Регион
Еврокомесарката Габриел поднесе оставка за да формира влада во Бугарија
Бугарскиот претседател Румен Радев вчера ѝ го предаде мандатот за формирање влада на Марија Габриел, која истиот ден се повлече од функцијата еврокомесар за иновации, истражување и култура, пренесува „Еурактив“.
Оставката на Габриел беше прифатена од претседателката на Европската комисија Урсула фон дер Лајен, која ѝ се заблагодари за нејзината работа и ѝ посака да го искористи своето искуство во ЕУ во нејзината земја.
Фон дер Лејен објави дека, во меѓувреме, нејзиното портфолио ќе го надгледуваат извршната потпретседателка Маргрете Вестагер и потпретседателот Маргаритис Шинас.
Враќањето на Габриел во бугарската националната политика е на иницијатива на лидерот на партијата ГЕРБ, Бојко Борисов, кој се обидува да ги деблокира последователните неуспеси за формирање одржлива влада по петте избори во Бугарија во изминатите две години.
ГЕРБ победи на изборите на 2 април, но има само 69 пратеници во 240-члениот парламент и има потреба од помош за наоѓање коалициски партнери.
„Ќе направам се за Бугарија да има стабилна, работна, редовна влада. За ова, мојот предлог ќе биде експертска влада обединета околу јасни приоритети кои имаат една цел – благосостојба на Бугарите и авторитет на Бугарија“, истакна Габриел при добивањето на мандатот.
Радев, од своја страна, рече дека ѝ дал една недела на Габриел да излезе со предлог за кабинет, истакнувајќи дека пред неа стои тешка задача.
ГЕРБ предлага влада со траење од една година, што се чину дека одговара на агендата на Габриел бидејќи ќе и овозможи да се кандидира за Европскиот парламент следната пролет.
Во оваа фаза, ГЕРБ и втората политичка формација – проевропската коалиција Промената продолжува-Демократска Бугарија (ПП-ДБ) се во кавга во однос на нивните визии за идната влада.
Од ПП-ДБ постојано повторуваат дека нема да поддржат влада предложена од ГЕРБ, така што се чини малку веројатно Габриел да ја добие нивната поддршка.
Во обид да се најдат алтернативи за парламентарна поддршка, Габриел во понеделникот разговараше со претставници на три други партии во парламентот – Бугарската социјалистичка партија (БСП), мнозински етничкото турско Движење за права и слободи (ДПС) и популистичката „Има таков народ“ (ИТН).
По разговорите, лидерката на социјалистите, Корнелија Нинова, објави дека БСП се повлекува од преговорите за влада со ГЕРБ и дека нема да ја поддржи на парламентарно гласање, а од популистичката ИТН истакнаа дека нивната поддршка нема да биде безусловна.
Само од ДПС јасно кажаа дека се согласуваат со приоритетите на Габриел и ги понудија своите експерти да бидат дел од проектот.
Ако ГЕРБ остане само со поддршката од ДПС и ИТН, трите сили ќе имаат вкупно 116 пратеници – пет помалку од потребното мнозинство. Теоретски, тие сепак би можеле да изберат кабинет ако неколку пратеници од спротивниот табор не присуствуваат на седницата за гласање.
Според бугарскиот Устав, првиот мандат го добива најголемата политичка сила. ГЕРБ имаат рок од седум дена да формираат кабинет. Ако не успеат или ако парламентот го отфрли предложениот кабинет, вториот мандат ќе го добие коалициската ПП-ДБ.
Ако и таа не успее, претседателот ќе го даде последниот мандат на политичка сила по негов избор, а по третиот неуспешен обид, претседателот ќе го распушти собранието и ќе распише предвремени избори.
Тековните напори за формирање влада се засенети од скандалите околу бугарскиот јавен обвинител Иван Гешев, кој беше обвинет, вклучително и од неговиот заменик, за поткопување на угледот на судскиот систем врз основа на направени грешки во истрагата за наводен обид за атентат.
Габриел вети дека првиот чекор што ќе го направи е да побара смена на Гешев, кој нагласи дека нема намера да се повлече.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.
Регион
Дачиќ и Весиќ: Човечки фактор е причина за судирот на возовите
Министерот за внатрешни работи Ивица Дачиќ изјави дека причина за судирот на возовите во тунелот, во кој нема жртви, е човечки фактор, а министерот за транспорт Горан Весиќ изјави дека се повредени 13 патници, од кои четворица се однесена во ургентен центар.
– Возот помина низ безбедносното светло и удри во товарен воз кој чекаше дозвола да оди до станицата Овча – изјави Весиќ.
Дачиќ за новинарите изјави дека често има жртви во несреќи како оваа и дека е вистинска среќа што во денешниот судир нема жртви и што сите патници излегле од возот.
„Најважно е да нема жртви“, изјави Дачиќ за новинарите.
Началникот на Секторот за вонредни состојби на МВР, Лука Чаушиќ, кој излезе на местото на настанот заедно со министрите Дачиќ, Весиќ и директорката на претпријатието „Инфраструктура железнице Србија“ Јелена Танасковиќ, изјави дека во 18 часот и 42 минути добиена е дојава за судирот, по што на терен излегле вкупно 25 пожарникари.
– Пристигнувајќи на местото на настанот во 18 часот и 48 минути, констатирано е дека возот за итни случаи се судрил со патнички воз во тунелот на длабочина од 400 метри од влезот – изјави Чаушиќ.
Тој додаде дека четири лица биле извлечени низ тунелот за евакуација. Дачиќ рече дека најважна улога имаат пожарникарите, бидејќи лекарите од итната помош не можеле да дојдат до патниците.
Министерот за транспорт Горан Весиќ изјави дека деталите за несреќата ќе се знаат кога Комисијата „Железничка инфраструктура на Србија“ ќе објави официјален извештај, кој се очекува во текот на утрешниот ден.
Регион
Дачиќ: Припадниците на полицијата евакуираа девет лица од возовите
Веднаш по добиената дојава дека во тунел дошло до судир меѓу патнички и товарен воз, на местото на настанот пристигнале бројни полициски сили и 25 пожарникари-спасувачи со седум возила, со оглед дека екипите на итната медицинска помош нене можеле да се приближат до местото на судирот, изјави вечерва министерот за внатрешни работи Ивица Дачиќ.
Пожарникарите-спасувачи успеале, како што додаде, да стигнат до местото и евакуирале девет повредени лица и ги предале на екипите на итната помош за понатамошно лекување.
„Припадниците на српската полиција се уште се на терен и ги преземаат сите мерки и дејствија од нивна надлежност“, изјави Дачиќ.