Регион
Зеленски најави војна на Балканот, Пленковиќ: Неговата порака е јасна
Премиерот Андреј Пленковиќ и претседателот на Европскиот совет Шарл Мишел одржаа прес-конференција во Бански двори пред вечерашната работна вечера, на која ќе присуствуваат премиерот на Италија Џорџа Мелони, премиерот на Малта Роберт Абела и премиерот на Полска Матеуш Моравјецки.
Тие ја коментираа изјавата на украинскиот претседател Володимир Зеленски, кој предупреди дека Русија планира да започне нова војна меѓу две земји на Балканот и дека тоа ќе биде ново руско одвлекување на вниманието во светот.
„Убеден сум дека европскиот пат за земјите од Западен Балкан е најважниот чекор за мир овде“, рече Мишел на новинарско прашање за изјавата на Зеленски.
Пленковиќ беше поелоквентен.
„Пораката на претседателот Зеленски е многу јасна. Јасна е во контекст на пошироката дестабилизација на целиот европски континент. А руската агресија против Украина, меѓу другото, има функција и на дестабилизација на државите кои граничат со ЕУ“, рече хрватскиот премиер и го наведе примерот на Молдавија и Грузија.
Тој го спомена и многу сериозниот инцидент на паравоените групи во Бањска, на северот на Косово.
„Имаме неколку потенцијални фокуси на нестабилност. Политиката на Хрватска отсекогаш била да вложи максимални напори меѓународната заедница да биде силно ангажирана во областа на Југоисточна Европа, поради што сме поборници за проширување кон нашите соседи. Само цврстото закотвување на земјите од нашето соседство во европскиот процес гарантира мир, безбедност, стабилност и подобри меѓусебни односи“, рече тој и потоа додаде:
„Можеби има повеќе од овие жаришта во нашето непосредно соседство. Не сум разговарал со претседателот Зеленски во последниве денови, така што не можам да дешифрирам за кое потенцијално жариште зборуваше, но со оглед на околностите, може да има повеќе“, изјави Пленковиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Фон дер Лајен: Србија е еден од најнапредните кандидати за членство во ЕУ
Србија е една од најнапредните земји во процесот на пристапување во Европската унија и на неа е да избере брзина на пристапување, изјави претседателката на Европската комисија Урсула фон дер Лајен по состанокот со српскиот претседател Александар Вучиќ во Белград.
Фон дер Лајен рече дека партнерството меѓу Србија и Европската унија станува се посилно, а ЕУ е првиот трговски партнер и инвеститор на Србија.
Напредокот на Србија на европскиот пат и почетокот на имплементацијата на Планот за раст на Западен Балкан беа во фокусот на разговорот меѓу Вучиќ и Фон дер Лајен.
„Планот за раст треба да ги приближи економиите од Западен Балкан до нашата и постепено да го интегрира регионалниот пазар со единствениот европски пазар. Принципот е многу едноставен. Ги отвораме вратите на единствениот пазар на Европската унија во одредени сектори за српските компании, а за возврат треба да се спроведат одредени реформи заради фер услови на пазарот“, рече Фон дер Лајен.
Регион
Земјотрес со јачина од четири степени ја погоди Албанија
Земјотрес со јачина од четири степени според Рихтеровата скала вечерва ја погоди Албанија, соопшти Европско-медитеранскиот сеизмолошки центар (EMSC).
Земјотресот се случил на длабочина од пет километри, додава EMSC.
Епицентарот на земјотресот е регистриран на 11 километри источно од градот Фјер, каде живеат околу 60.000 луѓе.
Регион
Вучиќ со Фон дер Лајен: Сѐ додека јас сум претседател, Србија ќе остане на европскиот пат
Претседателот на Србија, Александар Вучиќ, денеска изјави дека сѐ додека тој е претседател на државата, Србија нема да ги промени своите главни надворешнополитички цели, а тоа се европскиот пат и определбата за членство во ЕУ.
На заедничката прес-конференција со претседателката на Европската комисија, Урсула фон дер Лајен, која е во дводневна посета на Србија, Вучиќ рече дека европскиот пат е од клучно значење за напредокот на земјата, дека Србија посветено работи на тој пат и се надева на резултати.
Тој истакна дека имал многу долг, крајно отворен и искрен разговор со Фон дер Лајен и дека има работи за кои Европската Унија ја критикува Србија, но дека претседателот на ЕК секогаш бил подготвен да ја сослуша нивната страна.
Како што рече, разговарале за определбите на Србија.
„Јас ѝ го кажав истото тоа што ви го кажав вчера. Колку и да размислуваат поинаку некои луѓе, јас сум претседател на Републиката со највисок легитимитет во државата, избран директно од граѓаните двапати по ред во првиот изборен круг, што никогаш не се случило во нашата историја, а додека јас сум претседател, нема промена на главните цели на нашата надворешна и внатрешна политика. Тоа значи дека нашиот европски пат е и наше застапување за европска Србија и е од клучно значење за нашиот напредок, дека Србија ќе се посвети на работа на тој пат и дека се надеваме на резултати“, изјави Вучиќ.
Тој ѝ честита на Урсула фон дер Лајен за нејзиниот реизбор на функцијата претседател на Европската комисија и ѝ се заблагодари за поддршката што ѝ ја дала на Србија во претходниот мандат и додаде дека се надева оти тоа ќе продолжи да го прави и во овој мандат, пренесува „Танјуг“.
„Има една работа што луѓето во Србија многу ја почитуваат. Кога ни доаѓаат гости, речиси сите доаѓаат во Белград кога се во прашање високи делегации, официјални посети во нашата земја и двапати отидовме далеку од Белград, далеку од урбаните средини, а тоа е нешто што нашите граѓани, нашиот народ, исклучително го почитуваат и ценат, ви благодариме за поддршката и помошта што ни ја дадовте во претходниот период“, рече Вучиќ.