Вулканската активност е зголемена на популарниот туристички остров Санторини во Грција.

Зголемената вулканска активност во грчкото туристичко жариште Санторини го натера министерот за цивилна заштита да свика состанок со локалните власти и службите за одговор при катастрофи.

Министерството за климатски кризи и цивилна заштита објави дека сензорите откриле „блага сеизмичко-вулканска активност“ во кратерот на вулканот Санторини. Слична активност на тој простор имаше и во 2011 година, кога траеше 14 месеци и заврши без никакви проблеми.

Научниците кои го надгледуваат грчкиот вулкански лак, кој се протега од Пелопонез во јужна Грција преку островите Киклади, забележале зголемување на активноста на централната линија на раседот во северниот дел на кратерот на вулканот Санторини, се вели во соопштението, пренесе Бета-АП.

„Според научниците, врз основа на моментално достапните податоци, нема причина за посебна загриженост“, нагласуваат од Министерството.

Островот Санторини е една од најпопуларните туристички дестинации во Грција, привлекувајќи посетители од целиот свет со своите варосани куќи покрај работ на карпата на поплавениот вулкански кратер кој сега е море.

Тоа беше место на една од најголемите вулкански ерупции во историјата на човештвото, во бронзеното доба околу 1620 година п.н.е., уништувајќи голем дел од островот и давајќи му ја на Санторини сегашната форма.

Иако сè уште е активен, вулканот на Санторини ја имаше својата последна значајна ерупција во 1950 година.

„Вулканот на Санторини произведува многу големи експлозии на секои 20.000 години“, изјави Ефтимиос Лекас, сеизмолог и шеф на Научниот комитет за следење на грчкиот вулкански лак, за грчката државна телевизија ЕРТ во четвртокот. „Поминаа 3.000 години од последната експлозија, така што имаме многу време пред да се соочиме со голема експлозија“, вели тој.

Лекас рече дека вулканската активност се зголемува и намалува и може да предизвика мали земјотреси: „Вулканот е жив организам“, рече тој, додавајќи дека „нема да се соочиме со голема експлозија, туку со блага, постепена активност“.

Студентот на Правниот факултет во Нови Сад, Михаило Младеновиќ, одбил помилување од претседателот на Србија. Тој рече дека ниту еден од 13-те помилувани лица не сакал чин на милост од претседателот.

„Тоа дело требаше да го изврши обвинителството кое до вчера ме гонеше мене, не само мене туку и други луѓе“, изјави тој за Н1 Србија.

Да потсетиме, српскиот претседател Александар Вучиќ објави дека помилувал 13 лица од кривично гонење, и тоа шест студенти, еден декан, еден доцент на факултетот, четворица директори на училишта и еден асистент, соопштија од неговиот кабинет.

Сите тие беа уапсени за време на протестот, а едно од барањата на студентите беше ослободување на уапсените демонстранти.

Зборувајќи за протестите и реките студенти кои се упатуваат кон Нови Сад на протестот во сабота, Младеновиќ истакнува дека неговата генерација „направила голема работа“.

„Бидејќи во ова општество разбудивме некои човечки вредности за кои мислевме дека се целосно заборавени. Би сакал да се осврнам на солидарноста што е присутна во сите сегменти од борбата на студентите за подобро општество и за некакво можно подобрување“, вели тој.

Младеновиќ вели дека барањето за помилување не е исполнето на начинот на кој тие побарале.

„Јас сум еден од тие 13 лица кои беа помилувани. Тоа барање беше исполнето, но не на начин како што баравме. Ние не баравме никакво помилување, никакво дело на милосрдие. Тоа дело требало да го изврши Вишото јавно обвинителство во Нови Сад, кое до вчера ме гонеше мене, не само мене туку и други луѓе“, рече тој.

Според него, никој не барал тоа да го прави шефот на државата, туку тоа да биде работа на надлежните институции.

„Го одбив помилувањето затоа што сакав да ја докажам мојата невиност преку судски процес, а овој чин на претседателот значи дека добивме милостина. Бев обвинет за учество во нередите во Нови Сад на 5-ти ноември, на најголемиот протест во тој град. Немаше докази за тоа, барем не беа објавени“, изјави тој за N1 Србија.

Претседателката на српското Собрание, Ана Брнабиќ, денеска изјави дека е подготвена да оди кај студентите и да разговара со нив нагласувајќи дека тоа е нејзина должност и обврска.

„Во овој момент клучниот проблем за мене е што Законот за високото образование не се спроведува во оваа земја повеќе од два и пол месеца, практично некој реши да го суспендира. И тоа е огромен проблем“, рече Брнабиќ одговарајќи на прашањето дали е подготвена да оди кај студентите.

Брнабиќ смета и дека одржувањето нови избори би било демократско решение за актуелната ситуација во земјата додавајќи дека српската парламентарна опозиција нема легитимитет.

Српскиот премиер Милош Вучевиќ поднесе неотповиклива оставка поради студентските и граѓанските протести, кои траат речиси три месеци барајќи од властите да одговараат за несреќата во Нови Сад кога се урна натстрешникот на железничката станица, при што загинаа 15 лица луѓе.