Свет
Обама ја убедувал Клинтон да го признае поразот на изборите
Американскиот претседател Барак Обама во изборната ноќ телефонски разговарал со својата поранешна државна секретарка Хилари Клинтон која во тој момент беше кандидат за негов наследник од Демократската партија, за да ја убеди да го признае изборниот пораз, пишува изданието Hill.
За овој телефонски разговор, според написот, се зборува во се уште необјавената книга на издавачката куќа „Crown Publishing“ за изборниот пораз на Хилари Клинтон, чии автори се доајените дописници од Белата куќа на весникот, Ејми Парнс и Џонатан Ален .Авторите притоа се повикуваат на три различни извора од опкружувањето на Клинтон, кои сакале да останат анонимни.
„Треба да го признаете поразот“, рекол претседателот Обама во телефонскиот разговор со Клинтон, во моментите кога нејзините главни помошници ги очекувале резултатите од гласањето во клучните сојузни држави Мичиген, Висконсин и Пенсилванија. Откако во 1,30 часот по локално време се појави прогнозата на Associated Press за победата на републиканецот Доналд Трамп во Пенсилванија, каде што Клинтон очекуваше победа, поранешната прва дама му се јавила на Трамп.
„Имаше многу дискусии за државите Мичиген и Висконсин, се разгледуваше дали бројките може да се пресвртат“, го цитира весникот еден од своите соговорници. Според неговото тврдење, без одреден притисок Клинтон би можела и да не му се јави и да му честита на Трамп, бидејќи конечните податоци покажуваа дека кандидатите се речиси изедначени.
Претходно група експерти за кибернетичка безбедност изјавија дека хакери можеле да пробијат во системот за гласање во Висконсин, Мичиген и Пенсилванија, и ѝ предложија на Клинтон да настојува на пребројување на гласовите.
Во две од трите држави, Пенсилванија и Висконсин, избраниот претседател Трамп ја победи Клинтон со минимална предност, добивајќи вкупно 30 електорски гласови.
Кандидатката на претседателските избори од партијата на зелените, Џил Стајн, поднесе барање до изборната комисија во Висконсин за пребројување на гласовите во оваа сојузна држава. Самата таа беше многу далеку од каков и да е солиден резултат во ниедна од овие три држави, но изјави дека сака да добие поточни резултати.
Како што соопшти во неделата советникот на Клинтон за правни прашања, адвокатот Марк Елијас, демократката ќе учествува во пребројувањето на гласовите во Висконсин, доколку Џил Стејн го спроведе она што го најави и побара пребројување и во Пенсилванија и во Мичиген, и во тие држави така ќе постапат.
Новоизбраниот американски претседател Доналд Трамп, од своја страна ги оцени како смешни барањата на Џил Стејн, повторно да се пребројат гласовите во сојузната држава Висконсин.
„Народот се изјасни и овие избори завршија. „Како што Хилари Клинтон самата кажа во изборната ноќ, признавајќи ја победата и честитајќи ми: ’мораме да го прифатиме овој резултат и де се свртиме кон иднината’“, соопшти Трамп во писмената изјава./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавров: Европа се подготвува за војна
Рускиот министер за надворешни работи Сергеј Лавров ја оцени состојбата на безбедносната архитектура во Евроазија на Меѓународната конференција за евроазиска безбедност во Минск, зборувајќи за „агресивните планови на Западот“, проширувањето на НАТО, перспективата за решение на конфликтот во Украина и односите со Вашингтон.
Лавров предупреди дека Русија нема да дозволи Евроазија да стане „феуд на НАТО“, обвинувајќи ги западните земји дека „се подготвуваат за нова голема војна“, објави РИА Новости.
Тој оцени дека Алијансата „ги проширува своите активности кон Арктикот и Тихиот Океан“ со цел да ја ограничи Кина и да ја изолира Русија.
„Многу пати сме рекле дека никогаш немавме, ниту имаме намера да нападнеме која било моментална членка на НАТО или ЕУ. Подготвени сме да ја вклучиме оваа позиција во идните безбедносни гаранции за овој дел од Евроазија, но лидерите на ЕУ избегнуваат да ги разгледуваат овие идни гаранции на вистински колективна основа“, рече Лавров, наведувајќи ги договорите меѓу Франција и Велика Британија за координација на нуклеарните сили и договорот меѓу Лондон и Берлин за воена соработка како доказ за милитаризацијата на Европа.
Зборувајќи за новата безбедносна архитектура на Евроазија, Лавров повика на создавање „панконтинентална структура отворена за сите земји од регионот“, заснована на принципите на суверена еднаквост и неделивост на безбедноста.
„За разлика од Западот, Русија и нашите партнери – Кина, Индија, Иран, земјите од ЗНД – се убедени дека стабилноста и просперитетот бараат еднакви права за сите земји, а не доминација на привилегираните“, рече Лавров.
Осврнувајќи се на конфликтот во Украина, рускиот министер ги обвини европските членки на НАТО за продолжување на војната со „пумпање оружје и пари за режимот во Киев“.
„Европските лидери прават сè за да го убедат Вашингтон да се откаже од решавањето на конфликтот на преговарачка маса“, рече Лавров.
Тој додаде дека Москва ги полага своите надежи на договорите постигнати меѓу претседателите на Русија и САД, Владимир Путин и Доналд Трамп на самитот во Алјаска, велејќи дека Русија очекува САД да останат посветени на тие принципи.
Зборувајќи за билатералните односи со Вашингтон, Лавров рече дека Русија предложила враќање на директниот воздушен сообраќај, но дека „американската страна не му дава приоритет“.
Тој исто така истакна дека Москва очекува одговор од САД на нејзиниот предлог за нов договор за намалување на стратешкото оружје, како и на тестирањето на руските крстосувачки ракети „Буревестник“.
„Не слушнав никаков одговор преку дипломатски канали. Сите молчеа“, заклучи Лавров, пренесува Танјуг.
Фотот: принтскрин
Свет
Пожар на крузер на Нил, евакуирани 60 италијански туристи
Денес избувна пожар на туристичкиот крузер „Емпрес“ што плови по Нил во близина на Луксор во Египет. На бродот имало околу 60 италијански државјани, но никој не е повреден и сите патници се безбедни, потврди италијанското Министерство за надворешни работи Фарнезина, објавува „Ил Месаџеро“.
Фарнезина соопшти дека внимателно ја следат ситуацијата заедно со амбасадата во Каиро и дека министерот Антонио Тајани е информиран за сè. За какви било итни случаи, италијанските граѓани ги имаат на располагање броевите на амбасадата во Каиро и на Кризната единица.
Сите патници се згрижени
Евакуираните туристи веднаш беа згрижени од туристичките оператори Corsini Viaggi и Travco Tours.
Пожар предизвикан од краток спој
Според првичната истрага, пожарот избувнал во кујната на бродот додека бил закотвен во пристаништето на селото Асфун. Причината бил електричен краток спој во еден од кујнските апарати. Пожарникарите брзо го изгаснале пламенот пред да се прошири на остатокот од крузерот, а во инцидентот нема повредени туристи или членови на екипажот.
Истрагата е во тек
Сите патници се префрлени на други бродови од безбедносни причини, додека властите започнаа со инспекција на бродот за да ја утврдат точната причина за пожарот. За инцидентот е известено и државното обвинителство, кое ќе спроведе официјална истрага.
Фото: принтскрин
Свет
Белорусија ќе распореди руски ракетни системи „Орешник“ на своја територија
Белорусија ќе распореди руски ракетни системи „Орешник“ на своја територија во декември, објави денес кабинетот на белорускиот претседател Александар Лукашенко.
Се вели дека подготовките за распоредување на ракетите се при крај, објавува Ројтерс.
Лукашенко изјави дека распоредувањето на хиперсоничните балистички ракети „Орешник“ е одговор на ескалацијата од Западот.
Ракетите „Орешник“ беа вклучени во заеднички маневри меѓу Русија и Белорусија минатиот месец.
Фото: принтскрин

