Европа
Во CSU не мина предлогот за повлекување на поддршката за нова кандидатура на Меркел

Предлогот да биде повлечена поддршката за германската канцеларка Ангела Меркел која е и челник на Христијанско-демократска унија (CDU) за новата можна кандидатура за шефица на германската влада, не мина на конгресот на баварската сестринска партија Христијанско-социјална унија (CSU), пренесе во саботата германската новинска агенција DPA.
Предлогот CSU да ѝ ја повелече поддршката на Ангела Мерел за нов мандат на должноста канцелар не наиде на одѕив од мнозинството. Со него беше критикувана политиката на Меркел на отворени врати за барателите на азил кои минатата година овозможи влегување во Германија на околу 900.000 мигранти.
Тоа, пак, предизвика јакнење на евроскептичната и антидоселеничка партија алтернатива за Германија (AfD) што резултираше со порази на CDU на неколку покраински избори годинава, и беше причина за споменатиот предлог во CSU, пред изборите кои ќе се одржат идната година.
Меркел досега повеќепати го одложуваше изјаснувањето дали ќе се кандидира за уште еден мандат како канцеларка.
На конгресот на CSU кој започна во петокот и продолжи во саботата во Минен, усвоена е новата програма на партијата во коајшто фокусот е најмногу ставен на прашањето на мигрантската криза во Европа, ограничувањето на бројот на мигрантите, отфрлањето на двојното државјанство, силната држава и тероризмот и појасните граници во општеството во однос на влијанието на исламот.
Од CSU повторија дека се сметаат за „конзервативна партија на иднината“ со „јудеохристијански корени“.
Сојузната земја Баварија, инаку, од јули годинава е под зголемено ниво на терористичка закана, по двата терористички напади коишто ги извршија азиланти во името на ултрарадикалната сунитска организација Исламска држава./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мелони застана во одбрана на Ле Пен: „Им се одземаат правата на милиони граѓани“

Италијанската премиерка Џорџа Мелони денеска ја критикува одлуката на францускиот суд со која ѝ се забранува на лидерката на екстремната десница, Марин Ле Пен, да се кандидира на претседателските избори во 2027 година.
„Не ги знам деталите за обвиненијата против Марин Ле Пен, ниту причините за ваквата сурова одлука, но мислам дека никој што се грижи за демократијата не може да се радува на пресуда што ќе влијае на лидерот на голема партија и ќе ги лиши правата на милиони граѓани“, рече Мелони во интервју за италијанскиот весник „Ил Месаџеро“.
Мелони, која важи за најмоќниот десничарски лидер во Европа, со оваа изјава застана во одбрана на француската политичарка, која во понеделникот од парискиот суд беше прогласена за виновна за проневера на средства на Европската Унија.
Ле Пен е осудена на четири години затвор, од кои две ќе поминат под електронски мониторинг во домашен притвор, а две години се условни. Покрај тоа, таа е казнета со 100.000 евра и забрана за учество на избори во следните пет години.
Европа
Земјотрес ја погоди Италија

Земјотрес со јачина од 3,8 степени според Рихтеровата скала е регистриран денес, вторник, 1 април 2025 година, во 3.30 часот во Италија.
Хипоцентарот на земјотресот, според податоците на Европско-медитеранскиот сеизмолошки центар, се наоѓа на длабочина од приближно 6 километри под површината на земјата.
Засега нема извештаи за материјална штета или повредени, а надлежните служби ја следат состојбата.
Европа
Од утре нови правила за Европејците за влез во Обединетото Кралство

На европските граѓани кои патуваат во Обединетото Кралство од утре ќе им треба дигитална пропусница за да влезат во земјата, што според британската влада ќе ја зајакне безбедноста на границите.
Електронското овластување за патување (ЕТА) може да се купи онлајн за 10 фунти (12 евра) во наредните денови, а од 9 април цената ќе се зголеми на 16 фунти (19 евра).
Дозволата ќе биде задолжителна за сите Европејци кои сакаат да ја посетат Велика Британија од 2 април, откако истата пропусница беше воведена во јануари за граѓаните на САД, Канада и други земји на кои не им е потребна виза.
Слична дозвола за влез во земјата имаат и САД.
„Со дигитализирање на системот за имиграција, го отвораме патот за бесконтактни гранични премини во ОК“, рече министерката за миграција Сема Малхотра претходно овој месец, кога беше отворена веб-страницата за првите апликации.
Таа додаде дека проширувањето на ЕТА во земјите ширум светот „ја зајакнува посветеноста за подобрување на безбедноста преку технологија и иновации“.
Документот дозволува посети до шест месеци и важи две години. Тоа е задолжително за сите патници, вклучително и малолетни и новороденчиња.
Пропусницата може да се добие од апликација за паметни телефони или од владината веб-страница, а на Европејците им е достапна од почетокот на март.
Почнувајќи од среда, граѓаните на околу триесет европски земји, вклучително и целата ЕУ со исклучок на Ирска, ќе треба да имаат електронска дозвола за влез во Обединетото Кралство, кое ја напушти ЕУ во 2020 година. Апликантот мора да приложи фотографија од пасош и од лицето. Процесот трае околу десет минути, информираат од британското Министерство за внатрешни работи.
Во повеќето случаи, одлуката за апликацијата се носи во рок од неколку минути, но можно е да се чека и до три работни дена, велат од Владата.
Доколку апликацијата се обработи успешно, ЕТА е дигитално поврзана со пасошот на апликантот.
Патниците кои претстојуваат на аеродроми без да ја поминат границата со ОК се ослободени од оваа програма. Ова беше направено по притисокот од Хитроу, најпрометниот аеродром во Европа, кој стравуваше од губење на бројот на патници.