Регион
Идентификувани три лица, уапсен хулиган: „Не бев во Атина, имам доказ“
Вчера, во медиумите беше објавена снимка од надзорните камери, на која наводно се гледа моментот кога 29-годишниот навивач на АЕК, Михалис Кацурис, е избоден со нож, а кој наводно е доказ за грчката полиција во случајот со неговото убиство.
На видеото не се гледа баш најдобро што всушност се случило, но според изворот што ја испратил снимката, се чини дека може да го покаже моментот кога грчкиот навивач бил избоден со нож.
Во моментот на кој наводно се гледа прободувањето, Михалис Кацурис (во сина кошула) и уште еден маж во бордо кошула трчаат еден до друг. Михалис во еден момент ја замавнува левата рака наназад, а друг маж замавнува со левата рака, во која држи непознат предмет во правец на убиениот Михалис.
Подоцна може да се види Михалис како гледа во маицата, а потоа трча кон киоскот. Таму колабирал и дошла брзата помош. Подоцна бил прогласен за мртов.
Иако од ова, како и од претходно објавените видеа, е тешко да се заклучи што всушност се случило, ниту едно од досега објавените видеа јасно не покажува дека за смртта на грчкиот навивач е одговорен припадник на хрватската навивачка група.
Властите идентификуваа уште три лица што биле во близина на Кацурис за време на немирите. Како што јавува телевизијата СКАИ, во немирите во близина на 29-годишникот се движеле четири лица, а тројца биле идентификувани од ЕЛАС.
Во истиот извештај се наведува дека по секое легитимирање, ЕЛАС ги испраќа сите детали од истрагата до истражителот, кој одлучува дали ќе издаде налог или ќе повика конкретни лица како обични сведоци. Во секој случај, аудиовизуелниот материјал детаљно го прегледуваат службеници на ЕЛАС во надлежните лаборатории за да се идентификуваат лицата што учествувале во тепачката, пишуваат грчките медиуми.
Грчките медиуми јавуваат и дека важен елемент во истрагата се дамките од крвта на Михалис Кацурис, кои се пронајдени на 20-ина метри од местото, каде што на видеото се гледа како е удрен со палка.
Денеска, се очекува и распитот на 43-годишниот маж, кој беше уапсен поради учество во инцидентите и за кого грчката полиција смета дека бил водич на хрватските хулигани. Според СКАИ, во досието против него има и полициска пријава, но 43-годишникот тврди дека нема никаква врска со настаните.
Досието против него содржи изјава од полициски службеник на Управата за сузбивање на насилството на спортските терени, во која се наведува дека 43-годишникот личи на лицето прикажано на снимката како ги организира хулиганите неколку минути пред нападот носејќи темна кацига.
Неговите адвокати наведуваат дека на денот на немирите тој воопшто не бил во Атина, туку во Кефалонија на одмор со својата девојка. Тие велат дека има бродски билети за да го докажат нивното тврдење, а адвокатите имаат намера да ги декласифицираат телефонските повици и видеата од хотелот во кој наводно престојувал за да докажат дека нема никаква врска со настаните во Нова Филаделфија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Нови сведоци во случајот за убиството на Данка Илиќ: закажани рочишта, телото на детето сѐ уште не е пронајдено
Во Вишото јавно обвинителство во Заечар на 27 и 28 мај е закажан распитот на нови сведоци во врска со истрагата против Дејан Драгијевиќ и Срѓан Јанковиќ, осомничени за убиството на двегодишната Данка Илиќ, објавија српските медиуми.
Од обвинителството за „Танјуг“ велат дека е завршен дел од ДНК-испитувањето на примероците земени и од автомобилот што го управувале осомничените, а на нив не е пронајдена ДНК на девојчето.
Од таму додаваат дека вештачењето на движењата на возилата на осомничените врз основа на ГПС-уредот е во тек, а психијатриското вештачење на осомничените е завршено, но наодот и мислењето на вештачењето сѐ уште не се доставени до Обвинителството.
Покрај Дејан Д. и Срѓан Ј., во притвор е и таткото на Дејан, кој е осомничен дека му помогнал на синот да го премести телото на девојчето.
Братот на Дејан Д., Далибор Драгијевиќ, почина на 7 април во просториите на Полициското одделение во Бор при приведувањето.
Двегодишната Данка Илиќ исчезна на 26 март во Бањско Поле кај Бор, а полицијата по 10-дневна потрага и детаљни проверки на сите индиции и информации, ги уапси Срѓан Ј. и Драган Д. од Бор, кои се осомничени дека го удриле девојчето со автомобилот, а потоа нејзиното тело го ставиле во багажникот и го однеле на депонија.
Телото на девојчето сѐ уште не е пронајдено.
Регион
Вучиќ: На седницата на Советот за безбедност на ОН ќе им одговорам на оние што ги обвинуваат Србите дека се геноциден народ
Српскиот претседател Александар Вучиќ нема да учествува на самитот на лидерите на Западен Балкан и Европската Унија во Котор, Црна Гора, бидејќи ќе присуствува на седницата на Советот за безбедност на ОН за, како што рече, „да им одговори на оние што би ги обвинилe Србите дека се геноцидна нација“.
Пред заминувањето за Њујорк, Вучиќ во Белград се сретна со рускиот амбасадор Александар Боцан-Карченко, откога во понеделникот беше домаќин на шефот на дипломатијата на Украина, Дмитро Кулеба, кој беше во Србија во исто време со Олена Зеленска, сопругата на п0ретседателот на Украина.
Србија постојано ја осудува руската инвазија на Украина во Обединетите нации и други меѓународни форуми, но одбива да се приклучи на меѓународните санкции против Кремљ, пишува „Н1“.
На денешната средба со рускиот амбасадор, Вучиќ рече дека одржувањето на стабилноста во регионот е од витален интерес за Србија, но дека произволните потези и иницијативи на Приштина, како што е резолуцијата на Генералното собрание на ОН за Сребреница, не придонесуваат за процесот на помирување, градење доверба и соработката во регионот.
Во посета на Србија е и европскиот комесар за соседство и проширување, Оливер Вархељ, кој во понеделникот на заедничката прес-конференција со српскиот претседател, зборувајќи за резолуцијата за Сребреница, рече дека не се согласува со колективното казнување еден народ.
„Не се согласувам со ставот за колективна вина, не мислам дека стигматизирањето на српскиот народ и колективната вина е одржлив избор ниту, пак, ќе придонесе за надминување на ужасите од балканските војни“, рече Вархељ.
Резолуцијата со која се потсетува на геноцидот врз Бошњаците од Сребреница треба да биде претставена на седницата на Генералното собрание на Обединетите нации во мај, а Вучиќ и претседателот на Република Српска, Милорад Додик, постојано укажуваа дека споменатата резолуција е обид за наметнуваат колективна вина на српскиот народ, а тие инсистираат на тоа дека немало геноцид во Сребреница, иако тоа беше потврдено со пресудите на Хашкиот трибунал.
Резолуцијата повикува да се воспостави 11 јули како меѓународен ден на сеќавање на жртвите на геноцидот во Сребреница, уште еднаш се осудуваат сите дејства со кои се величат сторителите на воени злосторства, злосторства против човештвото и геноцидот, утврдени со пресудите на меѓународните судови. Ја нагласува важноста од завршување на потрагата по останките на преостанатите жртви, кои досега не се пронајдени, и повикува на продолжување на гонењето на сторителите на геноцидот, кои сѐ уште се на слобода.
Македонија е коспонзор на Резолуцијата за Сребреница. Претходно денес, претседателот на партијата Македонци во Србија, Горан Илијевски, испрати писмо до новата претседателка на Македонија, Гордана Силјановска-Давкова, да се огради од непромислената одлука на министерот за надворешни работи Бујар Османи и со тоа да ја поништи одлука за прогласување геноцид во Сребреница.
Регион
Вархељ во Србија: Денешните одлуки ги обликуваат следните пет години
Комесарот за соседска политика и проширување на Европската Унија (ЕУ), Оливер Вархељ, по средбата со српскиот премиер Милош Вучевиќ во Белград, најави дека денешните клучни одлуки „ќе ги обликуваат следните пет години“.
Вархељ, кој претходно се сретна со српскиот претседател Александар Вучиќ, на X напиша дека се сретнал со Вучевиќ и со членовите на неговиот кабинет.
„Ова е критична година. Следните пет години ќе се обликуваат врз основа на денешните клучни одлуки. Нема време за губење“, напиша Вархељ.
Тој додаде дека детаљно разговарал за отворените прашања од реформската агенда во владата на Србија, кои треба да бидат финализирани во наредните денови.
„Разговаравме и за планот за раст. Диверзификацијата на гасот е најитното прашање. Тоа има значително влијание врз иднината на енергетската безбедност на Србија“, напиша тој.
До изградбата на гасоводот со Бугарија, кој делумно беше финансиран од ЕУ, Србија се потпираше исклучиво на увоз на гас од Русија.
Овој гасовод беше пуштен во пробна работа во декември 2023 година и Србија преку него ќе купува гас од Азербејџан.
Властите во Србија делумно го оправдаа својот став да не воведуваат санкции кон Русија со нивната зависност од рускиот гас.
На прес-конференцијата по средбата со премиерот на Србија, Оливер Вархељ изрази надеж дека новата влада на Србија ќе го забрза патот на земјата кон Европската Унија, јавува Радио-телевизија на Србија (РТС).
Во владата на Србија беше потпишан договор со кој Европската Унија ќе донира десет милиони евра за втората фаза од програмата „Обновливи извори на енергија – развој на пазарот на биомаса во Србија“.
Проектот ќе им овозможи на топланите во неколку локални самоуправи да се префрлат на користење биомаса како извор на енергија, што на нивните граѓани ќе им донесе сигурно снабдување и поздрава животна средина.
Вархељ, како што е најавено, во вторник ќе разговара и со министерот за надворешни работи, Марко Ѓуриќ, и со министерот за внатрешни работи, Ивица Дачиќ.