Авионот „фалкон“, во кој бил бугарскиот премиер Бојко Борисов, одвај слетал на аеродромот во Софија, јави бугарската агенција „Бгнес“.

Според првичните информации, при првиот обид да слета на авионот на бугарската влада му пукнала гумата на тркалото за слетување, па пилотот морал да направи уште еден обид да слета и за тоа да примени процедура наменета за итни случаи, односно мануелно да го приземји авионот.

Во инцидентот никој не е повреден, па Борисов продолжил со своите активности.

Ричард Гренел, пратеникот на американскиот претседател, Доналд Трамп, за разговорите меѓу Белград и Приштина, ја поздрави иницијативата за балкански шенген истакнувајќи дека таа иницијатива би можела да биде успешна ако ги вклучи сите од регионот, па и Косово, пренесува „Спутник“.

„Ја поздравуваме иницијативата за мини шенген на Западен Балкан како начин да се придвижи слободното движење на луѓето и стоките. Веруваме дека таа иницијатива, за да биде успешна, мора да ги вклучи сите во регионот вклучувајќи го и Косово. Администацијата на Трамп е насочена кон помош на целиот регион во создавањето економски можности и работни места за младите“, се наведува во соопштението на Амбасадата на САД во Белград.

Во Охрид неодамна се одржа состанок на македонскиот премиер Зоран Заев, албанскиот премиер Еди Рама и српскиот претседател Александар Вучиќ, на кој беа поканети и претставници на Косово, Црна Гора и на Босна и Херцеговина. Првата средба на споменатата тројка се одржа на 10 октомври во Нови Сад.

Косово го одби учеството на средбата опишувајќи ја иницијативата како обид за ново создавање на Југославија, а Црна Гора беше воздржана. Косовскиот претседател, Хашим Тачи, посочи дека Косово не сака да ја замени евро-атлантската иднина со ниедна регионална иницијатива.

Лидерот на косовското двжиење „Самоопределување“, Албин Курти, кој е кандидат за косовски премиер, изјави дека е направена грешка во чекори во врска со регионалната иницијатива зашто Албанија морала да го почека формирањето нова влада во Косово пред каква било иницијатива.

Албанскиот премиер, Еди Рама, го критикува Косово поради самоизолација нагласувајќи дека иницијативата има цел само слободно движење на луѓето во Западен Балкан.

Судот на честа за Градскиот комитет на Загреб синоќа донесе одлука од партијата ХДЗ да исклучи осум члена поради говор на омраза на социјалните мрежи, јави „Хина“.

На ова му претходела телефонска седница на загрепскиот разгранок на ХДЗ и претседателствата на градските организации, кои го усвоиле предлогот на партијата. По одлуката на Градскиот суд на честа, исклучените членови може да се жалат до Високиот суд на честа, кој може да ја потврди или да ја отфрли изречената мерка.

По обелоденувањето на аферата на „Вацап“, раководството на ХДЗ одлучи да ги санкционира сите членови на партијата што шират говор на омраза на „Вацап“, „Вибер“ и на „Фејсбук“, се заканија или повикаа да се гласа за други кандидати, а не за претседателскиот кандидат на ХДЗ, Колинда Грабар-Китаровиќ.