Регион
Осомничениот за убиството на малата Данка тврди дека полицијата му го изнудила исказот
Срѓан Јанковиќ – еден од двајцата осомничени за убиството на Данка Илиќ во Бањско поле, беше сослушан на почетокот на јуни во Вишото јавно обвинителство во Заечар.
Јанковиќ тогаш потврдил дека кобниот ден бил во тоа село во околината на Бор со неговиот колега од ЈКП „Водовод“ Дејан Драгијевиќ, но и негирал дека тој ден двајцата ја виделе Данка Илиќ, и дека удриле неа со службено возило.
Но, она што остана незабележано се тврдењата на осомничениот Јанковиќ дека изјавата во полиција му била изнудена, поради што Вишото јавно обвинителство Заечар отворило предмет, дознава Нова.рс.
Според информациите на српскиот портал, Срѓан Јанковиќ на рочиштето пред обвинителот истакнал дека исказот што го дал во полиција бил изнуден, како и дека негира се што кажал претходно.
„Вишото јавно обвинителство Заечар отвори предмет поврзан со околностите кои осомничениот Срѓан Јанковиќ ги изнесе на распитот во ова обвинителство, а поврзан со околностите на полицискиот распит“, велат од обвинителството за Нова.рс.
Како што додаваат, рочиштето на Јанковиќ, кое е закажано за утре, нема врска со овие наводи, туку ќе се сослуша за околностите на кривичното дело тешко убиство. На претходното рочиште, кое се одржа на почетокот на јуни, Јанковиќ негираше дека ја видел Данка Илиќ на 26 март.
Срѓан Јанковиќ и Дејан Драгијевиќ се осомничени дека со службеното возило во Бањско поле ја удриле Данка Илиќ, ја ставиле во автомобил и ја однеле на блиската депонија.
Неколку дена по злосторството, Драгијевиќ, наводно, се вратил на депонијата и со помош на неговиот брат Далибор и таткото Радослав го префрлиле телото на друга локација. Во меѓувреме, Далибор и Радослав Драгијевиќ беа приведени, а Далибор почина во полициска станица.
Телото на Данка Илиќ се уште не е пронајдено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Фон дер Лајен: Србија е еден од најнапредните кандидати за членство во ЕУ
Србија е една од најнапредните земји во процесот на пристапување во Европската унија и на неа е да избере брзина на пристапување, изјави претседателката на Европската комисија Урсула фон дер Лајен по состанокот со српскиот претседател Александар Вучиќ во Белград.
Фон дер Лајен рече дека партнерството меѓу Србија и Европската унија станува се посилно, а ЕУ е првиот трговски партнер и инвеститор на Србија.
Напредокот на Србија на европскиот пат и почетокот на имплементацијата на Планот за раст на Западен Балкан беа во фокусот на разговорот меѓу Вучиќ и Фон дер Лајен.
„Планот за раст треба да ги приближи економиите од Западен Балкан до нашата и постепено да го интегрира регионалниот пазар со единствениот европски пазар. Принципот е многу едноставен. Ги отвораме вратите на единствениот пазар на Европската унија во одредени сектори за српските компании, а за возврат треба да се спроведат одредени реформи заради фер услови на пазарот“, рече Фон дер Лајен.
Регион
Земјотрес со јачина од четири степени ја погоди Албанија
Земјотрес со јачина од четири степени според Рихтеровата скала вечерва ја погоди Албанија, соопшти Европско-медитеранскиот сеизмолошки центар (EMSC).
Земјотресот се случил на длабочина од пет километри, додава EMSC.
Епицентарот на земјотресот е регистриран на 11 километри источно од градот Фјер, каде живеат околу 60.000 луѓе.
Регион
Вучиќ со Фон дер Лајен: Сѐ додека јас сум претседател, Србија ќе остане на европскиот пат
Претседателот на Србија, Александар Вучиќ, денеска изјави дека сѐ додека тој е претседател на државата, Србија нема да ги промени своите главни надворешнополитички цели, а тоа се европскиот пат и определбата за членство во ЕУ.
На заедничката прес-конференција со претседателката на Европската комисија, Урсула фон дер Лајен, која е во дводневна посета на Србија, Вучиќ рече дека европскиот пат е од клучно значење за напредокот на земјата, дека Србија посветено работи на тој пат и се надева на резултати.
Тој истакна дека имал многу долг, крајно отворен и искрен разговор со Фон дер Лајен и дека има работи за кои Европската Унија ја критикува Србија, но дека претседателот на ЕК секогаш бил подготвен да ја сослуша нивната страна.
Како што рече, разговарале за определбите на Србија.
„Јас ѝ го кажав истото тоа што ви го кажав вчера. Колку и да размислуваат поинаку некои луѓе, јас сум претседател на Републиката со највисок легитимитет во државата, избран директно од граѓаните двапати по ред во првиот изборен круг, што никогаш не се случило во нашата историја, а додека јас сум претседател, нема промена на главните цели на нашата надворешна и внатрешна политика. Тоа значи дека нашиот европски пат е и наше застапување за европска Србија и е од клучно значење за нашиот напредок, дека Србија ќе се посвети на работа на тој пат и дека се надеваме на резултати“, изјави Вучиќ.
Тој ѝ честита на Урсула фон дер Лајен за нејзиниот реизбор на функцијата претседател на Европската комисија и ѝ се заблагодари за поддршката што ѝ ја дала на Србија во претходниот мандат и додаде дека се надева оти тоа ќе продолжи да го прави и во овој мандат, пренесува „Танјуг“.
„Има една работа што луѓето во Србија многу ја почитуваат. Кога ни доаѓаат гости, речиси сите доаѓаат во Белград кога се во прашање високи делегации, официјални посети во нашата земја и двапати отидовме далеку од Белград, далеку од урбаните средини, а тоа е нешто што нашите граѓани, нашиот народ, исклучително го почитуваат и ценат, ви благодариме за поддршката и помошта што ни ја дадовте во претходниот период“, рече Вучиќ.