Регион
Казна од 100 евра ако се премине водената граница во популарното грчко летувалиште

Ако пливате надвор од обележаниот дел од морето на Тасос, може да бидете казнети со 100 евра! Ова е судбината на човекот кој се осмели да ја премине „водната граница“ во популарното летувалиште во Грција.
Како што соопштија од Капетанијата на пристаништата во Кавала, човекот во одреден момент исчезнал, поради што е започната потрага за негово пронаоѓање и безбедно враќање на брегот. Откако бил пронајден жив и здрав, бил казнет со 100 евра затоа што пливал во област каде што не било предвидено за пливање.
Според грчките медиуми, непочитувањето на основните безбедносни правила при пливање е доволна причина моментите на релаксација да се претворат во трагедија. Го пренесуваат и соопштението на Капетанијата на пристаништата, во кое се наведува дека 28-годишен маж е третата жртва на море за 24 часа.
Додадено е дека тој бил извлечен во несвест во раните утрински часови од морето на плажата во Потос, Тасос. Младиот човек со возило на Итна медицинска помош бил пренесен во Здравствен дом, а лекарите можеле само да констатираат смрт. Од Првото пристанишно одделение Кавала наредена е обдукција.
Податоците на крајбрежната стража покажуваат дека најмалку 52 лица загинале од давење во изминатите 15 дена. Ова е алармантна бројка, особено ако се има предвид дека сме на почетокот на летото и дека повеќето денови во јуни луѓето не пливале во море поради врнежливото време.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Затвореник им побегна на полицајците во Грција кога излегол на цигара: „Опасен е, отворете четири очи“

Дваесет и осумгодишен маж вчера избега од Општата болница во Костур во Грција, каде што беше задржан под полициска придружба по операцијата. Во тек е општа потрага по него, па властите апелираат до јавноста да отори четири очи.
Според извештаите на грчките медиуми, затвореникот, државјанин на Албанија, ја искористил небрежноста на двајца полицајци кои го чувале. Наводно, тој успеал да избега кога му дозволиле да излезе надвор на цигара.
Мажот неодамна беше уапсен за кршење на законот за странци, поседување дрога и непослушност, додека против него се водеа неколку многу сериозни судски постапки – 12 години затвор и парична казна од 50.000 евра за кршење на законот за дрога, а за негово апсење има и налог од Апелациониот суд во Солун.
Полицијата интензивно го бара на северот од земјата, со континуирани проверки на раскрсниците, патиштата и возилата што се движат кон Лерин, Кожани и границата со Албанија. Во исто време, се истражуваат околностите под кои затвореникот успеал да избега, додека случајот покрена прашања за начинот на кој бил приведен.
Треба да се напомене дека бегалецот неодамна бил повреден во обид да избега преку нерегулиран граничен премин кон Албанија со помош на 29-годишен сонародник, при што ја скршил ногата и бил префрлен во болница во Костур на операција, од каде подоцна успеал да избега.
Регион
(Видео) Вучиќ им се закани на демонстрантите; „Ле Монд“: Ситуацијата потсетува на Киев 2013/2014

Српскиот претседател Александар Вучиќ, во понеделник вечерта, во продолжението на антивладините протести што се одржуваат во цела Србија, изјави дека државата „ќе ги прогонува демонстрантите многу повеќе, побргу и посилно и ќе воспостави ред“, а западните медиуми остро пишуваа за политиката на Вучиќ.
Во текот на вечерта Вучиќ ги посети просториите на владејачката Српска напредна партија (СНС) во белградската општина Палилула, каде што беа скршени прозорци за време на протестите во понеделникот, и рече дека ова е „показател за тоа со какви насилници и силеџии“ се справува државата. Тој додаде дека демонстрантите „немаат што да им понудат на луѓето, освен насилство, бандитство и уништување“.
Антивладини протести се одржаа во цела Србија во понеделникот вечерта, а светските медиуми оценија дека Вучиќ усвоил стратегија на страв со тоа што ги извел хулиганите и приватното обезбедување на улиците спротивставувајќи им се на демонстрантите.
„Ле Монд“: Ситуацијата потсетува на Киев 2013 – 2014 година
Францускиот весник „Ле Монд“ ја споредува ситуацијата во Србија со настаните во Киев 2013 – 2014 година кога хулигани и полицајци во цивил беа искористени за предизвикување насилство.
Според весникот, од вторникот минатата недела во неколку градови избувнаа судири меѓу поддржувачите на владата и демонстрантите.
Маскирани напаѓачи ги демолираа канцелариите на Српската напредна партија во неколку градови, видеа од насилни апсења се објавени на социјалните мрежи, а властите ја обвинуваат опозицијата дека се обидува да ја уништи Србија и да предизвика граѓанска војна, го цитираат францускиот весник, белградските медиуми.
„Ле Монд“ нè потсетува дека протестите во Србија траат веќе девет месеци откога 16 лица загинаа при уривање настрешник на железничката станица во Нови Сад во ноември минатата година, што јавноста го протолкува како последица на широкораспространета корупција.
Протестите беа упорно предводени од студентско движење, кое сега бара Вучиќ да распише предвремени избори ставајќи го во ситуација во која мора да се соочи со пад на поддршката, дури и кај до неодамна лојалниот избирачки корпус.
Весникот исто така наведува дека Вучиќ ги обвинува странските служби за обид за обоена револуција и се потпира на пасивноста на европските престолнини.
„Фајненшл тајмс“: Балансирањето на Вучиќ на домашната и на глобалната сцена
Британскиот „Фајненшл тајмс“ (ФТ) пишува дека по децении на власт, ветераните на авторитарните режими неизбежно се соочуваат со прашањето дали да ја зголемат репресијата, да го зајакнат својот круг на капиталистички пријатели и да ги истиснат остатоците од независните медиуми или да се поклонат пред повиците на опозицијата за реформи и дека Александар Вучиќ сега се соочува со токму овој избор, пишува ФТ.
„Автократите секогаш се одлучуваат за првиот пристап и стануваат потврдокорни. Сега Вучиќ се соочува и со антивладини протести на улиците на главниот град. Осум години како претседател на Србија, а пред тоа како премиер, владееше со интервенционистичка рака, но водеше повеќе управувана демократија отколку целосна автократија“, пишува британскиот весник истакнувајќи дека Вучиќ слично лукаво балансирал на глобалната сцена.
Според „Фајненшл тајмс“, пренесува белградската агенција „Фонет“, претседателот на Србија има срдечни односи со Москва, но не е толку пријателски расположен кон неа, што би ги „разбеснило“ Европската Унија и САД, покрај продажбата на оружје на Украина, а му се додворуваше на Пекинг за милијарди долари кинески инвестиции во индустријата и инфраструктурата.
Весникот исто така укажува на кокетирањето на Вучиќ со лидерите на евроблокот, Урсула фон дер Лајен или францускиот претседател Емануел Макрон, не само поради најавата за можноста европските рударски компании да ги експлоатираат наоѓалиштата на литиум во Србија.
Според „Фајненшл тајмс“, Вучиќ изградил добри односи и со блиски соработници на Доналд Трамп за време на првиот мандат на американскиот претседател.
Си-ен-ен: Протестите го оспоруваат сè поавтократското владеење на Вучиќ
„Фрустрацијата поради неговото неодговорно и нетранспарентно владеење се претвори во протести, предизвикани од уривањето на настрешникот на железничката станица во Нови Сад минатиот ноември, при што загинаа 16 лица. Станицата ја реновираа кинески компании како дел од иницијативата „Појас и пат“, а противниците на Вучиќ за уривањето ги обвинуваат државната корупција, лошото управување и слабиот надзор, кои ги сметаат за обележја на неговиот режим“, пишува ФТ.
Американската мрежа Си-ен-ен се осврнува на едно од низата јавни обраќања на Вучиќ во неделата кога тој најави строги мерки против антивладините демонстранти по деновите улични немири во Србија, кои го доведоа во прашање неговото сè поавтократско владеење.
Во едно од неговите чести телевизиски обраќања до јавноста Вучиќ ги обвини демонстрантите за чист тероризам и ги повтори своите тврдења дека повеќемесечните постојани протести против неговата влада биле оркестрирани од Западот и имале цел уништување на Србија, објавува Си-ен-ен.
Протестите во Србија продолжуваат од утро до мрак, а студентите – по неколкуте масовни собири во целата земја, кои заедно со другите во Белград на 15 март собраа стотици илјади луѓе – навестија реприза оваа есен, најверојатно, во септември.
фото: принтскрин
Регион
Конечна судска одлука: Додик повеќе не е претседател на Република Српска

Апелациониот совет на Судот на Босна и Херцеговина ја отфрли жалбата на Милорад Додик против одлуката на Централната изборна комисија (ЦИК) со која му беше одземен мандатот на претседател на Република Српска.
Како резултат на тоа, според сараевските медиуми, Додик официјално повеќе не е на таа позиција, а ЦИК е должна да распише предвремени избори за претседател на ентитетот.
Да потсетиме дека ЦИК претходно донесе одлука за прекин на неговиот мандат, но таа можеше да стапи на сила дури откако ќе стане конечна, или потврдена од Апелациониот совет на Судот на БиХ. Денешната одлука конечно утврди дека Додик повеќе не е претседател на Република Српска.
Во образложението на пресудата, Судот наведе дека мандатот на избраниот функционер завршува на денот на правосилност на пресудата со која е осуден на затворска казна од најмалку шест месеци, што во случајот на Додик беше 12 јуни 2025 година, кога беше донесена второстепената пресуда. Судот ги отфрли и тврдењата за ретроактивна примена на законот, нагласувајќи дека пресудата станува правосилна на денот на нејзиното донесување, додека нејзината извршност е поврзана со доставување до странките, што не ги менува правните последици за мандатот.
Фото: ЕПА