Регион
Вучиќ одби да му каже на Си-ен-ен дали го поддржува Новак Ѓоковиќ кога пишува „Косово е срцето на Србија“
![](https://makfax.com.mk/wp-content/uploads/2023/10/vucic-cnn-1.jpg)
Претседателот на Србија, Александар Вучиќ, за време на гостувањето на Си-ен-ен одби да каже дали го поддржува ставот на најдобриот тенисер на сите времиња Новак Ѓоковиќ дека „Косово е срцето на Србија“. Одговарајќи на прашањето на Кристијан Аманпур, Вучиќ рече дека „верува дека Ѓоковиќ зборува од срце“, но дека политичарите мора да бидат прагматични.
На прашањето на водителот дали го поддржува ставот на Новак Ѓоковиќ дека „Косово е срцето на Србија“, истакнувајќи дека токму тоа го напишал најдобриот тенисер на сите времиња, заедно со пораката „Стоп за насилството“, по еден меч на „Ролан Гарос“, Вучиќ одби директно да одговори.
Тој рече дека верува оти Новак Ѓоковиќ зборува од срце и дека 99 отсто од луѓето во Србија веруваат во тоа.
„Ние политичарите мора да бидеме прагматични, рационални, а тоа значи дека треба да најдеме решенија преку преговори, конструктивен пристап. Мораме да видиме како ќе се справиме со сите проблеми поради иднината затоа што треба да се погрижиме повеќе да не страдаат ниту Албанците ниту Србите и да видиме како можеме да ги надминеме овие тешкотии и како можеме да имаме подобра иднина, со отворени граници, административни линии, за да имаме подобра економска соработка и да ги зближиме нашите народи. Тоа е вистинско прашање“, изјави Вучиќ.
Новинарот на Си-ен-ен, Кристијан Аманпур, за време на интервјуто го потсети српскиот претседател Александар Вучиќ на неговата изјава по преговорите во Охрид кога рече дека не го потпишал договорот затоа што „има болки во десната рака“ и дека ќе го боли следните четири години.
„Ја ценам вашата објективност, сакам да кажам дека можеби не следевте што зборуваше ЕУ по нашата последна средба. ЕУ тогаш јавно рече дека Србија е целосно конструктивна“, рече Вучиќ и додаде дека за тоа зборувале европските претставници Жозеп Борел и Мирослав Лајчак.
Тој рече дека прави „сè што рече дека ќе направи“.
„Направив сè што им кажав на нашите пријатели од САД и ЕУ дека ќе направам, но постои српски Устав и морам да го почитувам. Ништо не криев во нивно присуство“, изјави Вучиќ за преговорите со Приштина.
Тој оцени дека мирот е во најдобар интерес на Србија и на целиот регион.
Вучиќ за време на гостувањето ги обвини и косовските власти за „постепено етничко чистење“ на северот на Косово, а водителката изјави дека ЕУ и САД не се согласуваат со таа процена.
„Прават етничко чистење, во последните две години бројот на Срби на Косово е намален, сега има 10 отсто помалку“, рече Вучиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
(Видео) Тешка сообраќајка во Грција: бебе меѓу загинатите
![](https://makfax.com.mk/wp-content/uploads/2024/07/Screenshot-2024-07-26-204400.jpg)
Тешка трагедија се случи во петокот попладне на автопатот Пиргос – Кипарисија, во близина на Месинија во Грција, кога четири лица, меѓу кои 12-месечно бебе и 13-годишно девојче, кои се наоѓале во два автомобили, загинаа во сообраќајма несреќа, пишува „Protothema“.
До несреќата дошло кога 39-годишниот камионџија, кој возел во правец на Кипарисија, од засега непозната причина изгубил контрола, излетал во спротивен правец и налетал на три возила, предизвикувајќи трагични последици.
Според написите, камионот всушност буквално ги стопил двете возила кои учествувале во несреќата. Противпожарната служба со 12 пожарникари ги извлекла настраданите.
Според информациите, во првиот патнички автомобил кој се судрил со камионот било семејство кое живее во странство и отпатувало за Нафплио за да се види со роднините и на одмор на Пелопонез. Во него се пронајдени мртви 38-годишен татко и 12-месечна ќерка, а повредени се 38-годишна мајка и нивниот шестгодишен син, кои се пренесени во болницата во Патра.
Од второто возило кое било заглавено под камионот извлечени се маж (50), девојка (13) и жена (60), кои се здобиле со тешки телесни повреди.
Повредени се и 25-годишен маж кој бил интубиран во Каламата, 39-годишен камионџија и 61-годишен маж, и двајцата се на лекување во болницата Кипарисија.
Затворен е магистралниот пат Пиргос – Кипарисија, а сообраќајот се пренасочува по заобиколен пат.
Регион
Едно лице загина во експлозија во магацин за огномет во Бугарија, ќерка му е со 85 отсто изгореници
![](https://makfax.com.mk/wp-content/uploads/2024/07/3-13.jpg)
Едно лице загина во експлозија во магацин за огномет во близина на бугарскиот град Елин Пелин, недалеку од Софија, изјави денеска бугарскиот министер за внатрешни работи, Калин Стојанов.
Мажот (49), кој почина во експлозијата, добил тешки изгореници и синоќа бил хоспитализиран, а неговата 20-годишна ќерка, која исто така е во болница со 85 отсто изгореници, сѐ уште е во критична состојба, пренесува порталот „Новините“.
Стојанов рече дека во магацинот во кој се случила експлозијата може да има уште две лица, меѓу кои и 22-годишниот син на сопственикот на магацинот.
Регион
Дете починало 7 дена по операција на крајници во Хрватска
![](https://makfax.com.mk/wp-content/uploads/2024/07/23.jpg)
Седумгодишно дете почина вчера, една недела по операцијата на крајници, која беше извршена во Клиничката болница „Свети дух“ во Хрватска.
Седум дена по извршената операција на Клиниката за оториноларингологија и хирургија на глава и врат и шест дена по отпуштањето од болница, детето во раните утрински часови било донесено утрово без витални знаци.
Веста за смртта на детето во рок од 24 часа ја потврди директорот на болницата, д-р Игор Алфиревиќ.
„За жал, точна е информацијата дека во четвртокот, 25 јули 2024 година, по реанимација во Обединетата итна болница на Клиничката болница „Свети дух“ почина седумгодишно дете“, рече тој.
Во тек е истрага, а телото на детето е испратено на обдукција.