Француската полиција утврдила поврзаност на сторителот на терористичкиот напад од петокот со Сирија, меѓутоа директните мотиви за злосторството сé уште не се јасни.

Јасин Сали, француски државјанин кој се смета за џихадисти признал дека го убил и му ја отсекол главата на својот работодавач, а испратил селфи фотографии во Сирија коишто ги сними со отсечената глава на жртвата, со која бил во кавга. Претходно во неделата беше откриено дека таквите фотографии од својот мобилен телефон Сали ги испратил на број во Канада, но постоеја сомневања дека станува збор за посреден број, пред пораката испратена преку сервисот whatsapp да биде пренасочена до друга дестинација.

Грозоморната фотографија, како што утврдиле иследниците, била испратена всушност во ирачко-сириските џихадистички зони и сметаат дека преку неа го идентификувале францускиот џихадист кој е меѓу 473-цата кои во моментов се наоѓаат на тамошните боишта. Станува збор за маж кој е идентификуван на Себастиен Јуне кој во ноември 2014 година отпарувал во Сирија, во покраината Рака, каде што требало да се бори во редовите на Исламската држава, според извори од истрагата.

Засега ниеден извор не покажал дека и самиот 35-годишне Јасин Сали патувал во Сирија, иако француските разузнавачки служби го ставиле под надзор во периодот меѓу 2006 и 2008 година, поради негово радикализирање. Бил осомничен дека одржува врски со радикалното салфистичко движење, но случајот бил отфрлен во 2008 година.

Сали беше уапсен во петокот во близина на Лион додека се подготвувал да го крене во воздух хангарот во постројката за индустриски гас во сопственост на американска компанија. Осомничениот го признал убиството на единствената жртва во овој напад, својот работодавец 54-годишниот Ерве Корна.

Иако извршувањето на злосторството и испраќањето на споменатата снимка наликува на егзекуциите коишто ги извршуваат џихадистите на Исламската држава, првите елементи од истрагата откриени во неделата упатуваа и на можноста дека во изборот на жртвата има и лична димензија, Имено, два дена пред убиството, Сали кој работел како доставувач, испуштил вреден материјал, според сведоштвото на еден колега, на што му приговорил Корна, кој инаку бил шеф на транспортна фирма, по што дошло до кавга.

Во понеделникот продолжува испрашувањето на Сали во седиштето на француската антитерористичка полиција во близина на главниот град Париз, и неговиот притвор може да трае 96 часа пред да биде изведен пред судија. Неговите сопруга и сестра, коишто исто така беа уапсени во петокот, во меѓувреме се пуштени на слобода./крај/мф/сн

Извор: AFP