Регион
Грција испрати десетина деца мигранти во Луксембург

Грција денеска испрати десетина деца без придружба во Луксембург од преполните кампови за мигранти, објави „Ројтерс“.
Ова е прва група од над 1.000 деца што чекаат да бидат пренесени поради загриженост од можна зараза на ранливите групи со коронавирус.
Се очекува дека уште една група од педесетина деца в сабота да бидат испратени од Атина во Германија, а уште дваесетина деца подоцна во Швајцарија.
Атина се надева дека од Грција следните месеци ќе бидат преселени речиси 1.600 деца без придружба. Најмалку 5.200 деца мигранти од Сирија, Авганистан, Ирак и од африканските земји сега живеат во Грција, а многумина од нив престојуваат во тешки услови во кампови на островите на Егејското Море.
Заменик-министерот за миграција, Јоргос Кумуцакос, изјави дека иако бројот на испратените деца е мал, тоа испраќа силна порака на другите да го следат примерот на Луксембург.
Десетина држави изразија желба да примат одреден број деца мигранти, вклучително и Србија, Италија, Финска, Ирска и Португалија, соопштија грчките власти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Тројца пациенти од Кочани се примени во болница во Варна

Тројца повредени во пожарот во Кочани вчера се примени на Клиниката за изгореници при ВМА-Варна, јави Бгнес.
Тие беа пренесени во Варна со воениот авион Спартан, кој првично слета во Софија, каде што пет пациенти беа сместени во болницата Пирогов.
Бугарија се обврза на лекување на 14 повредени во пожарот во Кочани.
Во пожарот што избувна во дискотека во Кочани животот го загубија 59 лица.
Регион
Авион на српската армија со 12 повредени во пожарот во Кочани пристигна во Белград

Дванаесет пациенти повредени во пожарот во дискотека во Кочани вчера вечер се пренесени од Македонија во Белград со авион CASA C-295 на српската армија, кои ќе бидат згрижени во Воената медицинска академија и во Клиничкиот центар на Србија, јави Танјуг.
Претходно, авион со четворица лекари и четворица медицински техничари полета за Македонија за медицинска евакуација на повредените во несреќата. Двајца пациенти кои претходно биле пренесени од Македонија со воени амбулантни возила се на лекување во Воената болница Ниш и Клиничкиот центар Ниш. За да им се пружи помош на повредените, планирано е двајца лекари од ВМА (пластичен хирург и анестезиолог) и еден медицински техничар – инструмент-оператор да останат во Македонија, пренесе српски Телеграф.
Најмалку 59 лица загинаа во пожарот што избувна ноќта меѓу саботата и неделата во дискотеката „Пулс“ во Кочани.
Регион
Новак Ѓоковиќ го објави македонското знаме со црна панделка

По големата трагедија се случи во Кочани, Македонија, каде што најмалку 59 лица го загубија животот по пожар во дискотека се огласи и српскиот тенисер Новак Ѓоковиќ.
Тој на социјалните мрежи го објави знамето на Македонија со црна позадина, испраќајќи поддршка до семејствата на загинатите и повредените.