Во последните 24 часа, во Хрватска се регистрирани 3.987 нови случаи на коронавирус, тестирани се 11.282 лица, а 55 пациенти починале.

Бројот на активни случаи денес е 23.573, од кои 2.221 пациент се во болница, оа 262 се на респиратор, пренесува порталот „Индекс“.

Од 25 февруари, кога е регистриран првиот случај на инфекција во Хрватска, досега се заразени вкупно 123.693 лица, од кои 1.655 починале.

Досега се опоравиле 98.465 лица, од кои 2.767 во последните 24 часа.

Во моментов има 51.247 луѓе во самоизолација, а до денеска се тестирале вкупно 736.102 лица.

Од денес во Хрватска се на сила нови мерки, а угостителските објекти се целосно затворени. Исто така, забранети се сите јавни настани и собири на повеќе од 25 лица. Максимум 10 лица можат да бидат присутни на приватни прослави. Максимум 25 лица можат да бидат присутни на погреби.

Јавните настани, собири и церемонии од сите видови може да траат најдоцна до 22 часот.

Во Словенија, во последните 24 часа биле потврдени 1.591 нов случај на коронавирус од 6.938 тестирани, а 43 лица починале.

На болничко лекување има 1.258 пациенти, што е за 66 помалку од претходниот ден.

Бројот на пациенти на интензивна нега исто така е намален.

Од почетокот на пандемијата, досега се заразени 74.265 луѓе во земјата, а починале 1.336 пациенти со Ковид-19, пренесува СТА.

Иако децата главно ја поминуваат инфекцијата со коронавирус без или со благи симптоми, тие поради силната имунолошка реакција може да претрпат оштетување на повеќе органи, вклучително и на срцето, валат словенечките лекари, кои наишле на неколку вакви случаи во последните неколку дена.

Како што истакна во четвртокот педијатарот Тина Планкар-Сровин од Универзитетскиот медицински центар во Љубљана, минатата недела во болницата примиле шест деца со воспаление на повеќе органи.

Според лекарите, ова било резултат на силна имунолошка реакција на нивниот организам откако децата биле заразени со коронавирусот од две до четири недели претходно, а потоа оздравеле.

„Ковид-19 кај децата се развива во полесна форма, но болеста може да има сериозни последици“, предупреди Планкар.

Досега во таа болница имало 40 деца со Ковид-19, а во последната недела забележале повеќе случаи на деца со мултиоргански воспалителен синдром, поврзан со претходна инфекција со коронавирус.

Кај сите деца со овие симптоми примени во болницата минатата недела се утврдило дека има штетни последици врз срцевиот мускул, па затоа добиле силни лекови против воспаление, а покрај педијатри, во третманот учествувале и кардиолози и ревматолози.

Словенечките педијатри забележуваат дека појавата на слични симптоми кај децата со Ковид-19 првпат била забележана во Велика Британија пред неколку месеци.

Универзитетскиот клинички центар во Љубљана потврди дека во првиот бран на епидемијата лекувале само четири деца заразени од Ковид-19, но тоа биле полесни случаи, а во есенскиот втор бран досега во таа болница биле лекувани 43 деца.