Русија во четвртокот го одби предлогот на Киев на истокот од Украина да бидат распоредени мировни сили со мандат на Обединетите нации, појаснувајќи дека темел за решавање на судирот со рускојазичните бунтовници на одметнатиот исток треба да биде мировниот договор од 12-ти февруари постигнат во белоруската престолнина Минск, на кој гаранти се јавуваат челниците на Украина, Русија, Франција и Германија.

Портпаролот на руското министерство за надворешни работи , Александр Лукашевич, исто така, додаде дека одговорноста за спроведувањето на Минскиот мировен договор, во прв ред, паѓа врз Киев.

Украинскиот претседател Петро Порошенко повика на разместување полициски сили на Европската унија со мандат на ОН поради надзор на спроведувањето на примирјето во источна Украина, што веднаш беше одбиено од страна на бунтовниците повикувајќи се на одредбата од договорот во Минск со којашто самопрогласените ткн „народни републики“ во Донецк и Луганск кои ќе добијат специјален статус, односно поширока автономија, треба да формираат свои сили (милиции) коишто ќе се грижат за зачувување на редот во тие области.

Украинскиот Национален совет за безбедност и одбрана на итната седница во средата доцна вечерта му даде поддршка на предлогот на претседателот Порошенко, истакнувајќи дека Киев е загрижен за развојот на ситуацијата особено откако со заземањето на стратешки важниот град Дебалцево од страна на бунтовниците, украинските сили се отфрлени далеку од територијата што ја контролираат проруските сили.

„Полициските сили на ЕУ го сметаме за најдоброто решение (…) кое ќе гарантира безбедност, во ситуација која примирјето не го почитува ниту Русија, ниту оние кои таа ги поддржува“, рече Порошенко.

Притоа Порошенко, кој ја обвинува Москва дека на бунтовниците им испраќа вооружување и војници, смета дека Русија не може да учествува во мировната мисија, бидејќи била „агресорска земја“.

Одговарајќи ми во четвртокот Лукашевич истакна дека единствен пат да се постигне напредок е минатонеделниот мировен договор. „Основа за постигнување на конечното решение на украинската криза би требало да биде договорот од Минск од 12-ти февруари“, порача рускиот дипломат.

Заменикот на генералниот секретар на дипломатската служба на ЕУ, Мациеј Поповски изјави во Брисел дека треба да се појасни мандатот за кој потоа би расправале земјите членки.

„Нашиот приоритет во моментов е спроведувањето на договорот од Минск. Во Украина се присутни цивилни советници на ЕУ, советничка мисија на Унијата, но таа работи на градење на институциите и реформите во министерството за внатрешни работи и во полицијата“, рече Поповски./крај/мф/сн

Извор: Reuters/РИА Новости