Регион
(Видео) Дачиќ: Нема да дозволиме српски жртви поради неподготвеноста на меѓународната заедница

Министерот за надворешни работи на Србија, Ивица Дачиќ, изјави денеска дека меѓународната заедница сега треба да преземе се што ѝ налагаат законите и меѓународните обврски, односно да обезбеди безбедност и стабилност за Србите на Косово.
Во интервју за РТС, Дачиќ изјави дека ескалацијата на неодговорното однесување на Приштина, што предизвикува конфликтни ситуации, трае со месеци.
„Наместо нормализација, постојано имаме ескалација предизвикана од Аблин Курти и деескалација на кој работи дел од меѓународната заедница. Резултатот од тоа е подмолен план: на Курти му се дозволува да направи нешто, меѓународната заедница божем протестира, а потоа тоа останува завршена работа од едностран карактер за која се надеваат дека ќе стане политичка реалност“, објаснува Дачиќ.
Дачиќ нагласи дека улогата на КФОР не е да протестира, туку да спречи унилатерален чин и дека не е улога на КФОР да стои пред општинските згради и да го спречува српскиот народ да си ги врати зградите.
„КФОР сега практично ги чува градоначалниците под изговор за зачувување на мирот. Ги штити и од сопствениците на тие згради, кои се Срби, од оние што работат таму, од вработените. Градоначалници во српските општини не може да бидат оние што никој од Србите не ги избрал“, истакна тој.
Дачиќ додаде дека Србија тоа го посочила уште пред неколку месеци и дека сите добро знаат какви се ставовите на Србија.
„На меѓународната заедница ѝ останува да преземе сè што бараат законите и меѓународните обврски, а тоа значи да се осигура безбедност и стабилност за Србите на Косово и Метохија“, апелира Дачиќ.
Шефот на српската демократија истакна дека гаранциите на КФОР не им вредат ништо на Србите бидејќи имаат цел само да ги измамат.
„Не е тоа негативен однос кон нив од наша страна, туку се работи за тоа дали тие ќе го исполнат тоа што се должни да го исполнат или не. Не провоцирајте ја Србија да каже дека Србија мора да го направи тоа. Ако некој мисли дека ова ќе трае до недоглед и дека Србија ќе трпи таква ескалација против Србите, дека ќе паднат жртви, не дај боже… Навистина не ми е јасно дали некој не гледа или не сака да види дека такво нешто мора веднаш да се запре“, нагласи Дачиќ.
Според него, кризата на северот од Косово треба да заврши така што оние што со години ѝ помагаат на Приштина ќе кренат телефон или ќе дојдат во Приштина и ќе го решат проблемот.
„Немојте да си играме криенка и да се правиме дека не може да му влијаат на Курти. Кој е Курти? Велесила? Предупредувањата може да им годат на нашите уши, но не се живее од предупредувања. Ако САД не може да ја принудат Приштина да го почитува тоа, не знам каква доверба можеме да имаме во меѓународната заедница и во оние што го спонзорираат тој опасен воен авантуризам во Приштина“, рече Дачиќ.
Тој потсети дека Приштина доби визна либерализација и отворање на процесот за прием во Советот на Европа.
„Велат дека мора да ги наградат за конструктивниот пристап. Ова ли е конструктивен пристап? Само да не испадне после дека Србија е виновна за такво нешто. Ова не смее да се случи и Србија нема да го дозволи тоа“, нагласи Дачиќ.
Тој истакна дека српските воени сили се во состојба на готовност и предупреди дека, ако е потребно, ќе ги заштитат Србите.
„Да дозволиме да паднат српски жртви поради неподготвеноста на меѓународната заедница или поради воениот авантуризам на Курти… Тоа секако нема да го дозволиме“, нагласи Дачиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Успеавме да ги одложиме санкциите на САД врз српската нафтена индустрија

Српскиот претседател Александар Вучиќ денес изјави дека САД го одложиле воведувањето санкции против Нафтената индустрија на Србија (НИС) за осум дена со цел, како што рече, „за да покажат почит кон Србија“.
„Им благодарам, сакаа да покажат почит, да ни кажат дека нè слушаат и ја разбираат нашата позиција. Благодарам за тоа, но дали добивме нешто суштинско? За седум дена, ќе го имаме истото прашање, а јас сè уште нема да го имам одговорот“, рече Вучиќ во Обреновац, каде што учествуваше на граѓанскиот марш против блокадите.
Тој додаде дека ќе има реакција од Србија и од самата НИС и кон американската страна и кон другите партнери кога станува збор за нови понуди.
„Верувам дека ова е добро, но дали ќе биде доволно и дали ова е она што го сакаат Американците – ќе видиме“, рече Вучиќ.
Санкциите на САД против НИС требаше да стапат во сила на 1 октомври, но рокот сега е одложен барем до 9 октомври.
фото: принтскрин
Регион
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Регион
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.