Регион
Балканот ќе биде како под вршник, летото ќе биде пеколно, сушно и со екстремни бури

Балканот ова лето ќе се соочи со рекордно високи температури и екстремни временски услови. Долгорочните прогнози најавуваат топло лето и топлотни бранови. Друга опасност е што просечните температури на Балканот се зголемени за речиси два Целзиусови степени, а поради тоа се почести се сушите, бурите и суперклеточните бури. Метеоролозите предупредуваат дека Балканот станува се посув, а екстремните временски настани стануваат се почести и деструктивни.
Во извештајот на Светската метеоролошка агенција на Обединетите нации се наведува дека глечерите ширум светот се намалиле повеќе од кога било меѓу 2011 и 2020 година. Повеќе од 75 отсто од мразот на Антарктикот е изгубен во споредба со претходните 10 години, а оваа загрижувачка вест може да влијае на се поекстремните временски услови на Балканот на кои веќе сме сведоци.
Пред нас е пожешко лето од кога било досега. Ефектите од овие промени се веќе евидентни на Балканот, што го потврдија метеоролозите. Просечната годишна температура е зголемена за речиси 2 Целзиусови степени, што е побрзо од глобалниот просек. Според прогнозите, годинава може да очекуваме топло лето со малку врнежи, а првите топлотни бранови ќе се појават во јули.
Како што се наведува во долгорочната прогноза, потопло од просечното време се очекува во текот на јуни, јули и август. Во балканските градови просечната максимална температура на воздухот во текот на јуни ќе изнесува околу 27,7 степени.
Првиот топлотен бран во јули
Во јули се најавуваат првите топлотни бранови, а просечната температура ќе биде од 19 до 30 степени.
Просечната минимална температура на воздухот во јули се очекува да биде над повеќегодишниот просек, па така во балканските градови, на пример, просечната минимална температура на воздухот во јули ќе изнесува околу 18,9 степени.
Просечната максимална температура на воздухот во јули ќе биде над повеќегодишниот просек, па во балканските градови се очекува да биде просечно околу 30,3 степени.
Во текот на јули нè очекува сушен период – ќе биде многу топло, а врнежите ќе бидат нешто помали од вообичаеното.
И во август е топло и нема дожд
Топлотни бранови може да очекуваме во текот на август, кога исто така ќе има помалку врнежи од вообичаено.
Просечната минимална температура на воздухот во август ќе биде над повеќегодишниот просек – во балканските градови ќе биде најмалку околу 18 степени.
Просечната максимална температура на воздухот во август ќе биде над повеќегодишниот просек низ Балканот. Во балканските градови просечната максимална температура на воздухот ќе има вредност околу 30,2 степени.
Ситуацијата е сериозна, Балканот станува пустина
Метеоролозите нагласуваат сериозноста на ситуацијата, предупредувајќи дека Балканот е на пат кон најлошите сценарија на глобалното затоплување.
Доколку не се преземат решителни мерки за намалување на емисиите на стакленички гасови, до 2065 година температурата може да се зголеми за 2 степени Целзиусови, додавајќи дека отсуството на превентивни мерки може да доведе до пораст на температурата за дури 4 степени до крајот на векот.
Исто така, експертите објавија мапа на која е прикажано како би изгледал светот кога просечната годишна температура би била за четири степени повисока.
Портокаловата боја ги означува подрачјата на „ненаселлива пустина“, кои го опфаќаат целиот Балкански Полуостров, Австрија, Унгарија, Германија, Шпанија, Португалија… Реките пресушија и повеќе нема снег на Алпите, предвидува мапата.
Колку е важен тој 1 степен?
Светот се соочува со најголемите предизвици поврзани со глобалното затоплување. Летата стануваат се поекстремни, а топлотните бранови ги уриваат сите рекорди. Ова само значи дека во иднина можеме да очекуваме се поекстремни временски услови, високи температури и екстремни суперклеточни бури.
А колку е опасно ако планетата се загрее за тој степен најдобро објаснија климатолозите:
„Кога човек има телесна температура од 36 степени, тоа е во ред, кога температурата е 37, тоа е аларм, а со температура од 38 степени не ви е добро“.
Климатолозите предупредуваат дека зголемените глобални температури предизвикуваат системски промени.
„Кога планетата е за 1 степен потопла, тоа значи дека ќе има поекстремни климатски настани. Затоа сме зафатени од суши, шумски пожари, екстремни врнежи и поплави кои само ќе станат поинтензивни и полоши во иднина. Ќе претрпиме поголема штета и дефинитивно ќе ни биде помалку удобно на планетава“, велат метеоролозите.
Екстремни температури, невреме со суперклеточни бури, пожари…
Климатолозите истакнуваат дека летото 2023 година било најтопло досега, со рекордни температури кои надминуваат 1,5 степени над просекот.
Зголемувањето на температурата во текот на овој месец било до 2,8 степени повисоко од лани. Според податоците на хидрометеоролошките служби, во последните 71 година на Балканот само летата 2017 и 2012 година биле потопли од летото 2022 година.
Иако јули 2023 година се карактеризираше со екстремно високи просечни месечни температури на воздухот, Балканот во периодот од 19 до 22 јули беше зафатен од неколку невреме и грмотевици, придружени со обилни врнежи од дожд, налети на ветер и голем град со големина од два до пет сантиметри, а локално и со пречник над пет сантиметри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Третата најголема партија во Бугарија потпиша соработка со партијата на Путин

Националистичката бугарска партија „Преродба“ потпиша договор за соработка со владејачката партија на Руската Федерација „Единствена Русија“. Ова се случи и покрај фактот што Русија официјално ја прогласи Бугарија за непријателска држава по почетокот на сеопфатната инвазија на Украина, дознава „Еурактив“, а пренесува УНН.
„Договорот предвидува размена на искуства, идеи и политичка пракса меѓу двете партии и претставува важен позитивен чекор кон обновување на целосните бугарско-руски односи“, наведуваат од партијата „Преродба“.
Договорот го потпишаа заменик-претседателот Цончо Ганев, кој е и потпретседател на Народното собрание и Владимир Јакушев – заменик претседател на Горниот дом на Државната дума на Руската Федерација.
Како што пишува УНН, „Преродба“ нема ништо против тоа што Русија ја прогласи Бугарија за непријателска држава по почетокот на војната во Украина и продолжува да ги одржува односите со владејачката партија.
Според достапните информации, „Преродба“ е третата по големина партија во бугарскиот парламент: по изборите во октомври 2024 година има 33 мандати од вкупно 240. Партијата отворено се противи на членството на Бугарија во ЕУ и НАТО, се залага за неутралност во војната на Русија против Украина и шири проруски наративи на социјалните мрежи.
Претходно таа неуспешно се обиде да организира референдум за забрана на воведувањето на еврото.
Исто така, оваа партија влезе во бугарскиот парламент благодарение на нејзиниот цврст став против вакцините и карантинот за време на пандемијата на Ковид.
Регион
Вучиќ: Ќе се сретнам двапати со Трамп во наредните денови

Претседателот на Србија, Александар Вучиќ, синоќа изјави дека во следните три до четири дена ќе се сретне двапати со претседателот на Соединетите Американски Држави, Доналд Трамп, јавува Анадолу.
„Ќе се сретнам двапати, од различни причини, во следните четири дена. Не ми верувајте на збор, ги измешав датумите и временските зони“, рече Вучиќ за време на обиколката на работите во новата детска клиника „Тиршова 2“, одговарајќи на новинарско прашање за тоа кога ќе се сретне со американскиот претседател, додавајќи дека „сè ќе се случи во следните три или четири дена“.
Тој, исто така, најави дека очекува италијанската премиерка Џорџa Мелони да го посети Белград во август или септември, која ја опиша, заедно со претседателката на Европската комисија, Урсула фон дер Лајен, како една од најмоќните жени во светот.
Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.