Регион
Радев му се пожали на Вархеји заради невнесувањето на Бугарите во Уставот на Македонија
Само преку почитување на човековите права и принципите на добрососедство Република Северна Македонија може да напредува во процесот на европска интеграција. Ова го изјави бугарскиот претседател Румен Радев на средбата со еврокомесарот за проширување и дпбрососедска политика Оливер Вархеји, пренесуваат бугарските медиуми.
Радев на почетокот на средбата истакна дека Бугарија високо ја цени активната работа и рационалниот пристап на Европската комисија и лично на комесарот за забрзување на процесот на европска интеграција на земјите од Западниот Балкан, што е особено важно за гарантирање на стабилноста и безбедноста на Европа.
Радев потсети дека токму како резултат на неговите плодни средби со комесарот Вархеи и активната заедничка работа е развиена преговарачката рамка, која го отвора патот за Северна Македонија кон Европската Унија, а во исто време ја гарантира заштита на правата на Бугарите во земјата и на бугарското културно-историско наследство.
Бугарскиот претседател, како што јавуваат бугарските медиуми, изразил загриженост поради недостигот на напредок за најважното прашање, што е и задолжителен услов за почеток на преговорите за пристапување во ЕУ – промена на Уставот и на вклучување на Бугарите како составен дел од него.
„Сведоци сме на зголемена системска дискриминација, полициско, административно и судско самоволие кон бугарските здруженија, зголемени злосторства од омраза врз Бугарите и луѓето со бугарски идентитет во Република Северна Македонија“, нагласил Румен Радев.
Шефот на бугарската држава ги потенцирал, како што вели, систематските притисоци и нападите на бугарските клубови во Северна Македонија во последните месеци, како и донесувањето на закон со ретроактивно дејство врз фондациите и граѓанските здруженија, врз основа на кој беа затворени два бугарски клуба.
Бугарија високо ја цени реакцијата на европските институции и острата осуда за одбивањето на Северна Македонија на 6 мај да го прими европратеникот Андреј Ковачев на своја територија, истакна Радев.
„Очекуваме вакви реакции не само кога се засегнати правата на пратениците во Европскиот парламент, туку и на обичните европски граѓани, граѓани на РСМ со бугарска самосвест“, додава тој.
Комесарот Вархеји, изразил разбирање на Европската комисија за важноста на отворените прашања меѓу Бугарија и Северна Македонија и посочил дека забрзувањето на процесот на проширување на ЕУ со земјите од Западен Балкан може да се постигне само доколку е прифатливо за сите земји. Комесарот Вархеји исто така, на средбата со Радев кажал дека критериумите од Копенхаген се јасно наведени и недвосмислени и ЕК ќе продолжи да ја следи нивната имплементација, пишуваат бугарските медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.
Регион
Дачиќ и Весиќ: Човечки фактор е причина за судирот на возовите
Министерот за внатрешни работи Ивица Дачиќ изјави дека причина за судирот на возовите во тунелот, во кој нема жртви, е човечки фактор, а министерот за транспорт Горан Весиќ изјави дека се повредени 13 патници, од кои четворица се однесена во ургентен центар.
– Возот помина низ безбедносното светло и удри во товарен воз кој чекаше дозвола да оди до станицата Овча – изјави Весиќ.
Дачиќ за новинарите изјави дека често има жртви во несреќи како оваа и дека е вистинска среќа што во денешниот судир нема жртви и што сите патници излегле од возот.
„Најважно е да нема жртви“, изјави Дачиќ за новинарите.
Началникот на Секторот за вонредни состојби на МВР, Лука Чаушиќ, кој излезе на местото на настанот заедно со министрите Дачиќ, Весиќ и директорката на претпријатието „Инфраструктура железнице Србија“ Јелена Танасковиќ, изјави дека во 18 часот и 42 минути добиена е дојава за судирот, по што на терен излегле вкупно 25 пожарникари.
– Пристигнувајќи на местото на настанот во 18 часот и 48 минути, констатирано е дека возот за итни случаи се судрил со патнички воз во тунелот на длабочина од 400 метри од влезот – изјави Чаушиќ.
Тој додаде дека четири лица биле извлечени низ тунелот за евакуација. Дачиќ рече дека најважна улога имаат пожарникарите, бидејќи лекарите од итната помош не можеле да дојдат до патниците.
Министерот за транспорт Горан Весиќ изјави дека деталите за несреќата ќе се знаат кога Комисијата „Железничка инфраструктура на Србија“ ќе објави официјален извештај, кој се очекува во текот на утрешниот ден.
Регион
Дачиќ: Припадниците на полицијата евакуираа девет лица од возовите
Веднаш по добиената дојава дека во тунел дошло до судир меѓу патнички и товарен воз, на местото на настанот пристигнале бројни полициски сили и 25 пожарникари-спасувачи со седум возила, со оглед дека екипите на итната медицинска помош нене можеле да се приближат до местото на судирот, изјави вечерва министерот за внатрешни работи Ивица Дачиќ.
Пожарникарите-спасувачи успеале, како што додаде, да стигнат до местото и евакуирале девет повредени лица и ги предале на екипите на итната помош за понатамошно лекување.
„Припадниците на српската полиција се уште се на терен и ги преземаат сите мерки и дејствија од нивна надлежност“, изјави Дачиќ.