Претседателката на Народното собрание, Ана Брнабиќ, изјави дека може како човек да разбере ако српскиот претседател Александар Вучиќ размислува да поднесе оставка бидејќи, како што наведе, со години се случуваат обиди за дестабилизација на земјата во која тој е изложен на омраза, но тоа би било политички погубно.

„Можев да разберам дека му е доста од тоа. Но, треба да направиме неколку големи работи што им ги ветивме на граѓаните до 2027 година. Да го завршиме ЕКСПО, да достигнеме просечна плата од 1.400 евра, да продолжиме со економските реформи, да работиме на инфраструктурните проекти“, изјави Брнабиќ за ТВ „Пинк“.

За тоа, како што истакна таа, потребен е Вучиќ, кој изјави дека не знае да се одмора и се натпреварува со себеси во работата.

Според неа, обидите за дестабилизација на земјата бидејќи, како што вели, на некои во Србија и во светот им пречи нејзината независна политика, траат откако Вучиќ стана премиер на Србија, а потоа и претседател.
Таа рече и дека опозицијата сака преодна влада „што е синоним за влада без избори“, но посочи дека „нема ништо да се добие од таа работа“.

„Разбирам дека, како и секојпат, сакаат преодна влада, тоа е нивното второ име – преодна влада, а преодна влада е всушност синоним за влада без избори. Тоа значи дека не е важно како гласале граѓаните, воопшто не ни е важно кој има мнозинство во парламентот, сакаме да бидеме министри и да бараме ресори сакаме да ги водиме“, рече Брнабиќ.

Таа оцени дека формирањето преодна влада ќе биде спротивно на секоја демократска норма.

„Тоа би било шлаканица за сите граѓани на Србија“, истакна Брнабиќ.

Таа оцени и дека оставката на српскиот претседател Алексадр Вучиќ „би била политички погубна за Србија“.

„Мислам дека до 2027 година треба да ги завршиме четирите големи работи што им ги ветивме на граѓаните“, рече Брнабиќ.

Сараево денеска е трет ден по ред на врвот на листата на главни градови со најмногу загаден воздух во светот и концентрација на ситни честички прашина, кои се најопасни за здравјето на респираторниот тракт. Во раните утрински часови беше дури 40 пати повеќе од дозволеното со стандардите на Светската здравствена организација (СЗО), пренесуват медиумите во регионот.

Според податоците собрани од швајцарската веб-страница AirQuality, квалитетот на воздухот во Сараево во четвртокот бил во категоријата нездрав.

Високото ниво на штетни материи во воздухот во Сараево е резултат на локацијата на сливот на градот и честите температурни инверзии во зимскиот период, кои создаваат ефект на капак во тој град, а кога нема ветер како оваа недела, резултира со повеќедневни магли, кои дополнително влијаат на квалитетот на воздухот.

Постојаниот проблем на Сараево е постојаниот сообраќаен метеж предизвикан од големиот број возила во градскиот сообраќај, како и големиот број индивидуални камини, во кои за греење се користат цврсти горива, пишуваат медиумите.

Сараево денеска беше трет најзагаден град по индискиот главен град Њу Делхи и пакистанскиот Лахоре.

Градските власти во Сараево упатија предупредување и покана до жителите да го намалат движењето на отворено на минимум и очекуваат подобрување на состојбата со промената на времето најавена за крајот на неделата.

Според оваа листа, Скопје е на девето место според загаденоста на воздухот.

Нajпознатиот српски тенисер Новак Ѓоковиќ синоќа на социјалната мрежа Х објави дека е важно да се слушне гласот на студентите кои протестираат во Србија.

Блокадите на сите факултети во Белград, Ниш и Нови Сад траат со денови, а студентите не се откажуваат од барањето да се казнат виновниците за трагедијата во Нови Сад, каде при пад на настрешница загинаа 15 лица.

Многу познати личности им дадоа поддршка на студентите, а синоќа Ѓоковиќ изјави дека е со нив.

„Како некој кој длабоко верува во силата на младите и нивната желба за подобра иднина, мислам дека е важно нивниот глас да се слушне. Србија има огромен потенцијал, а образованата младина е нејзината најголема сила. Она што на сите ни треба е разбирање и почит. Со вас Новак“, напиша Ѓоковиќ на социјалните мрежи.

Блокадите на факултетите почнаа на 25 ноември во Нови Сад, а на протестите почнаа да се приклучуваат и средношколци.