Повеќе од 800 луѓе се спасени во изминатите два дена од големите поплави во Грција, соопштија локалните власти, откако обилните врнежи ги претворија улиците вореки, урнаа згради и мостови и оставија цели села под вода.

Невремето ги погоди и соседните Бугарија и Турција, при што загинаа најмалку 14 луѓе низ трите земји, вклучително и четворица во Грција.

Грчкиот регион Тесалија, земјоделскиот центар на земјата, беше најтешко погоден од, како што го нарече владиниот портпарол Павлос Маринакис „најголемиот феномен на поплави што нашата земја некогаш го доживеала“. Пристанишниот град Волос, околната планинска област Пелион и градовите Кардица и Трикала беа меѓу најтешко погодените области. Врнежите траеја со денови, но од попладнево се очекува да ослабнат, соопшти Метеоролошката служба на Грција.

Сега се во тек спасувачките операции за да се обидат да стигнат до заглавените во поплавите, каде на места водата надмина два метри.

Видеата објавени од грчките медиуми и на социјалните мрежи покажуваат дека жителите на едно село во близина на градот Кардица се принудени да пливаат на безбедно откако нивните домови биле поплавени. Други селани беа видени како се качуваат на нивните покриви, единствениот дел од нивните домови непотопен, за да повикаат помош.

„Пет села во близина на Кардица се целосно отсечени поради поплавите, а најмалку шест лица се водат како исчезнати“, изјави грчкиот министер за цивилна заштита Василис Кикилијас.

„Блокирани се селата Проастио, Агиа Триада, како и селата Паламас, Мегала Каливија и Калогријана, водата е на голема височина и се прават натчовечки напори за приближување и ослободување на жителите“, рече Кикилијас.

Кикилијас рече дека 885 луѓе биле спасени во изминатите два дена, велејќи дека темпото на евакуација е отежнато од интензитетот на дождот.

„Сакам да ве уверам дека нема средства, акции и напори кои би можеле или би можеле да се направат за што побрзо и побезбедно евакуирање на луѓето кои страдаат 48 часа, што не е направено“ рече тој.

Кикилијас додаде дека спасувачките тимови составени од стотици лица работат на евакуација на заглавените во поплавите, а распоредени се и хеликоптери за да им помогнат на оние до кои не може да се стигне со чамци.

Владиниот портпарол Маринакис изјави за новинарите дека противпожарната служба примила повеќе од 5.000 повици за помош. Во спасувањето помага грчката армија. Полицијата им забрани на цивилите да возат во неколку делови на Тесалија, откако надојдените води носеа автомобили од патиштата. Маринакис рече дека регионот Атика, каде што се наоѓа главниот град на земјата Атина, има речиси три пати повеќе од просечните годишни врнежи во период од 12 часа.

Тешките поплави доаѓаат само неколку дена откако двенеделните смртоносни шумски пожари го зафатија северниот дел на земјата, при што загинаа најмалку 18 луѓе. Иако е тешко да се припишат поединечни настани на климатските промени без научна анализа, на научниците им е јасно дека климатската криза предизвикува екстремни временски настани.