Турскиот премиер Бинали Јилдирим го оцени како „продуктивен“ телефонскиот разговор со германската канцеларка Ангела Меркел, пренесуваат турските медиуми, и покрај тензиите меѓу Анкара и Берлин, поради откажувањето да собирите за поддршка на турскиот претседател Реџеп Тајип Ердоган во Германија.

„Нашиот разговор беше добар и продуктивен. Нашите министри за надворешни работи ќе се сретнат следната седмица“, истакна турскиот премиер Бинали Јилдирим, пренесе телевизијата CNNTurk.

Шефовите на дипломатиите на Турција и на Германија, Мевлут Чавушоглу и Зигмар Габриел, во текот на нивниот телефонски разговор во петокот договориле состанок во среда, откри за медиумите висок турски функционер.

Односите меѓу Анкара и Берлин повторно ги карактеризираат тензии откако властите во Германија на бројната тамошна турска заедници ѝ го откажаа одржувањето на трите собири за поддршка на референдумот со кој во Турција треба да бидат зголемени овластувањата на претседателот на земјата.

„Тоа и не е најсреќната одлука, бидејќи е против демократијата и човековите слободи“, изјави претходно во саботата Јилдирим на собирот во кампањата за референдумот во Киршехир, алудирајќи на одлуката на германските власти.

Турскиот премиер ја обвини Германија дека на оние коишто се противат на референдумот и зголемувањето на претседателските овластувања им се овозможува кампања, а им се забранува на „оние коишто ја сакаат својата земја“.

Турција жестоко регираше на откажувањето на собирите во четвртокот и петокот, обвинувајќи го Берлин дека работи на тоа одржувањето на референдумот да не успее.

Канцеларката Меркел на тоа одговори дека тие одлуки не го одразуваат ставот на сојузната држава, туку дека се донесени на локално ниво.

Турбулентните односи меѓу Германија и Турција траат веќе втора година, а особено откако германските пратеници изгласаа резолуција прогласувајќи го масовните убиства на Ерменци во текот на Првата светска војна за геноцид од страна на Османлиското царство, што Анкара не го прифаќа, па потоа пораснаа и поради критиките на Берлин на турскиот одговор на неуспешниот обид за државен удар од 15-ти јули 2016 година, а дополнително пораснаа откако во понеделникот беше затворен германско-турскиот дописник на весникот Die Welt во Турција, Дениз Јучел./крај/мф/сн