Московскиот градоначалник, Сергеј Собјанин, денеска соопшти дека Москва ќе ги прогласи за неработни деновите од 28 октомври до 7 ноември со цел да се запре ширењето на инфекцијата со коронавирус.

„Ситуацијата во Москва продолжува да се развива според најлошото сценарио. Во наредните денови ќе достигнеме историски рекорд во инциденцата на коронавирус“, напиша Собијанин во својата објава.

Московските власти ќе забранат одржување на културни настани, манифестации и спортски натпревари во градот од 28 октомври до 7 ноември, објави градоначалникот Собјанин на својата веб-страница, а пренесе агенцијата ТАСС.

Аптеките и продавниците за храна ќе продолжат да работат, а во овој контекст властите нема да ја ограничат продажбата на стоки и услуги преку испорака.

„Рестораните и кафулињата исто така ќе можат да вршат испораки“, најави градоначалникот, а пренесе „Спутник“.

Собјанин наложи во текот на неработните денови да се прекине работата на сите компании, освен оние кои обезбедуваат функционирање на инфраструктурата.

Во истиот период, како што се наведува, распуст ќе биде воведен во московските училишта и градинки.

Бројот на новозаразени со коронавирус во Австрија експлодираше во последните денови.

Експертите се нервозни и предвидуваат дека нема подобрување на повидок. Само вчера и денес, во изминатите 48 часа, оваа алпска земја регистрираше 7.400 новозаразени со коронавирус, пренесуваат австриските агенции.

Она што е особено загрижувачко за австрискиот национален штаб за коронавирус и епидемиолозите и виролозите е дека Австрија бележи сè повеќе случаи на инфекција со ново подмножество на вирусот делта, односно варијантата делта-плус со ознака AY.4.2.

Според експертите, овој поттип се разликува од претходниот основен делта-сој со две мутации во протеинот Спајк: Y145H и A222, и затоа е многу позаразен.

Експертите сè уште се расправаат за тоа дали е многу поопасен од основниот делта-сој.

Експертот за молекуларна биологија Улрих Елинг за австрискиот весник „Кронен цајтунг“ изјави дека повеќе од 30 случаи на инфекција со новиот делта-вирус на коронавирус се пријавени во Австрија во последните недели.

„Оваа варијанта е 10 до 15 проценти позаразна од основниот делта-сој“, тврди Елинг.

Според експертите, новиот поттип на вирусот делта-плус брзо се шири во Европа. Особено во неговиот континентален дел, каде што веќе се евидентирани околу 1.000 случаи на инфекција. Повеќето од нив се во Германија, 293. Обединетото Кралство е особено во неволја, каде што се евидентирани и потврдени над 20.000 случаи на инфекција со овој поттип на делта-плус вирусот, кој исто така е присутен во Израел.

Она што веќе се посочува е дека овој поттип исто така ќе биде потиснат, но наводно ќе биде многу побавен од другите претходни варијанти на коронавирусот.

Белгиската влада предупреди дека земјата може да биде на чекор пред ново зголемување на случаите од „Ковид-19“ и покрај високата стапка на вакцинација.

Владата неодамна ја олесни задолжителната употреба на маски за лице, но сега повторно го охрабрува населението да ги користи истите за да го спречи зголемувањето на новозаразени случаи од коронавирус.

„Очигледно сме во четвртиот бран. Ќе се соочиме со зголемување на инфекциите и, за жал, со приемите во болница“, изјави белгискиот министер за здравство Франк Ванденбрук.

Владата олесни некои ограничувања овој месец, дозволувајќи, меѓу другото, поголем број настани во затворен простор и укинување на барањето за носење маски во барови.

Белгија, земја со 11 милиони жители, повторно има над 3.000 инфекции дневно, што е зголемување за 50 проценти во споредба со претходната недела.

Тековниот прием во болниците е околу 80 лица дневно, што е зголемување за над 40 проценти.

Постои загриженост дека кривата повторно ќе се зголеми, иако 85% од возрасната популација е вакцинирана.