Идната членка на НАТО, Црна Гора, чии четири воени авиони се на продажба, а двата оперативни воени бродови скоро и да не го напуштаат пристаништето, тешко дека е „импресивна воена сила“, коментира АР.

Црна Гора со две илјади војници, притисната преку високите планини и Јадранското море, тешко дека би можела да ја унапреди одбраната на Западот во било каква конфронтација со Русија.

Покрај големината на земјата и недостатокот од воена сила, Црна Гора се наоѓа во напната состојба поради несогласувањата на Западот и Русија за влијанието на Балканот, а исходот од ова би можел да го одреди правецот на целиот балкански регион – кон ЕУ, НАТО и интеграција со Западот, или кон Русија, наведува АР.

„Јасно е дека тензиите помеѓу истокот и западот оставија последици на политичката и безбедносна состојба на западен Балкан“, рекол поранешниот црногорски премиер Мило Ѓукановиќ во интервју за агенцијата АР.

Ѓукановиќ ја повикал ЕУ да го сопре „деструктивното“ влијание на Русија на Балканот, вклучувајќи ја и кампањата за дезинформирање, по неодамнешниот обид за државен удар на изборниот ден во Црна Гора.

Црногорското обвинителство ја обвини Русија и оперативците од нејзините тајни служби за обид за државен удар на 16-ти октомври минатата година, на изборниот ден во Црна Гора, вклучувајќи и за планирање на атентат врз Ѓукановиќ.

Црна Гора беше верен сојузник на Русија до одвојувањето од Србија по референдумот во 2006-та година, кога државата со 620 илјади население направи силен пресврт кон евроатланските интеграции, потсетува АР.

Русија силно се противи на експанзијата на западната воена алијанса во регионот кој го смета за дел од стратшката „сфера на интерес“, додава агенцијата.

Црна Гора е на прагот на членство во НАТО и досега пристапниот протокол за членство го потврдија 25 од 28-те членки на Алијансата, а преостанува тоа да го направат САД, Холандија и Шпанија./крај/мф/бс