Во последните 24 часа во Србија се регистрирани 7.919 случаи на коронавирус од 22.069 тестирани, починале 52 лица, а 270 пациенти се приклучени на апарати за дишење.

Поради тешката состојба со пандемијата на коронавирус во Србија, најавени се нови мерки. Претходно државниот секретар на Министерството за здравство, Мирсад Џерлек, рече дека се очекува утре Владата да донесе нови мерки против коронавирусот и дека тие ќе стапат на сила в петок. Тој истакна дека ситуацијата од ден на ден се влошува и тоа е сигнал за реакција бидејќи е очигледно дека постојните мерки не ги дадоа посакуваните резултати.

„Фајзер“ и „Бионтек“ денеска ќе ја достават потребната документација за регистрација на вакцината во Србија до Агенцијата за лекови и медицински помагала.

Градот Тебу во централна Грција денеска го потресе силен земјотрес со јачина од 4,5 степени по Рихтер.

Потресот бил почувствуван на целиот полуостров Атика, а според податоците на Институтот за геодинамика на Националната опсерваторија во Атина, епицентарот на потресот се наоѓал на 11 километри источно од Тебу, пренесе агенцијата АНА.

Нема информации за материјална шетата и повредени луѓе.

Поранешниот претседател на Косово, Хашим Тачи, ќе го бранат пет адвокати пред Специјалниот суд во Хаг, пишува „Коха“.

Специјализираниот совет објави документ со кој се одобрува ангажирање на дополнителни адвокати за Тачи.

„Коха“ наведува дека на списокот на адвокати на Тачи се Софи Менегон, Дејвид Хупер, Дастид Паласка, Семјуел Блум Купер и Пјер Ричард Проспер.

Поранешниот косовски претседател е обвинет за воени злосторства и злосторства против човештвото, убиства, прогони и тортури извршени за време на конфликтот во Косово.

Тој беше уапсен на 5 ноември и пренесен во затворот на Специјалниот суд во Хаг.