Нотбукот со доверливи материјали е украден од автомобилот на директор на унгарската нуклеарна централа „Пакш“, пишува во саботата будимпештанскиот весник Blikk.

Доверливите материјали во врска со планираното проширување на нуклеарната централа „Пакш“, се наоѓаат во раце на непознати лица, пишува весникот. Повикувајќи се на свои извори од унгарската влада, Blikk натаму пишува дека инцидентот се случил во мај во Будимпешта. Директорот на нуклеарната централа, чиј идентитет не се открива, излегол од своето возило на кратка средба во еден локал, а на задното седиште на автомобилот ја оставил торбата со нотбукот и уште неколку преносни носачи на податоци. Откако по само неколку минути се вратил до автомобилот, торбата веќе ја немало.

Во овие уреди, според сознанијата на весникот, имало документи и материјали кои биле со висок степен на доверливост, и се однесувал на планираното проширување на капацитетите на унгарската нуклеарна централа „Пакш“. Директорот веднаш ја пријавил кражбата во полицијата и во разузнавачките служби, но досега исчезнатите работи не се пронајдени.

Службата за односи со јавноста на унгарската влада одбила да го коментира инцидентот. Според адвокатот Роберт Фридман, поради губењето на класифицираните документи, на директорот на нуклеарката му се заканува до тригодишна затворска казна.

Единствената унгарска нуклеарна централа „Пакш“ се наоѓа во близина на истоименото гратче, околу сто километри од главниот град Будимпешта. Таа е изградена во 1970/1980-те години според советски проект, и има четири реактора од типот ВВЭР-400. Електричната енергија произведена во неа има удел од речиси 50 отсто во енергетскиот баланс на Унгарија.

Оваа централа беше во центарот на вниманието од избувнувањето на украинската криза и крајното заладување на односите меѓу Европската унија, чија членка е и Унгарија, и Русија, бидејќи конзервативниот унгарски премиер Виктор Орбан и покрај препораките на Брисел и Вашингтон продолжи да соработува со Москва на полето на енергетиката, вклучително и плановите за новиот гасовод „Турски тек“.

Така во декември 2014 година Орбан и рускиот претседател Владимир Путин потпишаа договор за изградба на петтиот и шестиот блок на нуклеарката „Пакш“, на база на технологијата на руската технологија ВВЕР-1200, чијашто изградба треба да започне во 2018 година. Претходно во март истата година меѓу Русија и Унгарија беше потпишан договор за заем во вредност од 10 милијарди евра, наменет за изградба и пуштање во експлоатација на двата нови блока на „Пакш“. Во март 2015-та, пак, унгарскиот парламент изгласа ограничување на достапноста до 30 години до комерцијалните или технички податоци за проширување на капацитетите на нуклеарната централа./крај/мф/сн

Извор: Blikk