Регион
Брнабиќ: Одржувањето нови избори е демократско решение за актуелната ситуација

Претседателката на српскиот парламент, Ана Брнабиќ, смета дека одржувањето нови избори би било демократско решение за актуелната ситуација во земјата додавајќи дека српската парламентарна опозиција нема легитимитет.
Брнабиќ оваа изјава ја даде по падот на српската влада и оставката на премиерот Милош Вучевиќ додавајќи дека преодната влада, која дел од опозицијата ја предлагаат како решение за кризата, треба да се нарече телепортска влада затоа што би послужила како машина за телепортирање на опозицијата на министерски позиции.
Српскиот претседател Александар Вучиќ изјави вчера дека по падот на владата, има две опции: формирање нова влада во законскиот рок или одржување предвремени избори, но дека во следните десет дена ќе донесе одлука дали ќе има избори или формирање нова влада.
Брнабиќ посочи и дека парламентарната опозиција повеќе не застапува никого, што е огромен проблем, наведувајќи дека, од друга страна, прашање е дали изборите би решиле нешто.
„Тешко дека по оваа влада, некогаш ќе го имаме времето што го имавме пред 2012 година кога немаше политичка одговорност, сега имаме примери на кои сите ќе се повикуваат“, додаде Брнабиќ.
Лидерите на одредени опозициски партии и движења, реагирајќи на оставката на премиерот Вучевиќ и падот на владата, порачаа дека сега не се работи за избори, дека првин треба да се исполнат сите барања на студентите.
Српскиот премиер Милош Вучевиќ поднесе неотповиклива оставка поради студентските и граѓанските протести, кои траат речиси три месеци барајќи од властите да одговараат за несреќата во Нови Сад кога се урна натстрешникот на железничката станица, при што загинаа 15 лица луѓе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Во Бугарија и Романија на сила црвен метео аларм поради обилни дождови

Во Бугарија и Романија на сила е црвен метео аларм поради обилни дождови. Обилните дождови продолжија да ја погодуваат Бугарија, што доведе до затворање на патишта, прогласување црвен метео аларм во неколку области, а 51 населено место останаа без електрична енергија поради бурата. Надлежните органи го интензивираат надзорот над сите мостови и инфраструктура што е потенцијално оштетена од поплавите, пишува денес „Новините“. Службениците предупредија дека секоја локација што е изложена на ризик ќе биде веднаш затворена.
Граѓаните се повикуваат да бидат внимателни, да избегнуваат патувања и да ги следат упатствата на надлежните служби. Бугарскиот национален институт за метеорологија и хидрологија прогласи црвен метео аларм, највисоко ниво на предупредување, за осум области каде што се очекуваат повеќе од 65 литри дожд на квадратен метар, пренесува Танјуг.
Во исто време, властите објавија дека Бугарија ќе побара помош од Европскиот фонд за солидарност за погодените места поради предизвиканите штети.
Метеоролозите во Романија денес го продолжија црвениот временски аларм поради предвидените обилни врнежи од дожд за пет области и градот Букурешт со можност за врнежи до 140 литри на квадратен метар.
Според најновото предупредување на Романската национална метеоролошка управа (ANM), од 21 часот на 7 октомври до 15 часот на 8 октомври се очекуваат обилни врнежи од дожд во неколку области, пишува романската новинска агенција Аѓерпрес.
Фото: принтскрин
Регион
Убиен судија на Апелациониот суд, во судница во Тирана

Судијата Астрит Каљаја беше убиен денес во Апелациониот суд во Тирана додека траеше рочиштето.
Напаѓачот, засега непознат, влегол во судницата и го застрелал Каљаја, кој бил однесен во болница каде што му била пружена медицинска помош, објавува „Албанија пост“.
На местото на настанот, според медиумот, има бројни полициски сили, кои веднаш го уапсиле осомничениот сторител, а како што се наведува, идентитетот на напаѓачот и мотивите на нападот засега се непознати.
Судијата Астрит Каљаја служел со години во албанскиот судски систем, а неодамна во Апелациониот суд во Скадар.
Тој го поминал процесот на верификација во 2019 година, каде што бил потврден на функцијата од Независната квалификациска комисија, а потоа и од Специјалниот жалбен панел во 2022 година.
Фото: принтскрин
Регион
Пронајдени се телата на браќата од Хрватска во словенечките Алпи

Словенечките планински спасувачи ја продолжија својата акција утрово под врвот Тошќ, во Јулиските Алпи, каде што вчера лавина затрупа тројца хрватски планинари.
Исчезнатите лица, по кои се трагаше од вчера, за жал се пронајдени мртви, објавува словенечки 24ur. Како што неофицијално дознава словенечкиот медиум, двајца од нив биле браќа.
„Ги пронајдовме двајцата – едниот беше закопан околу еден метар во снегот, а другиот околу метар и пол. Првиот успеавме да го транспортираме во долината со хеликоптер, додека сè уште чекаме транспорт за вториот. Самиот терен е многу тежок бидејќи е карпеста, стрмна клисура со бројни карпести скокови, што ја направи работата опасна и тешка за спасувачите. За жал, ќе кажам дека сите тројца планинари што ги пронајдовме во лавината починаа. Им изразувам искрено сочувство на нивните семејства“, рече тој.