Европа
Путин порача дека Русија ќе реагира на влезот на Финска во НАТО

Рускиот претседател Владимир Путин во текот на неговата посета на соседната Финска во петокот порача дека доколку оваа земја влезе во НАТО, руските трупи најверојатно нема да останат повлечени на 1.500 километри од заедничка граница, но истакна и дека е наклонет кон запирање на воените летови без вклучени транспордери за идентификување на авионите над Балтичкото Море, што се толкува како знак на примирување на тензичниот контекст меѓу Русија и нејзините соседи членки на Алијансата и силите на САД стационирани на нејзините граници.
„Претпоставете си Финска да влезе во НАТО. Тоа значи дека финската армија престанува да биде независна, престанува да биде суверена во целосната смисла на зборот. Тие единици ќе станат дел од воените структури на НАТО, кои преку ноќ ќе се појават на границите на Русија“, изјавил рускиот челник Владимир Путин на заедничката прес-конференција со финскиот претседател Саули Ниинисто
Финскиот челник притоа рекол дека земјите од Балтик чувствуваат страв од Русија, но и дека Москва од своја страна го гледа НАТО како „голема закана“.
„Дали мислите дека ќе се воздржиме од дејствување,… ги повлековме нашите војски на 1.500 километри, дека таму и ќе останат?“, додал рускиот челник потсетувајќи на одлуката на Москва да ги повлече своите единици на споменатата дистанца од финско-руската граница.
„Досега тоа не е променето, така и останува. А на нашите граници на Балтикот се зголемува војската на НАТО. И што треба тогаш ние да правиме?“, запрашал Путин.
Според Путин, НАТО, најверојатно, радо би војувал со Русија до последниот фински војник. „Дали тоа ви е потребно? Нам не. Ние не сакаме. Но вие сами решавате што за вас е потребно“, додал рускиот претседател.
Истовремено истакнал дека Москва ќе го почитува секој избор на финскиот народ за влез во НАТО.
Финска дели со Русија граница долга 1.340 километри. Иако не е членка на НАТО, финска делегација ќе присуствува на следниот самит во полската престолнина Варшава кој ќе се одржи на 8-ми и 9-ти јули.
Финска гледа во задржувањето на својата неутрална традиција најдобар начин да ги задржи добрите односи со Русија, но нејзините војски редовно учествуваат во воените вежби со силите на транантлатската организација.
Според Путин, Русија има намера да започне дијалог со Алијансата на самитот во Брисел во рамките на Советот НАТО-Русија.
„Господинот претседател (на Финска –з.р.) денеска ги формулираше предлозите за минималните први чекори во насока на зголемување на довербата, спречување на конфликтните ситуации. Веќе имам кажано дека со согласен со тоа, ќе се обидеме да го започнеме дијалогот со НАТО на самитот во Брисел“, нагласил Путин.
Уште еднаш во помалку од две седмици истакнал дека Москва соодветно ќе одговори на разместувањето на американскиот антиракетен штит во земјите членки на НАТО, како Полска, кои граничат со неа и зголемувањето на контингентите на Алијансата, бидејќи тоа претставува очигледна закана за Русија.
Финска последните години е загрижена од зголемувањето на бројот на инцидентите во кои се вклучени руски и американски, како и авиони и бродови на други членки на НАТО. Во ткн „бела книга“ објавени во јуни, финската влада наведе дека не може да исклучи воена агресија од својот моќен јужен сосед.
„Го прифаќаме предлогот на финскиот претседател за прекин на летовите без вклучен транспордер и ќе потсетам на тоа прашање во текот на следната средба на Русија и НАТО во Брисел“, изјавил Путин за новинарите по средбата со колегата Ниинисто во Наантали.
„Русија никогаш не предизвикува тензии. Над Балтичкото Море има двапати повеќе летови на авионите на НАТО отколку руски летови. Ние не ги измисливме тие податоци, тоа се статистики“, додал рускиот претседател на прес-конференцијата и потсети на неколку скорешни случаи кога воени летови на НАТО и на американски авиони беа изведувани без вклучени тренспордери при обидите да се приближат неиндентификувани кон рускиот воздушен простор, понекогаш претставувајќи опасност и за цивилните летови во тие пространства./крај/мф/сн
Извор: РИА/AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски: Подготвени сме да купиме 10 системи „Патриот“, само треба да најдеме средства

Украина работи на обезбедување испорака на десет системи за воздушна одбрана „Патриот“, а исто така е важно системите веднаш да пристигнат со ракетите, изјави украинскиот претседател Володимир Зеленски, како што објави УНН.
„Имаме барање за десет системи. Ова го кажав јавно. Моментно работиме со партнери за да ги обезбедиме овие десет. Исто така, работиме на прашањето за ракетите, ги имаме“, рече Зеленски.
Украинскиот претседател додаде и дека САД ќе ѝ продадат системи „Патриот“ на Украина. Украина мора да најде средства за сите десет системи.
„Трамп, претседателот на САД, ќе ни ги пренесе системите, ќе ни ги продаде. Наша задача е да најдеме пари за сите десет системи. Би сакале веднаш да имаме пакет ракети за секој систем“, истакна претседателот.
Тој исто така истакна дека Германија моментно ја потврдила испораката на два система „Патриот“, а Норвешка – еден.
„Официјално добив потврда од Германија за два система, од Норвешка – еден. Сега работиме со холандски партнери“, додаде Зеленски.
Фото: принтскрин
Европа
(Видео) Макрон тужи американска конзервативка, која тврди дека Брижит е маж

Францускиот претседател Емануел Макрон и неговата сопруга Брижит поднесоа тужба против Американката Кандис Овенс поради тврдење дека првата дама на Франција е, всушност, маж.
Тужбата е поднесена во американската држава Делавер и содржи 22 точки од обвинението, а двојката бара парична отштета за клевета и отштета.
Кандис е конзервативна авторка, водителка, политички коментатор и активистка. Таа е позната по својата активна поддршка на Трамп за време на неговиот последен мандат. Сепак, неодамна јавно се дистанцира од него. Таа постојано изјавуваше дека тој ја разочарал и дека сега „се срами што некогаш го поддржувала“. Таа ги критикува неговите политички потези и го обвини дека ги предаде принципите што тој вети дека ќе ги брани.
Според адвокатот на Макрон, Том Клер, францускиот претседател и неговата сопруга повеќе од една година безуспешно се обидуваат да ја спречат Овенс, која шири теории на заговор за Брижит на социјалните медиуми и на „Јутјуб“.
Во март оваа година Овенс објави видео со наслов „Дали првата дама на Франција е маж?“, кое беше масовно споделувано на платформата „Икс“. Во него таа тврдеше дека тоа е „најголемиот политички скандал во историјата“.
Потоа таа продолжила да објавува содржини за Брижит вклучувајќи серија видеа наречени „Станувајќи Брижит“. Таа исто така продавала маички со слогани што ја промовираат теоријата, според тужбата. Емануел и Брижит тврдат дека Овенс била повеќе пати замолувана да престане да ги изнесува овие тврдења и ѝ дале докази дека Брижит е родена како жена по име Брижит Троње, дека не е во роднинска врска со Емануел Макрон и дека тие не се под никакво влијание, како што инсинуира Овенс.
„Ова не е само политички удар. Ова е лично. И двајцата се човечки суштества, имаат брак, семејства и чувства. И ова ги засега“, изјави адвокатот Клер за Си-ен-ен.
Во тужбата се тврди дека Макрон и неговата сопруга претрпеле сериозни штети – нивната приватност, углед и деловните можности биле нарушени. „Секојпат кога ќе ја напуштат куќата, тие знаат дека многу луѓе веруваат во овие лаги. Тоа е понижувачки, инвазивно и, едноставно, неправедно“, се вели во документот.
Овенс сè уште продолжува
Кога дознала за тужбата, Овенс се појавила на „Јутјуб“. Таа објавила видео, во кое, меѓу другото, рекла дека е подготвена да ја добие оваа војна. „Мажот Брижит очигледно има многу храброст“, рекла таа.
Таа исто така објави фотографија од двојката Макрон на „Инстаграм“ со порака: „Денес ќе ја земам оваа перика. Останете со мене“. Подоцна, на „Јутјуб“ изјави дека тужбата е „очаен обид да се спаси нејзиниот имиџ“.
Брижит Макрон се соочила со слични обвинувања и претходно – во 2022 година таа тужеше две жени во Франција, кои ширеа слични дезинформации. Првично ја доби пресудата, но случајот сега е вратен на повисок суд.
Фото: принтскрин
Европа
(Видео) Се урна патнички авион во Русија

Авион „ан-24“ на „Ангара ерлајнс“, со најмалку 40 патници, се урна во руската област Амур, на далечниот исток од земјата.
Остатоците од патничкиот авион се пронајдени на 15 километри од Тинда, планираната дестинација. SHOT објаснува дека хеликоптерот за пребарување не можел да слета во близина на местото на несреќата, па затоа спасувачите ќе мора да стигнат таму пеш.
✈️🚨 Passenger plane crashes in Russia’s Amur region — over 40 people on board
A Soviet-made Antonov An-24 aircraft operated by Angara Airlines disappeared from radar near the town of Tynda while attempting a second landing approach. Emergency crews later found the burning… pic.twitter.com/MOO08NTbEP
— NEXTA (@nexta_tv) July 24, 2025
„РИА новости“, повикувајќи се на извори, пишува дека, според прелиминарните податоци, нема преживеани.
Гувернерот на регионот, Василиј Орлов, изјави дека, според прелиминарните податоци, во авионот имало 43 патници, меѓу кои пет деца и шест члена на екипажот.
Министерството за вонредни ситуации го процени бројот на луѓе во авионот малку помал, на 40-ина.
Фото: принтскрин