Турскиот праламент го одобри предлогот претседателските и парламентарните избори да се одржат на 24 јуни, една година порано од планираното, пренесоа турските медиуми. Во пресрет на гласањето пратениците од опозициската прокурдска Народна демократска партија, излегле од парламентот во знак на протест.

Сите преостанати пратеници во салата го поддржале предлогот изборите да се одржат во јуни, откако турскиот претседател Реџеп Таип Ердоган рече дека тие би требало да се одржат предвремено.

Претходно претседателските и парламентарните избори беа планирани за ноември 2019 година.Турскиот парламент претходно одобри продолжување на вонредната состојба за уште три месеци, која беше воведена по неуспешниот државен удар во јули 2016 година.

Турскиот амбасадор во Тирана, Мурат Ахмет Јорук, изјави дека разговорите на Албанија и Турција за екстрадиција на ѓуленистите, кои сега се во Албанија, се одвиваат мошне позитивно.

Турскиот амбасадор за албанските медиуми изјави дека по неуспешниот државен удар во Турција, Анкара испратила список во неколку држави, меѓу кои и во Албанија, на приврзаниците на организацијата „Фето“ заради нивна експрадиција во Турција.

Албанија го осуди државниот удар во Турција и сега сме во фаза на разговори таа да ги експерадира лицата што се поврзани со Фетулах Ѓулен. Весникот „Мапо“ наведува дека турскиот амбасадор смета дека разговорите за екстрадицијата се одвиваат позитивно.

Инаку, во интервју за албанската телевизија „Њуз 24“ турскиот дипломат ја изнесе оценката дека организацијата „Фето“ може да создаде хаос во Албанија бидејќи во рака го има образованието во Албанија.

Засега официјална Тирана предводена од страна на премиерот Еди Рама, за кој се тврди дека е одличен пријател на турскиот претседател Таип Реџеп Ердоган, нема коментари за депортацијата на лицата што се на списокот на Анкара.

К.М.

Хрватската претседателка, Колинда Грабар-Китаровиќ, рече дека односите меѓу Хрватска и Србија сега се нарушени по инцидентот што наводно го предизвикал радикалот Воислав Шешељ.

„Србија мора да утврди дали Шешељ навистина го сторил она што тврди дека го сторил. Ако се утврди дека навистина го газел знамето на Република Хрватска, тој треба да биде соодветно казнет. Санкцијата за такво дело во Србија е три месеци затвор или парична казна“, рече Китаровиќ, а пренесоа хрватските медиуми.

Хрватската претседателка изрази надеж дека овој случај нема да предизвика дополнително вербално насилство и дека нема да има други последици.

Таа воедно додаде дека не знае кој му пренел на претседателот на Србија, Александар Вучиќ, дека за време на неговиот престој во Хрватска било запалено српското знаме, велејќи дека таквата информација не е точна, а како што рече, тоа може да се потврди и од страна на Амбасадата на Србија во Хрватска.

Инаку, претходно, хрватскиот портал „Индекс“ пренесе дека од српското собрание на нивните новинари им рекле дека не постои снимка од наводниот инцидент на лидерот на радикалите, Воислав Шешељ, за време на вчерашната посетата на хрватската делегација.

Меѓутоа, во хрватската јавност и тамошните медиуми владее доза на скептичност за тоа како може ниту еден од хрватските и српските новинари кои вчера биле во српското собрание за време на посетата на хрватската делегација, да нема видеоснимка од наводното газење на хрватското знаме. Исто така, новинарите на „Индекс“ имале проблем да најдат и сведок кој би можел да потврди што се случувало со хрватското знаме.

Сепак, српската радикална партија тврди дека Шешељ во Собранието на Србија ја пцуел хрватската делегација и газел по државното знаме.