Лорер: Декември не е реален рок за целосен договор со Северна Македонија

Четиринаесетти декември не е реален рок за постигнување целосен договор со Северна Македонија, изјави за радио БТВ, Даниел Лорер, од коалицијата „Промената продолжува“. Лорер се смета за најсериозен кандидат за министер за надворешни работи во новата влада во Софија.

„Се чини дека ако ја оставиме историјата за да ги придвижиме преговорите меѓу Бугарија и Северна Македонија, тоа нема да даде доволно добар резултат и за двете страни. Така ќе бидат отворени и дополнителни дискусии во однос на економскиот напредок меѓу двете земји. И историската дискусија ќе се одвива паралелно за да можат и двете страни да бидат задоволни“, рече Лорер.

Тој ја коментираше и заедничката историска комисија меѓу Скопје и Софија.

„Работата на историска комисија меѓу Скопје и Софија не нуди напредок и двете страни се чувствуваат незадоволни од тоа што се случува и треба да биде пронајдена нова формула. Нејзина функција треба да биде за да помага, но не да биде и единствена во тој процес. Спорот е длабок и тие дискусии треба да го поминат својот пат и тоа се случува меѓу сите соседни народи на Балканот“, додаде тој.

Прашан дали ќе биде предложен за министер за надворешни работи на Бугарија, тој ниту демантираше, ниту потврди.