Регион
Грција се подготвува за првиот топлотен бран годинава: зголемена опасноста од пожари

Грција се подготвува за првиот топлотен бран годинава, кој според најавите треба да започне утре, вторник, со температури над 40 степени и „многу висок“ ризик од пожари, најави денеска министерот за климатски кризи Василис Кикиљас.
Врвот ќе биде во среда и четврток, а „опасноста од пожари ќе биде многу висока во значителен дел од Грција“, изјави министерот задолжен за цивилна заштита.
Метеоролошката служба предвидува дека температурите во централниот дел на Грција би можеле да се искачат до 42 степени.
Високи горештини веќе се регистрирани последните денови, особено во Атина, каде во четврток се очекуваат 38 степени.
Кикиљас го повика населението да „помогне и да се грижи за заштита на човечките животи“ и природата, бидејќи веќе има од 30 до 40 пожари на отворено дневно, но засега тие се претежно од помал обем.
Топлински рекорди за првата недела од јуни се забележани минатиот вторник, објави веб-страницата meteo.gr, со температура од 39,3 степени на некои места.
Грција доживеа разорни пожари и двонеделен топлотен бран во 2023 година.
Минатата зима беше најтопла откако е измерена температурата, а сега се соочуваме со „многу тешко лето“ и шумски пожари, рече Кикиљас, кој минатата недела беше интервјуиран од агенцијата АФП.
Во 2023 година изгореа околу 175.000 хектари шуми и земјоделско земјиште, а повеќе од 20 луѓе загинаа во пожарите.
Според Меѓувладиниот панел за климатски промени (IPCC), зголемените температури предизвикани од емисиите на фосилни горива ја продолжуваат сезоната на пожари и ја зголемуваат опожарената површина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пукањето во Белград на само 300 метри од куќата на Мирослав Илиќ, пејачот се огласи: „Боже господе, што се случува“

Во пукањето во Вишњичка бања се повредени пет лица, меѓу нив и една жена за чијшто живот се борат лекарите.
Според неофицијални информации, на пукањето му претходела тепачка, а сè се случило на нешто повеќе од 300 метри од куќата на познатиот пејач на народна музика, Мирослав Илиќ, пишува „Блиц“.
Илиќ по повод настанот се огласи за домашните медиуми.
„Живеам во мирна улица, во мирен крај. Чувај Боже што се случува. Не сум гледал вести и не сакам да знам“, изјави Мирослав за Телеграф.
Иако првичните информации укажуваа дека една жена починала, докторите во Ургентниот центар успеале да ја оживеат.
Неофицијално, повеќе вооружени лица излегле од бело комбе и почнале да пукаат. Овие информации засега не се официјално потврдени, а во тек е полициска потера по напаѓачите.
Очевидци опишале дека од белото комбе излегле неколку лица и почнале да пукаат насекаде.
Регион
(Видео) Полицијата се’ уште трага по напаѓачите по пукањето во кафулето во Белград

Пет лица беа ранети во пукање во кафуле во белградската населба Вишњичка бања, а едно лице е во животна опасност. Напаѓачите, кои пристигнале со бело комбе, влегле во локалот и отвориле оган по гостите.
Повредените – две жени и три мажи – се пренесени во Ургентниот центар. Полицијата покрена акција и сè уште трага по сторителите, јавува „Н1“.
Очевидци раскажаа дека на автобуската станица во близина имало голем број деца кои се разбегале уплашени, а пристигнувањето на итната помош се чекало долго. Жителите потсетуваат дека веќе подолг период имаат проблеми со навивачки групи во оваа населба.
Регион
Детали за пукањето во Белград: Напаѓачите дошле со комбе до кафулето и почнале да пукаат кон гостите

Репортерка на „Н1 Белград“ од Вишњичка бања, каде денеска околу 14:30 часот се случи пукање во кое пет лица беа ранети, јави дека едно комбе дошло по Сланачки пат до локалниот бар и почнало да пука по присутните.
Претходно повеќе медиуми објавија дека починала жена, но според информациите од српската полиција, петмина се повредени. „Еуроњуз“ јави дека жената била донесена во болница без знаци на живот, но спасена е со реанимација. Во моментот се наоѓа во тешка состојба.
На местото на настанот има полиција и форензичари, а полицајците ги замолиле медиумските екипи да се оддалечат бидејќи е во тек увид.
Според жителите, кафулето е познато по тоа што таму се собираат и навивачи, а во него има и простор наменет за деца.
Не е познато дали во моментот на пукањето имало деца во кафулето, но жители и очевидци изјавиле дека на автобуската станица имало голем број деца кои се уплашиле и се разбегале, и додале дека долго се чекало на пристигнувањето на итната помош.
Жителите посочиле дека последните месеци имале големи проблеми со навивачки групи, за што редовно пријавувале во полиција. Полицијата и обвинителството реагирале кога медиумите укажувале на тоа.
„За нив ова е шокантно, но не толку изненадувачко, затоа што навивачките групи одамна прават проблеми,“ јави репортерката на „Н1“.
Засега нема официјални информации за мотивот за пукањето, а српски „Телеграф“ пишува дека станува збор за пресметка меѓу навивачи.