Регион
Вјоса Османи во Албанија: Србија има план за дестабилизација на Западен Балкан, сличен на Украина
Косовската претседателка Вјоса Османи која престојува во официјална посета на Албанија изјави дека Србија има дестабилизирачки план на Западен Балкан, сличен на оној во Украина.
На заедничката прес-конференција со претседателот на Албанија, Бајрам Бегај, Вјоса Османи повика на поддршка од Албанија, јавуваат косовските медиуми.
„Србија секогаш ја влошува ситуацијата во нашиот регион преку честите напади на Косово. Со строгото спроведување на планот што Путин го спроведе во 2014 година против Украина, Вучиќ и Србија имаат за цел да го дестабилизираат целиот Западен Балкан и преку дестабилизација на нашиот регион да го нападнат системот на вредности на кој стојат ЕУ и НАТО“, рече Османи.
Османи во Тирана се сретна и со премиерот на Албанија, Еди Рама, со кого разговараше за европската иднина на двете земји и за зголемување на соработката, соопштија од кабинетот на претседателот на Косово.
„Содржајна дискусија за заедничката европска аспирација на Косово и Албанија. Со заедничка работа Косово и Албанија можат да го отворат патот за посветла и поинтегрирана иднина“, рече Османи.
Таа додаде дека Косово е конструктивна страна во процесот на дијалогот со Србија и подвлече дека конечното решение треба да биде меѓусебно признавање, зачувување на територијалниот интегритет, суверенитет, уставниот поредок и институционалната функционалност.
„Претседателката Османи и премиерот Рама изразија оптимизам за иднината на косовско-албанските односи и го истакнаа потенцијалот за зголемување на соработката во различни области од заеднички интерес“, се вели во соопштението.
На покана на претседателот на Албанија, Бајрам Бегај, претседателката на Косово, Вјоса Османи, престојува во дводневна официјална посета на Албанија.
Посетата ќе продолжи во градот Берат, а ќе заврши утре во Драч, каде покрај средбите со градоначалниците на овие два града, ќе ја посети и царинската испостава на Косово во пристаништето Драч.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Фон дер Лајен: Србија е еден од најнапредните кандидати за членство во ЕУ
Србија е една од најнапредните земји во процесот на пристапување во Европската унија и на неа е да избере брзина на пристапување, изјави претседателката на Европската комисија Урсула фон дер Лајен по состанокот со српскиот претседател Александар Вучиќ во Белград.
Фон дер Лајен рече дека партнерството меѓу Србија и Европската унија станува се посилно, а ЕУ е првиот трговски партнер и инвеститор на Србија.
Напредокот на Србија на европскиот пат и почетокот на имплементацијата на Планот за раст на Западен Балкан беа во фокусот на разговорот меѓу Вучиќ и Фон дер Лајен.
„Планот за раст треба да ги приближи економиите од Западен Балкан до нашата и постепено да го интегрира регионалниот пазар со единствениот европски пазар. Принципот е многу едноставен. Ги отвораме вратите на единствениот пазар на Европската унија во одредени сектори за српските компании, а за возврат треба да се спроведат одредени реформи заради фер услови на пазарот“, рече Фон дер Лајен.
Регион
Земјотрес со јачина од четири степени ја погоди Албанија
Земјотрес со јачина од четири степени според Рихтеровата скала вечерва ја погоди Албанија, соопшти Европско-медитеранскиот сеизмолошки центар (EMSC).
Земјотресот се случил на длабочина од пет километри, додава EMSC.
Епицентарот на земјотресот е регистриран на 11 километри источно од градот Фјер, каде живеат околу 60.000 луѓе.
Регион
Вучиќ со Фон дер Лајен: Сѐ додека јас сум претседател, Србија ќе остане на европскиот пат
Претседателот на Србија, Александар Вучиќ, денеска изјави дека сѐ додека тој е претседател на државата, Србија нема да ги промени своите главни надворешнополитички цели, а тоа се европскиот пат и определбата за членство во ЕУ.
На заедничката прес-конференција со претседателката на Европската комисија, Урсула фон дер Лајен, која е во дводневна посета на Србија, Вучиќ рече дека европскиот пат е од клучно значење за напредокот на земјата, дека Србија посветено работи на тој пат и се надева на резултати.
Тој истакна дека имал многу долг, крајно отворен и искрен разговор со Фон дер Лајен и дека има работи за кои Европската Унија ја критикува Србија, но дека претседателот на ЕК секогаш бил подготвен да ја сослуша нивната страна.
Како што рече, разговарале за определбите на Србија.
„Јас ѝ го кажав истото тоа што ви го кажав вчера. Колку и да размислуваат поинаку некои луѓе, јас сум претседател на Републиката со највисок легитимитет во државата, избран директно од граѓаните двапати по ред во првиот изборен круг, што никогаш не се случило во нашата историја, а додека јас сум претседател, нема промена на главните цели на нашата надворешна и внатрешна политика. Тоа значи дека нашиот европски пат е и наше застапување за европска Србија и е од клучно значење за нашиот напредок, дека Србија ќе се посвети на работа на тој пат и дека се надеваме на резултати“, изјави Вучиќ.
Тој ѝ честита на Урсула фон дер Лајен за нејзиниот реизбор на функцијата претседател на Европската комисија и ѝ се заблагодари за поддршката што ѝ ја дала на Србија во претходниот мандат и додаде дека се надева оти тоа ќе продолжи да го прави и во овој мандат, пренесува „Танјуг“.
„Има една работа што луѓето во Србија многу ја почитуваат. Кога ни доаѓаат гости, речиси сите доаѓаат во Белград кога се во прашање високи делегации, официјални посети во нашата земја и двапати отидовме далеку од Белград, далеку од урбаните средини, а тоа е нешто што нашите граѓани, нашиот народ, исклучително го почитуваат и ценат, ви благодариме за поддршката и помошта што ни ја дадовте во претходниот период“, рече Вучиќ.