Регион
ОН ќе разговараат за резолуцијата за Сребреница следната недела
![](https://makfax.com.mk/wp-content/uploads/2024/05/srebrenica.jpg)
На 23 мај Генералното собрание на Обединетите нации ќе го разгледа предлогот за резолуција, што ќе ги потсети на жртвите на геноцидот извршен во 1995 година врз Бошњаците во Сребреница, чие усвојување е спонзорирано од група од триесет земји.
Во распоредот на сесијата на Генералното собрание, кој е достапен на веб-страницата на ОН, се наведува дека в четврток следната недела, во рамките на 82. сесија, е планирана дискусија за документот со наслов Меѓународен ден на сеќавање и комеморација на жртвите од геноцидот во Сребреница во 1995 година.
Дебатата е планирана како дел од точката на дневниот ред со наслов „Култура на мирот“.
Формални предлагачи на резолуцијата за геноцидот во Сребреница се Германија и Руанда, а спонзори се триесетина земји. Покрај Македонија, од регионот се Хрватска и Словенија, а други спонзори се САД, Велика Британија, Франција, Турција, Канада, Шведска, Данска, Албанија, Австрија, Бангладеш, Белгија, Бугарија, Чиле, Естонија, Финска, Ирска, Италија, Јордан, Лихтенштајн, Литванија, Луксембург, Малезија, Холандија, Нов Зеланд, Полска и Вануату.
Најавата за усвојување на резолуцијата предизвика жестоки реакции во Србија и во Република Српска. Тврдат дека тоа е обид да им се наметне колективна вина за воени злосторства, иако во нацрт-документот не се споменува ниту една нација или држава, туку само се наведува потребата од трајно сеќавање на жртвите од геноцидот во Сребреница врз основа на факти содржани во пресудите на меѓународните судови, кои за тоа злосторство осудија поединци.
Доколку резолуцијата биде прифатена, 11 јули ќе биде воспоставен како меѓународен ден за сеќавање на жртвите од геноцидот во Сребреница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
(Видео) Тешка сообраќајка во Грција: бебе меѓу загинатите
![](https://makfax.com.mk/wp-content/uploads/2024/07/Screenshot-2024-07-26-204400.jpg)
Тешка трагедија се случи во петокот попладне на автопатот Пиргос – Кипарисија, во близина на Месинија во Грција, кога четири лица, меѓу кои 12-месечно бебе и 13-годишно девојче, кои се наоѓале во два автомобили, загинаа во сообраќајма несреќа, пишува „Protothema“.
До несреќата дошло кога 39-годишниот камионџија, кој возел во правец на Кипарисија, од засега непозната причина изгубил контрола, излетал во спротивен правец и налетал на три возила, предизвикувајќи трагични последици.
Според написите, камионот всушност буквално ги стопил двете возила кои учествувале во несреќата. Противпожарната служба со 12 пожарникари ги извлекла настраданите.
Според информациите, во првиот патнички автомобил кој се судрил со камионот било семејство кое живее во странство и отпатувало за Нафплио за да се види со роднините и на одмор на Пелопонез. Во него се пронајдени мртви 38-годишен татко и 12-месечна ќерка, а повредени се 38-годишна мајка и нивниот шестгодишен син, кои се пренесени во болницата во Патра.
Од второто возило кое било заглавено под камионот извлечени се маж (50), девојка (13) и жена (60), кои се здобиле со тешки телесни повреди.
Повредени се и 25-годишен маж кој бил интубиран во Каламата, 39-годишен камионџија и 61-годишен маж, и двајцата се на лекување во болницата Кипарисија.
Затворен е магистралниот пат Пиргос – Кипарисија, а сообраќајот се пренасочува по заобиколен пат.
Регион
Едно лице загина во експлозија во магацин за огномет во Бугарија, ќерка му е со 85 отсто изгореници
![](https://makfax.com.mk/wp-content/uploads/2024/07/3-13.jpg)
Едно лице загина во експлозија во магацин за огномет во близина на бугарскиот град Елин Пелин, недалеку од Софија, изјави денеска бугарскиот министер за внатрешни работи, Калин Стојанов.
Мажот (49), кој почина во експлозијата, добил тешки изгореници и синоќа бил хоспитализиран, а неговата 20-годишна ќерка, која исто така е во болница со 85 отсто изгореници, сѐ уште е во критична состојба, пренесува порталот „Новините“.
Стојанов рече дека во магацинот во кој се случила експлозијата може да има уште две лица, меѓу кои и 22-годишниот син на сопственикот на магацинот.
Регион
Дете починало 7 дена по операција на крајници во Хрватска
![](https://makfax.com.mk/wp-content/uploads/2024/07/23.jpg)
Седумгодишно дете почина вчера, една недела по операцијата на крајници, која беше извршена во Клиничката болница „Свети дух“ во Хрватска.
Седум дена по извршената операција на Клиниката за оториноларингологија и хирургија на глава и врат и шест дена по отпуштањето од болница, детето во раните утрински часови било донесено утрово без витални знаци.
Веста за смртта на детето во рок од 24 часа ја потврди директорот на болницата, д-р Игор Алфиревиќ.
„За жал, точна е информацијата дека во четвртокот, 25 јули 2024 година, по реанимација во Обединетата итна болница на Клиничката болница „Свети дух“ почина седумгодишно дете“, рече тој.
Во тек е истрага, а телото на детето е испратено на обдукција.