Бразилската полиција на сослушување повикала во петокот свој службеник во врска со најверојатното убиство на грчкиот амбасадор Киријакос Амиридис, а ја проверува и верзијата за учество на сопругата на дипломатот, пишуваат локалните медиуми.

Испрашувањето на полицаецот во врска со исчезнувањето на грчкиот амбасадор Киријакос Амиридис траело неколку часови, пишува весникот O Globo, повикувајќи се на роднини на полицискиот службеник.

Полицијата, исто така, ја повикала на сослушување и сопругата на грчкиот дипломат Франсуас Амаридис. Според весникот, иследниците нашле дамки од крв на каучот во апартманот во кој престојувале амбасадорот и неговата сопруга и нивната ќерка. Полицијата во моментов води истрага според верзијата дека дипломатот бил убиен.

Во четвртокот бразилските медиуми, повикувајќи се на службеници на амбасадата на Грција во главниот град Бразилија, објавија дека 59-годишниот дипломат исчезнал пред три дена, во текот на празничниот одмор во Рио де Жанеиро, каде престојувал со сопругата. Според телевизијата Globo, исчезнувањето го пријавила сопругата којашто во полицијата изјавила дека тој во понеделникот вечерта сам го напуштил домот, а не се вратил следниот ден.

Во четвртокот попладнето по локално време во општината Нова Игаусу, во регионот Баиксада Флуминенсе, северно од Рио, каде што е пријавено исчезнувањето, полицијата откри во бездна автомобил чиишто регистарски таблички одговарале на табличките на автомобилот кој го изнајмил амбасадорот, а во внатрешноста бил откриено изгорено тело. Останките се однесени на институтот за судска медицина при тамошниот универзитет.

Амиридис бил конзул во Рио де Жанеиро во периодот од 2001 до 2004 година. Во јануари 2016 е именуван за амбасадор на Грција во Бразил, откако претходните четири години бил амбасадор во Либија./крај/мф/сн