Регион
Вучиќ: Тешки разговори во Германија, се плашам од сè што следи
Српскиот претседател Александар Вучиќ по средбата со германската министерка за надворешни работи Аналена Бербок изјави дека разговорите не биле лесни, но дека е задоволен од големиот интерес на германската влада за разговор со Србија.
„Нашата позиција е тешка, секако ужасно комплицирана, а изјавите на претседателот Путин се дополнително комплицирани. За сето тоа ќе зборувам утре. Се плашам од сè што следи“, изјави Вучиќ на новинарите во Берлин по средбата со Бурбок, пренесе Н1.
Тој рече дека ако некој мисли дека Србија ќе го промени ставот на Германија за прашањето за Косово – тоа нема да се случи.
Вучиќ најави дека утре вечер ќе зборува зошто „интересот на сите за Србија ќе стане уште поголем“. Неколку пати повтори дека за сите проблеми ќе зборува во своето обраќање до јавноста во петок.
Вучиќ рече дека со Бурбок разговарал за европската перспектива на Србија, кризата во Украина и ситуацијата во Косово и дека има делови од разговорот кои не биле лесни.
Претседателот на Србија во средата се сретна и со канцеларот на Германија, Олаф Шолц, со кој одвоена средба имаше и премиерот на Косово, Албин Курти.
Вучиќ рече дека разговорите меѓу Белград и Приштина ќе продолжат на 13 мај, а најави и разговори со политичките партии во Србија за да го слушне нивното мислење.
На прашањето дали разговарал со Шолц за гасот, тој рече дека разговарал, но праша – за каква диверзификација да зборуваме?
„Германија има 55 отсто зависност од рускиот гас, а Србија 100 отсто“, рече Вучиќ и најави дека по десетти ќе почнат преговори со Русите за гасот.
Додаде дека преговара со Британците за изградба на складиште за нафта и за надградба на складиштето за гас.
Прашан дали Србите ќе преживеат, тој рече – секако.
„Прашањето не е дали ќе преживееме, туку како ќе преживееме – дали сакаме да поминеме со модринки или тешки рани“, рече Вучиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.