Фотографија од 61-годишниот српски државјанин кој за малку ќе го загубел животот за време на летот на авиокомпанијата „Рајанер“ е објавена во грчките медиуми. Мажот, чие име сè уште не е соопштено, се наоѓа во болница во Солун, каде се опоравува од повредите и шокот по драматичниот инцидент.

Несреќата се случила на летот на релација Солун – Минхен, кога за време на летот дошло до пукање на прозорец во кабината. Српскиот патник седел до прозорецот, а поради наглата декомпресија, половина од неговото тело било извлечено надвор од авионот.

Неговиот живот бил спасен благодарение на брзата реакција на сопругата, која веднаш го фатила и го држела додека авионот сè уште бил во воздух. Во помош пристигнале и друга сопатничка и уште еден патник.

„Сè се случи во дел од секунда“ – сведоштво на сопругата

Сопругата на повредениот патник во интервју за грчката телевизија „Мега“ ги опишала драматичните моменти во авионот.

„Летавме веќе 30 до 40 минути кога одеднаш пукна прозорецот. Мојот сопруг седеше до прозорецот. Сè се случи во дел од секунда. Поради разликата во притисокот, половина од неговото тело заврши надвор. Сè леташе низ кабината. Паднаа маските за кислород, а никој не знаеше што да прави. Сите плачеа“, раскажала таа.

Таа објаснила дека среќна околност било тоа што нејзиниот сопруг бил врзан со сигурносен појас, но дека пресудна била и реакцијата на луѓето околу него.

„Ние две го држевме, а потоа дојде господинот од редот до нас и заедно го влечевме за раката додека половина тело му беше надвор од авионот“, изјавила сопругата.

Авионот безбедно слетал во Солун

По драмата во воздухот, авионот го променил курсот и безбедно слетал на аеродромот „Македонија“ во Солун.

По слетувањето, патниците биле евакуирани, а повредениот 61-годишник, како и лицата кои му помогнале во критичниот момент, биле пренесени во болница.

Според грчките медиуми, меѓу кои и „Катимерини“, се истражува можноста дека за време на спуштањето на авионот дел од оштетениот мотор се одвоил и удрил во прозорецот на кабината, што предизвикало негово кршење.

Фотографиите по слетувањето покажуваат сериозно оштетување на десниот мотор на авионот, додека снимки од кабината покажуваат скршен прозорец и активирани маски за кислород. Сепак, истражителите треба да утврдат што точно се случило.

Српскиот конзулат: Патникот не е животно загрозен

Од Генералниот конзулат на Србија во Солун информирале дека лекарите го следат здравјето на повредениот државјанин и дека тој не е животно загрозен.

„Генералниот конзул на Република Србија во Солун, Јелена Вујиќ-Обрадовиќ, веднаш по сознанието за инцидентот го посетила повредениот државјанин во болницата и разговарала со управата на здравствената установа и надлежните лекари, како и со сопругата на повредениот“, соопштија од конзулатот.

Македонија ќе ја води истрагата за инцидентот

Иако авионот на „Рајанер“ со сериозно оштетен десен мотор и скршен прозорец безбедно слетал во Солун, истрагата за инцидентот ја водат македонските надлежни органи, бидејќи настанот се случил во македонскиот воздушен простор, објави Aero.rs.

Според правилата на Меѓународната организација за цивилно воздухопловство (ИЦАО) и Анекс 13, истрагата ја води државата над чија територија или воздушен простор се случил сериозниот инцидент.

Во истрагата ќе бидат вклучени експерти од повеќе држави. Грција ќе учествува бидејќи авионот се наоѓа во Солун, каде ќе се вршат детални технички проверки на моторот, оштетениот прозорец, трупот и податоците од летот.

Малта ќе биде вклучена како држава на регистрација на авионот и држава на операторот, бидејќи летот го извршувала „Малта Ер“, компанија од групацијата „Рајанер“.

САД, преку Националниот одбор за безбедност во сообраќајот (НТСБ), ќе обезбедат техничка поддршка бидејќи станува збор за авион „Боинг 737“, произведен во САД. Во анализата ќе учествуваат и производителот „Боинг“ и компанијата „ЦФМ Интернешнл“, која го произведува моторот.

Ќе се анализираат сите детали од летот

Истражителите треба да утврдат што точно се случило за време на летот – дали прво дошло до дефект на моторот, кој дел се одвоил, како дошло до оштетување на авионот и поради што се скршил прозорецот во патничката кабина.

Ќе бидат анализирани податоците од црните кутии, разговорите во пилотската кабина, документацијата за одржување на авионот и моторот, како и сите пронајдени делови.

Американскиот бизнисмен од Мајами, Артур Шеху, за кого албанските власти распишале потерница поради сомневања за перење пари од дрога, е осомничен и за фалсификување имотни документи за земјиштето на кое зетот на поранешниот американски претседател Доналд Трамп, Џаред Кушнер, планира да изгради луксузен комплекс вреден милијарди долари.

Според документите на албанската Специјална структура за борба против корупција и организиран криминал (СПАК), до кои дошла агенцијата „Ројтерс“, Шеху и негови соработници се товарат за шверц на кокаин од Јужна Америка кон европски пазари и перење пари преку различни инвестиции во недвижности.

Во истрагата се наведува дека осомничените преку фалсификувани документи за сопственост создале мрежа на недвижности, а дел од тоа земјиште подоцна било продадено за проектот на компанијата „Сазан Риал Естејт Девелопмент“, зад која стои Кушнер.

Шеху ги отфрла сите обвинувања. Неговиот адвокат Кујтим Цакрани изјавил дека неговиот клиент не е ниту трговец со дрога, ниту фалсификатор на имотни документи.

„Ништо од она што се наведува за господинот Артур Шеху не е вистина. Тој не е ниту трговец со дрога ниту фалсификатор на имотни документи“, рекол адвокатот.

Според документите, Шеху во април продал дел од нетакнатото албанско крајбрежје на компанијата „Албанија Ленд Девелопмент“, поврзана со проектот за одморалиште на Кушнер. Албанските обвинители наведуваат дека постои сомнеж дека имотот бил стекнат со фалсификувани документи.

Во списите нема обвиненија за незаконско постапување против Џаред Кушнер, неговите компании или другите инвеститори. „Ројтерс“ наведува дека нема пронајдено докази дека инвеститорите биле свесни за какви било сомнежи поврзани со Шеху во моментот на купувањето на земјиштето.

Проектот во близина на селото Звернец во Албанија веќе подолго време предизвикува реакции кај локалното население и еколошките организации поради стравувањата дека изградбата може да го загрози природното подрачје, кое е дом на морски желки и фламинга.

Мештаните со години го оспоруваат сопствеништвото над дел од земјиштето, а нивните адвокати најавија дека ќе бараат забрана за изградба додека траат судските постапки.

Од компанијата „Сазан Риал Естејт Девелопмент“ велат дека веруваат оти купувањето на земјиштето било законско и спроведено според сите процедури.

Албанската влада го поддржува проектот, оценувајќи дека тој ќе донесе економски придобивки, додека критичарите предупредуваат на можни последици врз природата и транспарентноста на сопственичките односи.

Истрагата ја води СПАК, независна институција формирана во 2019 година за борба против корупција и организиран криминал. Според документите, обвинителите наредиле замрзнување на околу 110 милиони евра од продажбата на земјиштето, со цел средствата да не бидат префрлени на сметката на Шеху.

Седумдесетгодишниот Х.Б. од Нови Пазар трагично го загуби животот на граничниот премин Градина, откако врз него се спуштил камион што се обидувал да го поправи. Несреќата се случила во средата, нешто по 18 часот, по ненадеен технички дефект на возилото, пренесуваат локалните медиуми.

Според првичните информации, возачот во текот на возењето забележал проблем со камионот, по што го запрел возилото за да провери за што станува збор. Додека се наоѓал под камионот, дошло до пукање на воздушното перниче, поради што тешкото возило нагло се спуштило.

Мажот останал приклештен под камионот и починал на местото на несреќата од здобиените повреди.

Надлежните органи извршиле увид и ги утврдуваат сите околности на трагедијата. Според досегашните информации, станува збор за несреќен случај предизвикан од технички дефект на возилото.