јуни, „ќе биде среќен Путин“, е некоректен обид да се влијае врз јавното мнение во Велика Британија, изјави рускиот претседател Владимир Путин во текот на неговата посета на Ташкент.

„Мислам дека тоа не претставува ништо повеќе од погрешен обид да се влијае врз јавното мнение во својата земја. Но, како што гледаме, дури ни тоа немаше важност за оние кои го сторија тоа – резултатите. А уште повеќе, по гласањето да се изјавува за некаква позиција на Русија, според мое мислење, никој нема право. Тоа не ништо друго освен манифестирање на ниско ниво на политичка култура“, одговори Путин на изјавата на британскиот премиер кој заговараше останување на земјата во ЕУ, пренесува агенцијата ТАСС.

Потсети дека Русија никогаш не се мешаше и никогаш не се изјаснуваше во врска со референдумот за истапување на Велика Британија од Европската унија.

„Сметам дека се однесувавме многу коректно, внимателно следевме што се случува, но со ништо не влијаевме на тој процес, ниту се обидовме тоа да го правиме“, рече Путин.

Минатата седмица во текот на Меѓународниот економски форум во Санкт Петербург, запрашан од водителот на панелот новинар на американската телевизија CNN, за британскиот референдум за излегувањето или останувањето во Европската унија, Путин рече дека има свое лично мислење за тоа прашање, но дека нема да го изнесува јавно.

Ден по референдумот, Путин на прес-конференцијата во Ташкент додаде дека изјавите на Камерон немале и немаат никаква основа.

„Тоа е избор на граѓаните на Велика Британија. Ние со ништо не се вмешавме и немаме намера да се мешаме. Но судејќи според сé, сега следат формалните процедури поврзани со британската одлука да се повлечат од ЕУ. Тоа внимателно ќе го следиме и ќе анализираме“, рече Путин.

Рускиот челник уверува дека руските власти ќе настојуваат да ги минимизираат евентуалните негативни ефекти од одлуката на Велика Британија врз економијата на земјата.

Според Путин, исходот од британскиот референдум е одраз на незадоволството од безбедносните состојби и неподготвеноста да се помагаат другите економии.

„Разбирлив е таквиот епилог од аспект на обичните британски граѓани. Никој не сака да храни и субвенционира послаба економија, да се одржуваат други земји и цели народи“, рекол претседателот на Русија.

„Очигледно, луѓето се незадоволни, исто така, и од решавањето на проблемите во сферата на безбедноста, кои денес остро се влошуваат во заднина на миграциските процеси … Луѓето сакаат да бидат понезависни“, додал Путин.

Оценил дека последиците од британското излегување од ЕУ ќе имаат глобален карактер, но и дека времето ќе покаже дали тие ќе бидат позитивни или негативни.

„За Велика Британија, Европа и за нас, се разбира, тоа ќе има последици. Тие ќе имаат глобален карактер, тие се неизбежни, тие ќе бидат и со знакот ’пулс’ и со ’минус’… Пазарите ќе трпат, и веќе потонаа, но во среднорочна перспектива, дефинитивно, ќе има опоравување“, убеден е Путин. „Дали ќе има повеќе плусови или минуси, ќе покаже животот, практиката“, додал.

Притоа истакнал дека „самата организација на референдумот и потоа добиените резултати, не се резултат на ништо друго туку на преголема самоувереност и површен пристап кон решавањето на судбоносните прашања за својата земја и севкупно за Европа, од страна на британските челници“./крај/мф/сн

Извор: Макфакс