Регион
Ердоган ја почна кампањата за референдумот за уставната реформа

Турскиот претседател Реџеп Тајип Ердоган ги повика во петокот своите приврзаници да ја започната битката за референдумот за уставните промени со коишто ќе се прошират овластувањата на шефот на државата, што како што истакна, на Турција ќе ѝ донесе повеќе стабилност.
Два месеца пред одржувањето на референдумот, на 16-ти април, турскиот претседател Реџеп Тајип Ердоган го одржа првиот собир на своите поддржувачи во Кахраманмарас, на југоистокот од земјата, иако кампањата всушност започна пред неколку денови со кои Турците треба да се уверат да ја поддржат оваа уставна реформа.
„Се наоѓаме пред историска одлука. Турција на 16-ти април ќе се одлучи за реформа“, навести Ердоган кој во текот на викендов ќе одржи говори во неколку градови на југоистокот од земјата.
Бидејќи некои политички противници тврдат дека исходот од референдумот е неизвесен, Ердоган ги повика своите приврзаници да „тропнат на сите порти“ за да се придобијат милионите засега неизјаснети турски гласачи кои сигурно ќе влијаат врз резултатот.
Уставните промени кои ги побара владејачката Партија правото и развојот (AKP), оправдувајќи го тоа со примерите како американскиот или францускиот претседателски систем, ги разгоре страстите во Турција. Дебатата за ова прашање во парламентот предизвика и парламентарни физички пресметки со невидена жестокост.
Според нацртот од законот, извршната власт којашто ја извршува главно премиерот, би се пренела на претседателот, којшто., покрај тоа , би можел директно да интервенира и во правосудниот систем. Според поддржувачите, таквата мерка е неопходно за Турција да има силен лидер кој би можел да се справува со економските и безбедносните предизвици.
Меѓутоа, противниците на предлогот сметаат дека Ердоган, кого го обвинуваат а авторитарно владеење, особено по пропаднатиот обид за воен пуч од ноќта на 15-ти јули 2016 година а чијашто главна цел беше всушност неговото соборување со реформата би добил преголеми овластувања.
Турскиот претседател Ердоган, пак, одлучно ги отфрла ваквите обвинувања и порачува дека претседателскиот систем не го посакува за себеси. „Кој сум јас? Обичен смртник“, рече./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Зелено светло за Бугарија – од 1 јануари 2026 година може да го воведе еврото

Во четвртокот, Бугарија доби зелено светло од лидерите на Европската Унија за воведување на еврото од 1 јануари 2026 година.
Лидерите, собрани на самитот на ЕУ во Брисел, го поддржаа предлогот на Европската комисија да ѝ се дозволи на Бугарија да стане 21-ва членка на еврозоната и да го замени левот со евро, откако веќе планираше да го стори тоа во 2024 година, но беше одбиена.
Оваа балканска земја е членка на ЕУ од 2007 година и е првата земја што може да го воведе еврото по Хрватска во 2023 година.
Европскиот парламент и Европската централна банка (ЕЦБ) сè уште треба да бидат консултирани за потребните законски измени пред Бугарите да можат да плаќаат во евра, но тие чекори се сметаат за формалност.
Бугарија, според написите во медиумите од регионот како една од најсиромашните земји на ЕУ, останува на дното на листата од 27 членки во однос на бруто домашниот производ (БДП) по глава на жител, иако стапките на раст се повисоки од другите земји.
Покрај релативно ниските и стабилни стапки на инфлација, критериумите за пристапување вклучуваат стабилност на цените, здрави јавни финансии и стабилни девизни курсеви.
Комисијата неодамна изјави дека очекува стапка на инфлација од 3,6 проценти за Бугарија оваа година и 1,8 проценти во 2026 година, што доведе до позитивен рејтинг за Софија.
Во Бугарија, воведувањето на еврото беше проследено со жестоки протести. Во февруари, националистите запалија оган пред влезот на претставништвото на ЕУ во Софија и истурија црвена боја на стаклената фасада на зградата. Тие фрлаа молотови коктели и јајца.
Минатиот месец, поддржувачите на проруските и националистичките партии демонстрираа во главниот град Софија и во други градови, барајќи левот да се задржи поради стравувањата дека еврото ќе поттикне зголемување на цените.
Противниците на еврото собраа 604.000 потписи во корист на референдум за воведување на заедничката валута, но бугарскиот парламент го отфрли референдумот двапати – во 2023 година и во мај 2025 година.
Според анкетата спроведена од бугарскиот институт Мјара кон средината на мај, повеќе од половина од сите возрасни (54,9%) се противат на воведувањето на заедничка валута во 2026 година, додека стабилна третина (34,4%) се за приклучување кон еврозоната следната година, анализираат медиумите.
Регион
(Видео) Силни ветрови, грмотевици и град: невреме ја погоди Хрватска

Силно невреме погоди неколку делови од Хрватска во четврток вечерта. Го погоди и регионот на Загреб, за кој Државниот хидрометеоролошки завод (DHMZ) издаде црвено предупредување поради исклучително опасни временски услови. Ситуацијата беше особено тешка во Бродско-посавската жупанија. Дирекцијата за цивилна заштита утрово објави дека Окружниот центар 112 во Славонски Брод добил бројни пријави од граѓани во текот на ноќта поради последиците од невремето проследено со обилни дождови и бурни ветрови.
-Во Бродско-посавската жупанија, помеѓу 00:15 и 02:45 часот, имало прекини на далноводите и прекини на трафостаниците. 2.944 корисници во некои општини останаа без електрична енергија-, се вели во соопштението. Екипите на Електра Славонски Брод веднаш излегоа на терен и работат на отстранување на дефектите, а целосно нормализирање на снабдувањето со електрична енергија се очекува во текот на утрото и попладнето.
Во пошироката област на Вуковар, граѓаните беа сведоци на многу силни ветрови, грмотевици и интензивни врнежи од дожд во текот на ноќта. „Во Вуковар имаше силен ветер, а молњите беа како луди“, опиша еден жител.
Загреб, исто така, ја почувствувал бурата, околу 3:00 часот наутро градот бил погоден од силни ветрови кои донеле обилен дожд. По краткотрајното затишје, непосредно пред 8:00 часот наутро, силен пороен дожд повторно го погоди Загреб, придружен со силни грмотевици и налети на ветер. На западот од земјата, во Истра, во некои делови беше регистриран и град.
Силната бура ја погоди и соседна Италија, каде што беа регистрирани обилни врнежи од дожд, бурен ветер и град. На социјалните мрежи кружат фотографии од големи парчиња град, кои сведочат за силата на бурата.
Регион
Запалил спирала против комарци па ја изгорел куќата во близина на Загреб

Вчера наутро во близина на Загреб избувна пожар во куќа во сопственост на 57-годишен маж, соопшти загрепската полиција.
Истрагата утврди дека пожарот најверојатно избувнал поради пад на запалена спирала од комарци што била закачена на дрвен столб, од каде што пожарот се проширил на мебелот, кој бил целосно изгорен, на ѕидот од скалите и дел од покривот, се вели во полициското соопштение.
Пожарот бил изгаснат од пожарникари, а 43-годишен член на семејството бил полесно повреден и добил медицинска помош во Клиничката болница.