Русија на традиционалната воена парада којашто ќе биде приредена на 9-ти мај по повод 70-годишнината од победата над фашизмот и нацизмот ќе го прикаже тенкот од најновата генерација „Т-14 Армата“, кој од западните воени експерти доби високи оцени, а западните медиуми во вторникот посветија забележително внимание на неговото претставување.

Руското министерство за одбрана на својата интернет страница објави фотографии на тенкот направени за време на вежбањето на парадата којашто ќе се одржи на Црвениот плоштад во Москва. Тенкот „Армата“ е еден од неколкуте вооружени системи коишто ќе бидат прикажани првпат во јавноста.

Стручњаците сметаат дека „Т-14“ во моментов според техничките карактеристики, може истовремено да гаѓа повеќе различни цели, е најмоќниот и „најсмртоносен“ тенк во моментов во светот. „Армата“, како и другите современи оклопни возила, треба да го демонстрираат големиот технолошки исчекор на руската воена индустрија, во споредба со моделите правени според образецот од советската ера. Новиот „Т-14“ е фундаментално нов модел и ги покажува најзначајните промени во генерацијата тенкови која започна во 1960/1970-те, пишува специјализираниот портал IHS Jane’s Defence Weekly.

Воени експерти за BBC велат дека станува збор за „повеќенаменска борбена платформа“, бидејќи на трупот на тенкот може да се монтираат разно оружени системи. Новина кај „Армата“ (руската ознака е 148), е тоа што во куполата повеќе нема никој, туку само двата до три члена на екипажот се сместени во засебен засилен и оклопен дел од трупот и управуваат со вооружувањето и тенкот преку далечински команди.

Телевизијата Звезда, која е телевизиски канал на руското министерство за одбрана, тврди дека овој борбен тенк може да се развие во „целосно роботизирано борбено возило“, како и дека електрониката, брзината и маневарските способности на „Армата“, се далеку подобри од оние кај „Т-90“, главниот борбен тенк во составот на руските воени сили. Руските експерти, кои го нарекуваат „супер тенк“, велат дека „Армата“ ако не е подобар, тогаш е рамо до рамо со германските „Leopard-2“ или американските „Аbrams М1А2“, од првата половина на 1990-те.

Главното вооружување на тенкот е топот со калибар до 125 милиметри, од чијашто мазна цевка може да бидат истрелувани и наведувани противоклопни ракети. Тенкот е засилен со 30-милиметарски автоматски топ, кој може да се користи како противавионско оружје, додека против лесни оклопни цели ќе го користи 1,7 милиметарски митролез. Покрај тоа, „Армата“ може да биде опремена и со топ со калибар од 152 милиметри, со што би го добила најмоќното оружје кое некогаш е монтирано на тенк, велат специјалистите.

Прототипот на „Армата“ беше првпат прикажан на изложба на воена опрема во 2013 година, но на парадата се очекуваат 10 или 24 примероци од овој тенк со различни борбени системи. Според извештајот на BBC, Русија има намера да произведе 2.300 нови тенкови од моделот „Т-14“, кои би требало да ги заменат оние коишто во моментов се во активниот состав.

Според страницата на руското министерство за одбрана, на парадата по повод Денот на победата, ќе бидат прикажани повеќе од 140 модели на воена опрема од нив по 10 тенкови и други модели на „Армата“, како и самоодните артилериски системи од новата генерација „Коалиција-СВ“. Покрај тоа, во парадата ќе учествуваат околу 15 илјади луѓе, а Црвениот плоштад ќе го надлетуваат 140 хеликоптери и авиони и се смета дека ќе биде најголемата досега.

Меѓутоа, иако беа поканети вооружените сили на САД нема да учествуваат во парадата, додека Кина во вторникот го потврди своето учество. Повеќето западни челници нема да присуствуваат на прославата во Москва на Денот на победата, како знак на протест поради наводната улога на Русија во украинска криза./крај/мф/сн

Извор: Макфакс