Европа
Само 11 отсто од Французите би гласале повторно за Оланд

Министерот за економија Емануел Макрон, кој неодамна си поднесе оставка од должноста, во секој случај ќе биде подобро пласиран од актуелниот претседател Франсоа Оланд во првиот круг од претседателски избори пролетта следната година, објави парискиот дневен весник Le Figaro според резултатите од анкетата на компанијата за истражување на јавното мнение TNS Sofres-Onepoint.
Во истражувањето се наведени неколку можни сценарија на настаните во првиот круг од француските претседателски избори кој е планиран за 23-ти април 2017 година. Во секое од овие сценаријата се претставени различни варијанти на претседателските кандидати.
Според едното од сценаријата во анкетата во првиот круг од изборите 16 отсто од испитаниците имаат намера да гласаат за Емануел Макрон како кандидат на левицата, а само 11 отсто за актуелниот претседател од владејачката Социјалистичката партија Франсоа Оланд,
Во ваквото сценарио анкетата покажала дека 26 отсто од испитаниците би гласале за челничката на партијата од крајната десница Национален фронт, Марин Лепен, а 20 проценти за поранешниот француски претседател Николас Саркози, кој најверојатно ќе биде кандидат на конзервативната партија Републиканци.
И според другите претпоставени сценарија, Оланд заостанува зад Макрон за 6 или 4 отсто.
Анкетата била спроведена по нарачка на весникот Le Figaro и телевизискиот канал LCI од 2-ри до 5-ти септември над малку повеќе од илјада испитаници.
Францускиот министер за економија Емануел Макрон, на крајот од август поднесе оставка, со што си отвора пат за можна претседателска кандидатура. Овој 37-седумгодишен поранешен инвестициски банкар, е еден од најпопуларните француски политичари во моментов.
Меѓутоа, министерот Емануел Макрон не рече веднаш дека ќе се кандидира за претседателските избори, туку оти ќе се ангажира на „нов проект“ за доброто на земјата. Макрон, меѓутоа, откако ја напушти владата основаше своја партија.
Од опкружувањето на Макрон објавија дека тој нема да ја објави својата претседателска кандидатура веднаш. Неговата нова партија прво ќе спроведе кампања „од врата до врата“ за да го испита мнението на избирачите и ќе ги собира нивните поплаки на француската политика до крајот на септември./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Кремљ: Путин ќе разговара со Трамп

Кремљ потврди дека специјалниот пратеник на американскиот претседател Доналд Трамп, Стив Виткоф, се сретнал со рускиот претседател Владимир Путин за време на вчерашната посета на Москва.
Портпаролот на Кремљ, Дмитриј Песков, изјави дека рускиот претседател и Виткоф се согласиле за потребата од разговор меѓу Трамп и Путин, но точниот датум сѐ уште не е договорен.
„Точното време на разговорот меѓу двајцата претседатели сѐ уште не е одредено“, изјави Песков за новинарите.
„Откога господинот Виткоф ќе му ги пренесе на својот претседател сите информации што ги добил во Москва, тогаш ќе одредиме време за разговор“, додаде тој.
Песков исто така за новинската агенција ТАСС изјави дека двете страни „разбираат дека е неопходен разговор меѓу претседателите“.
Европа
ЕУ ќе ги продолжи санкциите кон Русија и покрај унгарските закани

Високи дипломати на Европската Унија утринава се согласија да ги продолжат санкциите против речиси 2.000 руски граѓани, вклучително и претседателот Владимир Путин, многу високи политичари и бизнисмени.
Санкциите, кои мора да се обновуваат едногласно на секои шест месеци, остануваат во сила до 15 септември 2025 година.
По заканата на Унгарија дека ќе стави вето на списокот, четири лица беа отстранети од списокот, а три лица, кои неодамна починаа, исто така беа избришани, велат извори од ЕУ.
Банкарскиот и енергетски тајкун Михаил Фридман, кој делумно ја доби правната битка против санкциите на ЕУ минатиот април, останува на листата, велат изворите.
Европа
Американското разузнавање: Путин нема намера да се откаже од освојување на Украина

Рускиот претседател Владимир Путин не се откажува од својата цел да ја контролира Украина и покрај напорите на САД да посредуваат за прекин на огнот, објави „Вашингтон пост“ повикувајќи се на извори запознаени со доверливите извештаи на американските разузнавачки служби.
Според еден американски функционер, Путин и понатаму има „долгогодишна желба да ја обнови мајката Русија и останува решен да воспостави контрола над Киев. Оваа процена беше меѓу разузнавачките извештаи дистрибуирани до администрацијата на американскиот претседател Доналд Трамп на 6 март.
Некои официјални лица веруваат дека дури и ако Русија се согласи на привремен прекин на огнот, Москва би ја искористила паузата за повторно да се вооружи, да го прекрши договорот и да изврши провокации, кои потоа ќе ѝ ги припише на Украина.
Пред три дена, за време на преговорите во Џеда, Украина се согласи на 30-дневен прекин на огнот под услов и Русија да го стори тоа. Овој договор го поттикна Вашингтон да ја обнови воената и разузнавачката поддршка за Киев.
Путин вчера изјави дека Русија е подготвена да го прифати американскиот предлог за прекин на огнот, но само доколку Украина ги прекине мобилизацијата, воената обука и увозот на оружје.
Украинскиот претседател Володимир Зеленски ги отфрли условите на Путин како руска манипулација и повика на построги санкции против Москва.
Трамп, кој претходно предупреди на погубни финансиски последици за Русија доколку војната се одолжува, вчера изјави дека изјавата на Путин е „многу ветувачка“, но „не е целосна“.
Европски разузнавач изјави за „Вашингтон пост“ дека Москва го гледа Трамп како слаб, непринципиел и потенцијално подложен на манипулации врз основа на неодамнешните разузнавачки информации.
Ако се постигне траен прекин на огнот, Русија, најверојатно, ќе се врати на хибридните методи, пропагандата, економскиот притисок и сајбер-нападите што ги користеше против Украина пред нејзината инвазија во 2022 година, додаде функционерот.
Американските власти и понатаму се внимателни во процената на можните мировни услови што Путин би можел да ги прифати, но тие не гледаат индикации дека тој се откажал од своите напори да го врати Киев под руско влијание.
Западни безбедносни извори претходно за „Блумберг“ изјавија дека Путин поставил максималистички барања во врска со територијалните отстапки, мировните сили и украинската неутралност, свесен дека овие услови се неприфатливи за Киев и европските земји.