Регион
Србите во Косово бараат преседан како во Македонија

Кандидатот за премиер на Косово од победничката коалиција ПАН, Рамуш Харадинај, се соочува со тешка дилема. Тој може да се обиде да формира влада со малцинските заедници и двајца тројца пратеници од другите партии и на тој начин да остане зависен од Белград преку партијата Српска листа, или да се обиде да постигне договор со коалицијата предводена од Демократската лига на Косово (ЛДК) давајќи и ги половина од местата во владата. Алитичарите сметаат дека првата опција би била најлошото решение за Косово, при што Харадинај најави дека е убеден дека ќе формира влада многу скоро.
Шефот на Канцеларијата за Косово во српската влада, Марко Ѓуриќ, во меѓувреме порача дека косовските Срби треба да добијат една од трите водечките позиции во Косово, како што се претседател, претседателот на Собранието или претседател на Владата. За време на ТВ-дебата во Србија, Ѓуриќ, рече дека ова секако нема да биде лесно, но ако меѓународните претставници веќе поддржаа вакво нешто во Македонија, зошто да не поддржат и во Косово. Тој алудираше на изборот на Талат Џафери за претседател на македонскиот парламент.
Косовските медиуми денес шпекулираа дека коалицијата предводена од Демократската лига за Косово размислува да даде поддршка на новата влада, но самата да замине во опозиција, за да се консолидира по лошите резултати од изборите. Кандидатот за премиер од оваа партија, Абдула Хоти, еден ден претходно ја исклучи можноста од заедничко владеење со коалицијата на Харадинај.
Дипломатите, од друга страна, побараа во Приштина да се формира „сеопфатна и стабилна влада„. Од амбасадата на Обединетото кралство порачаа дека е важно да се создаде стабилна влада која ќе се справи со важните процеси што го очекуваат Косово.
” На Косово му треба влада со демократски легитимитет која би можела да протурка итни и неодложни работи во борбата против корупцијата и зајакнувањето на владеењето на правото, како и да привлече инвестиции и да отвори работни места “,порачаа од оваа амбасада.
Официјалните претставници на ЕУ, пак, порачаа дека кој и да ја формира новата влада на Косово, треба да го продолжи дијалогот со Србија и да ги спроведе договорите постигнати досега во процесот.Сепак, од таму најавија дека форматот на преговорите на Косово со Србија веројатно ќе се смени и дека отсега тој ќе биде на ниво на претседатели. Косовските медиуми тврдат дека во ЕУ не се сигурни дека Хашим Тачи има доволно авторитет за да го преземе дијалогот за разлика од Србија, каде што ќе остане во надлежност на Александар Вучиќ, кој излезе како неприкосновен лидер на последните претседателски избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вјоса Османи: Србија не го почитува договорот од Охрид

Косовската претседателка Вјоса Османи порача дека Косово нема да се откаже од основниот договор и дека Србија мора да почитува сè што е договорено во Охрид, пишува „Косово онлајн“.
„Српската страна не почитува ниту еден договор произлезен од дијалогот“, изјави Османи за приштинските медиуми.
„Србија и по 24 часа од средбата во Охрид, не го почитуваше договорот, како што беше случај и во февруари, што докажува дека дијалогот за неа нема никаква политичка или правна вредност. Текстот на основниот договор останува ист и не се менува, така што членот 4 од тој договор, кој ја обврзува Србија да не се противи на членството на Република Косово во ниту една организација, останува во сила“, рече Османи.
Регион
Претседателот на Албанија го повика Ватикан да го признае Косово

Претседателот на Албанија, Бајрам Бегај, имаше средба со секретарот на Светата столица за односи со држави и меѓународни организации, надбискупот Пол Ричард Галагер, кој е во официјална посета на Албанија.
Истакнувајќи ги одличните односи меѓу Албанија и Ватикан, но и духовните односи на албанската католичка заедница и Светата столица, Бегај ја поздрави посетата на Галагер на Тирана и оцени дека тоа е потврда за добрите односи.
Бегај особено се осврна на исклучителната улога и придонес што Светата столица ја имал во напорите за постигнување мир и стабилност во регионот на Западен Балкан.
Во тој контекст тој го повторил барањето за признавање на Косово од страна на државата Ватикан, признание, кое, како што наведе, ќе послужи како голема поддршка за најновата држава во Европа.
Бегај ја истакнал потребата од зголемена поддршка од сите важни актери за Косово и неговите граѓани, како и за дијалогот меѓу Косово и Србија, кој е поддржан од Европската Унија и САД.
Соговорниците се осврнале и на влијанието на руската воена агресија врз Украина на Балканот и на свеста за значењето што овој регион го има за стабилноста на европскиот континент, се наведува во соопштението.
Регион
Додик за својот роденден доби портрет на кој Република Српска е присоединета кон Србија

Милорад Додик, претседател на Република Српска и лидер на СНСД, денеска престојува во Требиње, каде што официјално ќе го отвори Самитот за енергетика. На овој настан од галеријата „Артем“ му подарија слика за неговиот роденден.
Имено, на сликата подарена на Додик по повод неговиот 64-ти роденден може да се види неговиот портрет, а во горниот десен агол на сликата е мапа, на која е прикажан помалиот ентитет на БиХ, Република Српска како дел од Србија.
Хвала Светлани Мајхофер, власници Артем галерије. Данас ми је за рођендан поклонила портрет, уље на платну академског сликара Богдана Радовића. pic.twitter.com/59WFJDgXeQ
— Милорад Додик (@MiloradDodik) March 22, 2023
„Ѝ благодарам на Светлана Мајхофер, сопственичка на галеријата ‘Артем’. Денеска за роденден ми подари портрет, масло на платно на академскиот сликар Богдан Радовиќ“, напиша Додик на „Твитер“ и ги пофали фотографиите.