Регион
Брнабиќ: Ако ЕУ се залага за владеење на правото, нека го почитува и самата

Премиерката на Србија, Ана Брнабиќ, оцени дека извештајот на Европската комисија за напредокот на Србија главно гледано е позитивен, но, сепак, има неколку работи што се нејасни. Брнабиќ особено ја критикува ЕУ дека применува двојни аршини кога станува збор за Косово.
„Загрижена сум од недостигот од конкретна реакција на ЕУ за сето она што се случува. Пред сѐ, денеска е 2.226. ден од потпишувањето на бриселскиот договор и обврската за формирање на заедницата на српските општини (ЗСО). Брисел е гарант на договорот и ЕУ гарантира негова примена“, нагласи Брнабиќ, пренесе „В92“.
Таа изрази загриженост и за недостигот од реакција на инцидентите, меѓу кои и за вчерашниот, и нагласи дека Приштина ги крши ЦЕФТА-спогодбата и Спогодбата за стабилизација и асоцијација со ЕУ.
Брнабиќ е децидна дека ова не е ЕУ во која таа верува.
„Ако ЕУ се залага за владеењето на правото и ако толку инсистира на тоа, нека инсистира на владеењето на правото и кога се тие во прашање. Нека гарантира примена на бриселскиот договор и на ЗСО“, истакна Брнабиќ и потенцира дека Србија продолжува по својот европски пат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Две жени се удавија во морето во Бугарија

Два смртни случаја во вода се регистрирани денес на јужниот брег на Црното Море.
Околу 12.50 часот 56-годишна жена од Софија се удавила во незаштитениот дел од плажата „Делфин“ во близина на Ахтопол.
Еден час подоцна, околу 13.20 часот, на јужната плажа во Поморие, во морето почина 72-годишна туристка од Финска, која пристигнала во Бугарија на 16 август со својот сопруг.
Во двата случаја телата се однесени на обдукција во Одделот за судска медицина при Универзитетската болница во Бургас. Работата за расветлување на околностите продолжува.
Регион
Политичар почина на плажа на Халкидик

Апостолос Везиропулос, поранешен заменик-министер за финансии на Грција и актуелен генерален секретар на парламентарната група на Нова демократија, почина ненадејно на 59-годишна возраст кога доживеа срцев удар на плажа на Халкидик.
Според грчките медиуми, Везиропулос се разболел во саботата и иако брзата помош пристигнала бргу и го пренела во Здравствениот центар „Агиос Николаос“, лекарите не успеале да го спасат, објавува „Нова.рс“.
Везиропулос беше долгогодишен пратеник од Иматија, а од април оваа година е генерален секретар на парламентарната група на Нова демократија. Претходно, тој беше претседател на Постојаната комисија за економски прашања на парламентот, а од 2019 до 2023 година беше заменик-министер за финансии задолжен за даночната политика и јавните средства во владата на Киријакос Мицотакис.
Веста за неговата смрт длабоко го потресе премиерот Мицотакис, кој изрази сочувство до семејството и истакна дека Везиропулос бил „вреден колега и сакан политичар, кој со децении им служел и на својата партија и на својата татковина“.
Роден во Верија, по потекло од Александрија, беше оженет со професорката Катерина Кацава и татко е на две деца. Имаше два магистерски степена – по стратешко менаџерско сметководство и финансиско управување, како и по јавно право и политички науки. Исто така, беше докторанд на Правниот факултет при Универзитетот „Демокрит“ во Тракија.
Регион
(Видео) Кралски питон снимен на улица во Загреб

Во загрепската населба Кајзерица вчера вечерта човек наишол на кралски питон како талка по улицата. Ја снимил змијата и го објавил видеото во соседските групи во обид да го пронајде нејзиниот сопственик.
Еден од членовите на групата вклучен во безбедното враќање на змијата потврдил за „Дневник.хр“ дека сопственикот е пронајден.
„Ја најдовме сопственичката и змијата ќе ѝ биде вратена. Пред да ја најдеме сопственичката, стапив во контакт со Зоолошката градина во Загреб. Од таму ни кажаа дека можеме да им ја доставиме змијата, но бидејќи сопственичката во меѓувреме ни се јави, проблемот е решен“, рече тој.