Регион
Вучиќ го откажа Европрајд: Имаме многу проблеми
Претседателот на Србија, Александар Вучиќ на денешното обраќање рече дека „Евро Прајд“ ќе биде откажан.
Вучиќ во своето обраќање до јавноста објасни дека не го радува тоа, и дека тоа ги загрозува правата на малцинството, но дека државата донела таква одлука под притисок на бројните проблеми.
„ Се соочуваме и со тешка криза на Косово, која нема да заврши до 31 октомври“, рече Вучиќ и повтори дека „Србија нема каде да се движи“, но дека нема да се откаже од табличките на КМ, ниту ќе прифати Србите од Косово да не им се гарантира дека можат да излезат и да влезат без документи од Приштина.
„ Значи, одиме во поголема криза и имаме многу проблеми“, додаде Вучиќ.
Тој посочи и на многуте лаги кажани за Парадата на гордоста, за наводите дека Прајд ќе го уништи високиот морал на црквата, каде, како што истакна, литургии држат екскомуницирани монаси, а ги закажуваат некои кои се осудени за семејно насилство и други кривични дела.
Тој додаде дека има многу луѓе кои искрено веруваат дека тоа е големо зло, но дека признава дека откажувањето ги загрозува правата на малцинството, бидејќи државата е притисната од проблеми.
Српскиот претседател рече дека треба да се срамат оние кои парадата ја споредуваат со одбраната на Косово, како и оние партии кои живеат од омраза кон хомосексуалците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Поставен рекорд во центарот на Белград: 1.000 гитаристи свиреа истовремено
Концертот на „Guitar Art“ денеска собра 1.000 гитаристи на плоштад во Белград, кои поставија национален рекорд во присуство на инструменталисти кои свират на гитара и слични инструменти, пренесе српска „Политика“.
Концертот „1.000 гитари“ ги привлече пред се во центарот на Белград најмладите гитаристи и нивните учители, но заедно свиреа цели семејства, составени од три генерации: дедо, татко и син…
Имаше мајки и ќерки кои „замавнаа“ со белградскиот блуз квартет и специјалните гости на концертот, меѓу кои Дејан Цукиќ, Ју групата, Кики Лесендриќ и Пилотите, Срѓан Гојковиќ Гиле, Бојана Стаменов, Никола Чутурило – Чутура. „Ова е конечно моментот кога барем на еден час ги заменуваме силиконите за витамини на ’Трг Републике’. Ова е сеќавање на мојата младост и почетоци во рокенролот. Среќен сум“, изјави Никола Чутурило Чутура за Танјуг.
За неколку минути неколку илјади љубопитни луѓе се собраа на плоштадот да уживаат во првокласен музички настан.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.