Регион
Лајчак: Курти да избегнува какви било некоординирани потези

Специјалниот пратеник на ЕУ за дијалог Мирослав Лајчак го потсети премиерот на Косово, Албин Курти, за важноста да се избегне каков било некоординиран потег.
На неодамна одржаниот состанок во Приштина како дел од подготовките за нова рунда дијалог на техничко ниво во Брисел тој изјави дека секој некоординиран потег може да го наруши процесот на нормализација.
Словачкиот дипломат ја истакна потребата од целосно фокусирање на нормализацијата и имплементацијата на бриселскиот договор и анексот договорен во Охрид.
„За време на средбата во Приштина со косовскиот премиер, Албин Курти, и првиот вицепремиер, Бесник Бисљими, разговаравме за очекувањата од претстојниот состанок во Брисел и ја истакнав потребата целосно да се фокусираме на нормализацијата и имплементацијата на бриселскиот договор и неговиот анекс од Охрид. Исто така, ја нагласувам важноста да се избегнат какви било некоординирани потези, кои потенцијално би можеле да го нарушат процесот“, напиша Лајчак вчера на „Фејсбук“.
Тој изрази загриженост за настаните на северот на Косово и Метохија за кои, како што рече, го информирале претставници на граѓанското општество и политичките партии при посетата на тој дел на Косово и Метохија.
„За жал, тоа што го слушнав ме загрижи. Затоа ја повторив потребата да се избегне каква било можност за ескалација и целосно да се фокусираме на нормализација“, рече Лајчак.
Тој се осврна и на посетата на Белград, каде што во петокот се сретна со претседателот на Србија, Александар Вучиќ, и со директорот на Канцеларијата за Косово и Метохија, Петар Петковиќ.
„За време на нашата средба разговаравме за натамошното спроведување на договорот од 27 февруари и неговиот анекс од 18 март со цел да се подготвиме за средбата во Брисел“, рече словачкиот дипломат.
Тој изрази очекување дека двајцата главни преговарачи ќе бидат подготвени да договорат конкретни следни чекори кон имплементација на договорот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Конечна судска одлука: Додик повеќе не е претседател на Република Српска

Апелациониот совет на Судот на Босна и Херцеговина ја отфрли жалбата на Милорад Додик против одлуката на Централната изборна комисија (ЦИК) со која му беше одземен мандатот на претседател на Република Српска.
Како резултат на тоа, според сараевските медиуми, Додик официјално повеќе не е на таа позиција, а ЦИК е должна да распише предвремени избори за претседател на ентитетот.
Да потсетиме дека ЦИК претходно донесе одлука за прекин на неговиот мандат, но таа можеше да стапи на сила дури откако ќе стане конечна, или потврдена од Апелациониот совет на Судот на БиХ. Денешната одлука конечно утврди дека Додик повеќе не е претседател на Република Српска.
Во образложението на пресудата, Судот наведе дека мандатот на избраниот функционер завршува на денот на правосилност на пресудата со која е осуден на затворска казна од најмалку шест месеци, што во случајот на Додик беше 12 јуни 2025 година, кога беше донесена второстепената пресуда. Судот ги отфрли и тврдењата за ретроактивна примена на законот, нагласувајќи дека пресудата станува правосилна на денот на нејзиното донесување, додека нејзината извршност е поврзана со доставување до странките, што не ги менува правните последици за мандатот.
Фото: ЕПА
Регион
Маж фрли молотов коктел врз Куќата на цвеќето, го фати обезбедувањето

Белградската полиција го уапси 55-гпдишниот Г.М. под сомнение дека фрлил молотов коктел врз Куќата на цвеќето, објави српски Телеграф. По наредба на обвинителството, му е одреден притвор до 48 часа.
Тој е осомничен дека се обидел да го запали Музејот „25 Мај“, местото каде што е погребан поранешниот југословенски претседател Јосип Броз Тито, околу 6 часот утрово.
Човекот е уапсен по интервенцијата на полицијата. Нема повредени.
Пожарот ја оштетил влезната врата од Куќата на цвеќето. Според Телеграф, полицијата била повикана од обезбедувач. Тој пријавил дека еден човек дошол пред Музејот, најверојатно држејќи молотов коктел, и се заканувал дека ќе ја запали зградата.
„Се приближил до зградата и фрлил запалива течност. За среќа, обезбедувачот го фатил и ја повикал полицијата“, пишува Телеграф.
Неофицијално, се дознава дека човекот при апсењето рекол дека сакал да го запали „усташкото гнездо“.
фото: принтскрин
Регион
(Видео) Изгоре луксузна јахта во Будва: сопственикот бил на бродот кога избувнал пожарот

Црногорските противпожарни екипи го изгасија пожарот што избувна на јахта во марината во Будва.
Ова за црногорски „Вијести“ го потврди и раководителот на Службата за заштита и спасување на Будва.
Полициската управа соопшти дека околу 20:15 часот во неделата, полицијата во Будва била известена од сопственикот на јахта закотвена во пристаништето во Будва дека избувнал пожар додека сопственикот бил на бродот.
Јахтата е во сопственост на бизнисменот Б. М., а полицијата објави дека сопственикот на јахтата рекол дека пожарот најверојатно се случил поради дефект.
Пловилото било извлечено од пристаништето откако избувна пожарот кратко по 20 часот, заради безбедност на другите бродови. Седум екипи беа ангажирани за гаснење на пожарот.
фото: принтскрин