Регион
(Видео) Уапсени шверцери на деца во Србија: принудувале малолетници да просат и да вршат кривични дела во Србија, Франција и во Германија

Шверцери на деца беа уапсени во Србија кога српската полиција во соработка со Европол ја разоткри и разби нивната криминална мрежа, која се протегаше во неколку земји од ЕУ. Криминална мрежа е осомничена за трговија со луѓе со цел присилен брак, принудно просење и принуден криминал.
Во истрагата се вклучени и властите на Австрија, Франција и на Германија. Акцијата резултира со четири претреси на куќи во Србија и апсење пет српски државјани, меѓу кои и водачот на криминалната група. Спасени се осум жртви, од кои шест малолетни на возраст од пет до осум години и две 17-годишни девојки. Запленети се големи количини готовина и дигитална опрема, меѓу кои повеќе од шест мобилни телефони и финансиски документи.
Уапсените се осомничени дека тргувале со свои биолошки деца и други деца со кои се поврзани. Осомничените наводно принудувале малолетници да просат и да вршат кривични дела во Србија, Австрија, Франција и во Германија. Истрагата покажува дека осомничените експлоатирале малолетници и ги продавале жртвите на други сторители надвор од Србија.
Како што информираат од Европол, членовите на криминалната група ги мамеле жртвите во романтични врски по што ги експлоатирале преку принудно просење и принуден криминал.
Повеќето од жртвите се од српска националност, освен една Украинка, која членовите на криминалната група ја принудиле да проси. Осомничените переле пари купувајќи луксузна стока и одржувајќи висок животен стандард. Малолетните жртви биле преземени од српските служби за заштита на децата.
„Европол ги поддржа оперативните активности, ја олесни размената на информации и обезбеди аналитичка поддршка. На денот на акцијата Европол испрати експерт во Србија за да ги потврди оперативните информации во реално време и да обезбеди поддршка на истражителите на терен“, објави Европол.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Ќе се сретнам двапати со Трамп во наредните денови

Претседателот на Србија, Александар Вучиќ, синоќа изјави дека во следните три до четири дена ќе се сретне двапати со претседателот на Соединетите Американски Држави, Доналд Трамп, јавува Анадолу.
„Ќе се сретнам двапати, од различни причини, во следните четири дена. Не ми верувајте на збор, ги измешав датумите и временските зони“, рече Вучиќ за време на обиколката на работите во новата детска клиника „Тиршова 2“, одговарајќи на новинарско прашање за тоа кога ќе се сретне со американскиот претседател, додавајќи дека „сè ќе се случи во следните три или четири дена“.
Тој, исто така, најави дека очекува италијанската премиерка Џорџa Мелони да го посети Белград во август или септември, која ја опиша, заедно со претседателката на Европската комисија, Урсула фон дер Лајен, како една од најмоќните жени во светот.
Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Регион
Не успеа ниту новиот обид за избор на претседател на косовското собрание

Собранието на Косово и енеска не го избра Аљбуљен Хаџиу за претседател на собранието.
При гласањето Хаџиу доби поддршка од 54 пратеници, 44 беа против, а три лица беа воздржани.
За него гласаа пратениците на Самоопределување, како и пратениците на малцинските заедници, освен Адем Хоџа, кој гласаше против.
На седницата не учествуваше пратеничката Дуда Баље, која досега гласаше против.
Против гласаа членовите на Демократската партија на Косово, Демократскиот сојуз на Косово и Алијансата за иднината на Косово.
Претставниците на досегашната опозиција, по седницата, изјавија дека сè ова личи на театар и ја обвинија победничката партија дека намерно го спречува конституирањето на парламентот бидејќи нема гласови за формирање на новата влада на Косово.
Од друга страна, Самоопределување ги обвини пратениците на поранешната опозициска партија дека го блокираат нивниот предлог.
Продолжението на конститутивната седница на косовскиот парламент е закажано за 1 мај.